Fangatulun 27 - Fanawbuid tagsibaliwas Fakayabian

¹ Lag yap o kamanagsag am fagnamakamulunun ban balabag, aroro yo saful te, katanya ban balabag takadasug.

² Lag o kamatungudun; fabayani wa am ngay iba tagfauseganan emu.

³ Lagnas ay gang kamaslu way, dewa katanya, sik taw at yud e fagsafulun, aksvn yap nu gfae fagidapun.

⁴ Mauri way sik taw tagfangadotama, dewa katanya, tagfangasulup aksvn yap nu mauri.

⁵ Amasine yap sik taw tagsalag tua at yud e suksukan ya, nu gamut yud gfalag te, kesug.

⁶ Am fagadgalangan nu nasalag emu, dewa maidap sa emu, e fanambagun tua. Dewa katanya, sik fawayan at foyungan dewa maylat nu kadungug, wa matuyan.

⁷ Sik taw at napsug wan, wa kaylat ya dewa deut, ay sik taw takalunus, katebo mandi dewa way sik fakonun at mayat.

⁸ Sik taw at nalao siginan at bale, kanya kata sik manuk tungud nu nyayu siginan at fugad.

⁹ Sik langis ay sik famaebebanglu gfae fagusegananun ngay taw, kata kanya at matuyan fag fagadgalangan at fangatulun nu gfae fagmanabayanun.

¹⁰ Lag gfabayan am fagadgalangan, ay anggan am mama at fagadgalangan, laman nu nke fagidapun o, wo nanget ya gubuk sam faduksay tangayayu. Aroro amasine yap nu am fasabale am fagnangetan gubuk, nu gamut sam faduksay tangayayu yay.

¹¹ Ku sisian, sik mamatanganan tuo nangus, nu katanya guseganan ktua, ay mafabalus ktua nusnga sinu tagfapla angku.

¹² Sik taw at mamatanganan gsaruy tua fagmalimuun, ay at yud e fagsafulun gtaglayun way lang, katanya wan at faginfauriananun.

¹³ Nusnga sinu fag taw at nafatuyanan sa emu laman namayad at fagyudun toglag fag taw at bedan, buli siginan anya at lanbung at sadi, laman sik fagsafulan te, namayad ban sa emu.

¹⁴ Nusnga sinu fag taw taguro sat fagadgalangan laman at famakamatoan sis balabag, kanya kata sik faurianan sa anya.

¹⁵ Sik takamawayan fag bubay kata sik ugun taganting gina abagat.

¹⁶ Ay nusnga sinu fag taw we mafaragang anya, kanya kata sik lalab yud kafaragang ay sik mamam famaebebanglu yud kated.

¹⁷ Nu setain sik sanbung nu mafaglat yangay sik sanbung, katanya yangay sik taw gfoyung tua at iba.

¹⁸ Sik taw nu galaga tua sik fun kayu, maon tua ban at rawvg, ay nusnga sinu at nafaning at tagfayafun gfauseganan tua ban anya.

¹⁹ Nu setain sik taw at kamatan nu kalag sis mamam, at amatanganan kalag sit ugali.

²⁰ Faurianan ay fakabulun we fagmanabayanun, katanya yangay taw at algan.

²¹ Sik sanbung salapi ay sik gintu, gfasasad afuy laman katuyan te, o matuyan, ay sik taw kasaful te, matuyan, siginan tibak taw nu gfauseganan anya.

²² Dewa o gugat gfoyung sik yud e fagsafulun fag taw, wo mafafalyam siginan anya at fagyudun e fagsafulun.

²³ Alagai fia fagayu am ngay fagbaugun,

²⁴ aroro ngay ramraman ay fagmafunanun e fakatabuan way.

²⁵ Namul o sik ngay makmak am famaug am ngay fagbaugun, ay kaduge o gfanya ngay makmak nu gdog gtugbung, sai yap sad araw nu namul o.

²⁶ Siginan am ngay tupa at ngay sigyu mawat o ngay lanbung, ay tiba am kambing at nagbulan am famul sik fagtanuman.

²⁷ Nu gbul o susu bilug siginan wan am ngay kambing, laman am fag talananan e famul tuam ay ngay fagayudanun, ay anggan am fagsuguan fag ngay mangena at fagayudanun.