Fangatulun 5 - Fanawbuid tagsibaliwas Fakayabian

Famararang sas Fagfanugtugun

¹ Ku sisian, dungugani fia ku fagyalongun at mafae fagsafulun emu,

² laman saful tuo gamatangan at matuyan, ay garingang ke fagsafulun.

³ At mauri fag mangena at aringang kata sik deut, ay at famaylatan kata sik langis.

⁴ Ay nu naylat way o, kata sik mayat ay fakasaitun takadasug sa emu.

⁵ Ay nu nafaning wayo anya, kanya gtaban emu sas faurianan, aroro at dalan sa ways fakabulun.

⁶ Kanya wa kaylat glao tagsas leleg fag dalan, ay wa saful te, at fagloan sa way at mabaraud fag dalan.

⁷ Nu katanya, ku sisian, dungugani ay lag kalyam ku foyungan.

⁸ Ayayui takatanya fag mangena, nustua lag nangakbang sat bale.

⁹ Aroro nu nafakamulun way ban o katanya, am fagmatuyanun ban sumawa am iba, ay at yud ban e afanyu ya fag ngay taw gfabul emu.

¹⁰ Ay fagayu am ramraman ay am ngay nainlufuyan, umfon sa am fagyudun toglag fag ngay taw.

¹¹ Nu gfandeng ban o, gina ya ban o gakabulun, ay gina ya ban o anniwang, ay gina ban o yud e fagmabitsugun ya,

¹² ay ginanya ya ban nu glong o te, “Fangulan, kwa nafaning nu e gatul angku; nafamaogatun kway, ay nafaning ku fakaylatun.”

¹³ Ay glong yangay ban o te, “Kwa nafaning ku ngay takamoyung.

¹⁴ Nu katanya, gakabulun kwan sis salubangan fagngayuan taw.”

¹⁵ Matuyani fia sam bubay. Ay nu sa di ataw sik mamam, nu nanginum o sai tua gugat am sadili saguban.

¹⁶ Ay tibaginan am bubay umkuri emu.

¹⁷ Nu katanya, sik dadwa masine nu kedkesugan tua fia, ay lag namaylatan ya sa tiba.

¹⁸ Asuni wan sim bubay, am naylatan siginan nu mabaguama o.

¹⁹ Aroro am bubay masine, ay maylat kata sik bian, nangus manabayan tuo ay aylati nu kesug emu.

²⁰ Ku sisian, lag o gafaylatan at mauri fag mangena, ay lag nangalo am ibama at mangena.

²¹ Aroro Yawi glag way fagayu am fakamulun, ay nusnga nday o, gulit way emu.

²² Ay at mauri fag taw nafaylatan kafag mangena at fagmauriun, kata nu nangasangdaw sa sik litag.

²³ Kanya ban umkalyam, aroro we nasalag ya anya, ay umbul siginan at fagyudun e fagsafulun.