Fangatulun 4 - Fanawbuid tagsibaliwas Fakayabian

¹ Ngay sisian, dungugani fia ay fagtainan at ngay foyungan ayu fag ngay ugali, laman kafamut ay fagsafulun.

² Ku ngay foyungan masine tua, nu katanya, dangay am gfae yud e masuad.

³ Ebi gina kyay sik sisian, ku mama ay ku mina kesug tua angku kata nu sadi yay at sisian.

⁴ Ku mama nafoyung angku, ay nalong te, “Ku sisian, amatangani tua gugat ku ngay foyungan emu. Ay faningi ku ngay suguan emu, ay ngaduge tua ban nu gleleg o stes daga.

⁵ Ugatani nu nangae fagsafulun o, ay nangatogdungug. Ay fasii tua gugat emu ku ngay longan, ay lag o gsaruy siginan ku foyungan.

⁶ Lag o kauri fagsafulun, nu bunway esugi tua, aroro kanya tagdiri emu.

⁷ Fagsafulun ay fagmamatanganun at mafanud sas fagayu, nu katanya, ugatani asafuli, dewa ban namin fagayu am ramraman.

⁸ Nu katanya, aylati ay famafanudi fagsafulun, aroro kanya tagfauseganan emu.

⁹ Ay kanya kata sik sangbo tagfon emu famauseganan.”

¹⁰ Ku sisian, dungugani ay aylati ku ngay foyungan emu, laman ban ngaduge tua nu gleleg o.

¹¹ Nafoyung kwan sa emu fagsafulun, laman gbanwan o sat matuyan.

¹² Nu nafaning tua ban o katanya, we masalag am algan sam leleg, ay umlangfe tuo siginan nusnga setaw fag mauri.

¹³ Lag o kalyam ku ngay foyungan emu. Fasii tua gugat am amatanganan, aroro nu nafaning tuo, ngaduge tua nu gleleg o.

¹⁴ Lag gfaning ngay taw tagfakamulun at mauri.

¹⁵ Saruyi takatanya, ay ugalii at matuyan.

¹⁶ Aroro at yud matuyan fag taw wa gatiugun nu dyakmay nafakamulun at mauri, ay wa kabayan nu dyakmay e nafamauri.

¹⁷ Ay kanya fagayu gfakamulun at fagmauriun, kaksvn nu katebo fakonun, ay nu kadanum.

¹⁸ At matuyan fag taw at ugali, kata tua menit nu bagu kasure, ay kaduge kabat, kaugat yay nu gyamag.

¹⁹ Dewa katanya, at mauri fag ngay taw at ugali, sa ways fagmadulumun, ay wa nasaful te, kafaurianan.

²⁰ Ku sisian, dungugani fia ku foyungan emu.

²¹ Lag o kalyam, fasii tua gugat am amatanganan.

²² Aroro kanya tagfon emu fagmatagluun, ay tagfaba am leleg.

²³ Tagtungud sas fagayu, fayayui am amatanganan siginans mauri, aroro nu setain wan am namatangan, katanya yangay fia am ugali.

²⁴ Lag o gfansulitan at yud matuyan sabaliwa am ngay faduksay, ay saruyi yangay fakamuagun.

²⁵ Nusnga setaw am amatanganan, kabavn fasai tua at matuyan.

²⁶ Nusnga setaw am fagnamakamulunun, amatangani tua fia, laman am ngay algan gtaglayun tua.

²⁷ Ugalii at matuyan, ay ayayui siginan at mauri.