Fangatulun 28 - Fanawbuid tagsibaliwas Fakayabian

¹ Sik taw mauri glagyu way deyud e gfafalo anya, dewa katanya, at matuyan fag taw maseganama tua kata sik liun.

² Sik talun at ngay taw nu mauri way, masakit nu gtubus at fun. Dewa katanya, at fun nu e fagsafulun tua ay mamatanganan, mabayan tua at ngay taw nu gbanwan.

³ Sik taw at yud e kwa tagfaidapan at yud e kwa, kanya kata sik maksvn fag arak tagfamin tanum.

⁴ Sik taw mauri guseganan ngay taw at yud gfaning Yawi at faugali, dewa katanya, tagfaning at faugali, di gfadiuganan anya.

⁵ Ngay taw at mauri wa gtogdungug fagmatuyanun, dewa katanya, nusnga sinu tagafanud sas Yawi gtogdungug tua.

⁶ Amasine yap sik yud e kwa fag taw tagbanwan tua sat matuyan, nu gamut sik maramraman fag taw tagugali sat mauri.

⁷ Sik sisian ke fagsafulun, gfaning tua Yawi at faugali, dewa katanya, takaylat namadgaloan sa tibak sisian takamabo, gfae fakaplaun way at ngay fagtainan.

⁸ Tagfayu at salapi nu siginan way nu gfasawe at famamut siginan at nafabedan fag taw, tiba way ban ktaw at nangagbilug kafag salapi laman ggubuk ngay yud e kwa.

⁹ Sik taw at yud gfaning Yawi at faugali, Dius kauri way takatanya fag taw at darangin.

¹⁰ Sik taw tagfae asalanan tiba, kanya yay at kumgamat sat sadili sangdaw. Dewa katanya, sik taw tagugali sat matuyan, umke fagmasineun tua.

¹¹ Ngay taw at maramraman gamatangan te, e fagsafulun wan, dewa katanya, sik ngay taw at yud e kwa tagsaful gtogdungug, saful way kafag ngay taw at ugali.

¹² Sik fun nu masine tua nu gfunan, ngay taw guseganan tua, dewa katanya, at fantubus nu mauri way, ngay taw gsuksuan way.

¹³ Nu dway o naubun am ngay asalanan, wa ban manabayan nu gbanwan o, dewa katanya, nu nafoyung tuo ay naubun am ngay asalanan, Dius gfalyam.

¹⁴ Mauseganan sik taw nu gsuyu tua Yawi, dewa katanya, sik taw takamaogatun at amatanganan umfaurianan.

¹⁵ At yud e kwa fag ngay taw wa guseganan nu mauri way at fun, kanya fagayu kata way sik tagfangagat fag liun ay tagfangagat fag mela tagrvbvy at fagnangonun.

¹⁶ Sik fun at yud saful gtogdungug gfaidapan way at ngay taw. Ay sik fun nu ddi gfangalabian, ngaduge tua nu gleleg.

¹⁷ Sik taw wa manabayan at amatanganan nu nafamabul way, ay glao nusnga nday yakmay anbul, dewa katanya, lag am ggubuk anya.

¹⁸ Sik taw tagugali sat matuyan, umlangfe siginans faurianan, ay sik taw tagugali sat mauri, gafaurianan wa vtv.

¹⁹ At maleleg nu gfananumun ngayu tua at fakonun, ay sik taw tagfangulan at buknga sat yud e tungkul fag fakamulun, abandi ban umsik yud e kwa.

²⁰ Sik taw nu matuyan tua, ngayuk famonun takadasug sa anya, ay sik taw takaylat vtv karamraman, umfaurianan.

²¹ Wa masine at ke fagfili, dewa katanya, e gfakamulun way at mauri nu e nafon way sik famaylatan sirut.

²² Sik taw tagungitun kaylat vtv karamraman, dewa katanya, at fagnangadasugan sa ways fagidapun.

²³ Sik taw at nasalag at iba, e gfauseganan ban anya gtungud yay nu gfauseganan sik taw at nafamaylatan.

²⁴ Sik taw tagfangkamul at fagtainan at ramraman, ay kanya glong way te, takatanya bunwa asalanan, kanya at mauri way fag ngay taw at fadgaloan.

²⁵ Sik taw tagfangalabian, gfasigad awayan, dewa katanya, sik taw nu gafanud tua sas Yawi mul tua fagmaramramanun.

²⁶ Sik taw tagafanud sat sadili fagmakatuun wa mamatanganan, dewa katanya, sik taw tagugali at ke fagsafulun kalangfe siginans faurianan.

²⁷ Ay sik takamon sat yud e kwa di ban gayudan ay di ban e fagidapun, dewa katanya, at yud ggubuk at yud e kwa, tibak taw lumong sa anya at mauri.

²⁸ Sik tagfangguna nu mauri way, at ngay taw gsuksuan. Ay dewa katanya, kanya nu nbul wan, at matuyan wan fag ngay taw tagfangguna.