Fangatulun 30 - Fanawbuid tagsibaliwas Fakayabian

Agur at ngay Fangatulun

¹ Katatuy Agur at ngay fangatulun. Agur, Ake at baguama ay sik taw Masa. Katatuy at longan sas Ityel ay sas Ukal:

² Sas fagayu taw, au wan at yud mamatanganan. Nu gamatangan au, ku amatanganan wa kata sik taw at amatanganan.

³ Kwa nyamag sabaliwas fagsafulun, ay kwa yangay e fagsafulun sabaliwas Dius.

⁴ Sinu nunda at nasas banwa ay at natustus ste swa daga? Ay sinu nunda at nagalumutan tagmara ay at nasifig mamam sat lanbung? Ay sinu nunda at namatangan laman namoli fagdaul daga at fatuan? Nung tuo e nasaful, longi angku kafag taw at ngayan ay anggan at baguama at ngayan.

⁵ Yawi at ngay longan matuyan ay mafatigwananan. Ay kanya wan ngay taw tagafanud sa anya at famalabag.

⁶ Lag o gfamut at ngay longan, aroro nu nafamut way o, kanya ro gaiyan emu ay gfasaful te, sik takamuag o.

⁷ Yawi, dua ya ku fagetun sa emu katsi gina au gleleg. Foni yap ban nangus angku:

⁸ Taguna, gubuki angku laman kdi kamuag. At fadua, lag o gfaramraman angku ay dangay ngap gfasik yud e kwa, abat ngate, foni angku ku ngay fagayudanun.

⁹ Aroro nu nramraman kway ro manga, kwa gseg ya emu, ay nu nsik yud kro e kwa, nanfangkamul kway ro manga ay gfapla au emu.

¹⁰ Lag o gfauri sik fagsuguan sit tagfayafun at salubangan, aroro at tagfayafun mafaurianan ay mafaidapan emu.

¹¹ Tibak sisian wa gdarangin ya sas Dius te, “Gubuki em ngay fagtainan,” abat ngate, glong way at mauri.

¹² E ngay taw gamatangan sat sadili te, matuyan wan, ay aroro mangaro at fakamulun mauri way.

¹³ E ngay taw kamatungudun, ay kanya nu gamatangan sat sadili, gtungud tua at iba.

¹⁴ Tibak taw wa kamon ay madot, ay gfaurianan wan dewa at yud e kwa fag ngay taw.

¹⁵ Ngay taw tagfangalabian kata sik almatuk, glong gugat te, “Foni angku!” E tuluk yud kagwanta, ay e faufat ya takamalabo:

¹⁶ Taguna, fagfolian, ay at fadua, sik mangena tagaranas, ay at fatulu, at matat fag daga, ay at faufat, sik igang.

¹⁷ Nusnga sinu fag sisian tagfalingun ay takamabo at fagtainan, ugak suminduk at ngay mata, ay nu nbul ban, ngay bio nangon at bilug.

¹⁸ E tuluk madulo ku fagyudun anyamag, ay e faufat ya ku fagyudun gtogdungug:

¹⁹ Taguna, nu setain bio nu glayug sis kiwang, ay at fadua, ule nu galafangan sas wa gang, ay at fatulu, sakayan lino nu gfioan sis fagngabasadan dagat, ay at faufat, mangama ay mangena nu kedkesugan.

²⁰ Katatuy at mauri fag mangena: kanya namatugtug sa tibak mangama, ay kamuag glong te, “Kwe nafakamulun at mauri.”

²¹ E tuluk mauri tagfatadtaruyan ngay taw ste swa daga, ay e faufat ya, sik mauri, taw at fagyudun magwanta:

^22-23 Taguna, sik fagsuguan at kinsik fun, ay at fadua, sik yud e fagsafulun at ke fakonun ngayu, ay at fatulu, sik mangena at mangama at yud kesug anya, ay at faufat, sik fagsuguan fag mangena at natubus at tagfayafun.

²⁴ Ste swa daga e ufat sirut ktagleleg, ay galay sadi e mesa fagsafulun:

²⁵ Taguna, ngay dabdab, kanya dewa yud mabitsug, gfaful tua fakonun gina mangune.

²⁶ Ay at fadua, siang, kanya fagayu dewa yud mabitsug, mafawat tua at bale dewa sas wa gang.

²⁷ Ay at fatulu, ngay liung, deyud e gfangguna, masine tua nu ggabanan ngayu glayugan.

²⁸ Ay at faufat, ngay tiki, kanya dewa yud maidap ggamat, e kalag tua sis fun at bale.

²⁹ Ay e tuluk awatan tagleleg tagsaman tiba nu glao, ay e faufat ya taglao kata sik fun:

³⁰ Taguna, liun, at madot sas fagayu mangilafang, ay at yud e fakalimuun.

³¹ Ay at fadua, tabag nu maseganama glao. Ay at fatulu, sik tama kambing, ay at faufat, sik fun tagfangguna at ngay tagfawayan.

³² Siginan am fagyudun e fagsafulun, nu nanfamatungudun way o, ay am algan nu namakamulun way o at mauri, lag o gfataglayun ya takatanya.

³³ Nu gdadas o ay naunaw, arodi vtv, yudu wan. Ay nu e nafalang sik taw at dungus, gtaguk. Katanya yangay nu e nafauri way nusnga sinu fag taw, arodi e fagawayanun.