Fangatulun 25 - Fanawbuid tagsibaliwas Fakayabian

Sulumun at ngay Fangatulun Tiba

¹ Katatuy ya Sulumun at ngay fangatulun tiba, talun Uda at fun Esekyas at ngay fagsuguan at nariruk:

² Gfauseganan tam tam Dius, aroro kanya e fagfasuksukun tua, ay gfauseganan tam tam ngay fun, aroro kanya fagayu gfasure kafag ngay masuksuk.

³ Nu setain nu yud e mafasud daga at kabasadan, ay banwa at kaabatan, katanya yangay we taw saful ngay fun at amatanganan.

⁴ Sik taw tagsaful kawat ngay fagagbilugun siginans salapi gbul tua at suglat siginan at fangawat fag salapi, sanya ginan nangawat wan.

⁵ Katanya yangay, aiyani wan ngay taw mauri siginans fun at daga salubangan, laman gtaglayun tua at fagfagtainanan nu manabayan.

⁶ Lag o kamatungudun sas fun, ay lag o gfataip am sadili sa sangay taw at ke fanambagun.

⁷ Amasine yap fun nu glong sa emu te, “Gewan,” nu gamut ro gfapla way emu sit ke fanambagun fag ngay taw at daga salubangan.

⁸ Lag yap vtv nanlong am ngay nalag sas fagfasinean ngay mamalong, aroro setain ro am fakamulun, am iba nu nafapla emu aroro wa matuyan am nalong?

⁹ Nu kauri way o am faduksay, kamatoani yap, ay lag yap vtv glong sam iba sik taw at nalong emu.

¹⁰ Aroro ngay taw ro nu nasaful way, gafaplan ro wo.

¹¹ Nu gelongan nu si tua at matuyan fag buknga, kanya kata sik gintu at masuadan sa sik sanbung salapi.

¹² Takaylat gdungugan, at ke fagsafulun at ngay famalun, gtungud yay ngay sulman ay tiba yak famasine at mawatan siginans gintu.

¹³ At matuyan fag fagfatigwanan gfauseganan tagfafakamulun anya, kata sik marios fag fanginum gina masugba fag buknga.

¹⁴ Sik taw at yud gfafasludan at fatuyanan, kata sik linyabu ay tagmara at yud e arak.

¹⁵ Sik taw nu mafangagwanta tua ay nu gelongan nu malukme tua, kanya mafaylatan way ngay tagfangguna ay anggan ngay taw takamaogatun at amatanganan.

¹⁶ Lag o gfasonun nu ginum o deut, aroro mafangkok ro wo.

¹⁷ Lag o glayun nu gfanlo o sam fasabale, mankuri emu ay kauri wa manga glag emu.

¹⁸ Sik taw nu gfatuyan sat faduksay nu dway matuyan, katanya gfauri way at faduksay kata sik fiso ay sik famalang ay sik godun.

¹⁹ We tungkul sik taw tagafanud sat yud masine fag fagfatigwanan gina gayudan fag buknga; kanya kata way sik taguigan fag bagang ay tagalbi fag darafa.

²⁰ Sik taw tagalubad laman gfasun sik taw takabalu, kanya kata way nu nabul kafag taw at lanbung gina marios, ay kata yangay nu naugwag sanggvtan sat buyu.

²¹ Am fawayan nu kalunus way, fafangoni, ay nu kadanum way, fainumi.

²² Aroro nu nafakamulun tuo katanya, gfapla ro wo anya. Ay Yawi e fon tua emu.

²³ Nu setain sik tagmara nu gfadasug arak gina abagat, katanya yangay sik taw taglong te, at iba mauri way, kanya gfadotama way at iba.

²⁴ Amasine yap tagbanwan gsadilian si sik suluk, nu gamut ro magamut gbanwan si sik mangena takamawayan.

²⁵ At masine fag barita siginan tangayayu fag talun, maylat kata sik taw takadanum nu nainum at marios fag mamam.

²⁶ At matuyan fag taw nu gfadiuganan way at mauri fag taw, kanya kata way sik taglikbug fag bubun ay fag bulbug.

²⁷ Wa masine gfasonun nu ginum deut, ay lag yangay grvbvy ngay taw laman tagfauseganan emu.

²⁸ Sik taw at yud saful gfaragang at sadili, kata sik furuan at alad at kinkiklas wan.