Fangatulun 29 - Fanawbuid tagsibaliwas Fakayabian1 Sik taw at yud gfabali at ugali dewa e gsalag, umfaurianan ay wa mlangfe. 2 Tagfangguna nu matuyan tua, ngay taw guseganan, dewa katanya, tagfangguna nu mauri way, ngay taw gwayway. 3 Sik sisian takaylat fagsafulun gfae fagusegananun at fagtainan. Ay tagfadgaloan sa sik takamatugtug fag mangena gfangulan way at ramraman. 4 Sik fun at algan nu sa tua baliwas fagmatuyanun, gfabitsug at fagmafunanun, dewa katanya, kanya nu get way famayad, giklas way at fagfagtainanan. 5 Sik taw tagfalagan te, gfauseganan at iba, kanya gfaurianan way at sadili. 6 Sik taw nu mauri way, at asalanan yay tagfagamatan anya, dewa katanya, at matuyan fag taw galubad tua gugat guseganan. 7 Sik taw at matuyan, ggubuk tua ngay taw at yud e kwa, dewa katanya, at mauri fag taw wa gfakamulun takatanya. 8 Ngay taw takamalingun gfasigad fagyudun mabayan, dewa katanya, at ke fagsafulun tua fag ngay taw at mafafaragang. 9 Sik taw ke fagsafulun dewa ngap nataban sik taw at yud e fagsafulun sas fagfasinean ngay mamalong, we fagmanabayanun, aroro kanya fag taw at yud e fagsafulun wa ro gfaragang ya nu garingang kamalingun. 10 Takamabul fag ngay taw kauri ay gyafabulun at matuyan fag ngay taw ay at yud e malong. 11 Sik taw at yud mamatanganan wa mafaragang at dotama, dewa katanya, sik taw ke fagsafulun, gfaragang tua at sadili. 12 Sik tagfangguna nu gafanud way sas fakamuagun, fagayu at fagsuguan galoan sas fagmauriun. 13 Yawi wan at nafae mata at yud e kwa ay takamaidapan fag ngay taw. 14 Sik fun nu matuyan tua sa sangay taw at yud e kwa, ngaduge tua nu gfunan. 15 Falangi tua sik sisian laman umsik matuyan, takatanya gfae fagsafulun anya, dewa katanya, nu dway e gsalag ya, kanya ban gfae fakaplaun way at fagtainan. 16 Sik tagfangguna nu mauri way, kafamut fagmauriun sit furuan. Dewa katanya, kanya fagayu umfaurianan ay at matuyan fag ngay taw lumag nu gafaurianan. 17 Foyungi am sisian ay kanya gfae fagmanabayanun emu. 18 Sik talun at ngay taw nu dway gfaning Dius at faugali, kanya fag ngay taw wa saful gfaragang at sadili. Mauseganan tua sik ngay taw nu gfaning tua Dius at faugali. 19 E ngay fagsuguan at yud kafafoyung nu siginan way lang ngay aringang, aroro dewa gtogdungug, wa gfaning. 20 Amasine yap at yud mamatanganan fag taw at fakadasugan, nu gamut sik taw tagfansakit nu garingang. 21 Sik tagfayafun nu dway gfoyung at fagsuguan siginan nu masisian, abandi ban kanya fag fagsuguan gfaidapan way anya. 22 Sik taw at masakit gfangadotama, gfasigad awayan, ay kanya mauri gugat. 23 Sik taw takamatungudun gfae fakaplaun anya, dewa katanya, sik taw takamababaun gfae fagusegananun tua at sadili. 24 Sik taw nu gfadiuganan way ngay tagfangkamul, gfaurianan way at sadili. Ay dewa e glong sa anya te, “Longi at matuyan,” wa glong. 25 Nu kalimu way o tibak taw, kata nu nsangdaw o. Dewa katanya, nu gafanud tuo sas Yawi, umlangfe tuo. 26 Ngayu at nangakbang sa sangay tagfangguna laman nanget te, fadiuganani anya, dewa katanya, Yawi way lang at mafon fagmatuyanun. 27 At matuyan fag ngay taw ay at mauri fag ngay taw kadkaurian. |
Copyright © 2021 by OMF International, Philippines
OMF International