Fangatulun 24 - Fanawbuid tagsibaliwas Fakayabian

-19-

¹ Lag o galabian ngay taw at mauri, ay lag e namatangan at namagadgalangan anya.

² Aroro at ngay amatanganan ay at longan, gfauri way at iba.

-20-

^3-4 Nu mamatanganan tuo, mafalindug way o am bale ay mafasine, ay mafapnu yangay nusnga setaw fag ramraman.

-21-

⁵ Sik taw at ke fagsafulun, e fanambagun tua, laman ro ngay tagfawayan gina gfawayan kaugat yay nu kabitsug,

⁶ aroro gbia tua ngay famalun at fanambagun gina gfawayan. Nu katanya tua, kanya gtuyan te, gbabo ro nu ngayu tua tagfalu anya.

-22-

⁷ At yud e fagsafulun wa makatu kayamag fagmamatanganun, ay nu e mafanud way fag kamatoanan we fagmalongun.

-23-

⁸ Sik taw at amatanganan nu mauri way gugat, sik fagsafulan te, kanya wan at nafae fakasigadan fagmauriun.

⁹ At yud e fagsafulun at ngay algan mauri way, ay fagayu taw kadotama nusnga sinu tagfalingun anya.

-24-

¹⁰ Gina o e fagidapun, way o e fagsegun ya, kanya wan tagfatuyan te, wa maksvn am amatanganan.

-25-

¹¹ Lag o gaduanun gfalangfe at yud e asalanan nu nangafaurianan.

¹² Lag o glong te, “Kwa nasaful at kinfasludan,” aroro Dius saful way am nalong nu matuyan tua ay duan, ay saful way am amatanganan. Ay namon ban sa emu kata am nafakamulun.

-26-

^13-14 Ku sisian, nu setain nu katebo o deut, fakatanyai yangay nu kaylat o fagsafulun. Aroro nu e fagsafulun tuo, mabayan tua sam fagunan fag ngay buknga ay mafabul tuo am ngay fakaylatun.

-27-

¹⁵ Lag o gfaning at mauri fag taw tagfanya laman namawayan ngay taw at matuyan.

¹⁶ Aroro sik taw at matuyan dewa antaygilid fitu ginan, matuyan wan gdog yay kabangkad, ay nusnga setaw fag fagidapun mafataygilid at mauri fag ngay taw.

-28-

¹⁷ Lag o guseganan am fawayan dewa anfaurianan,

¹⁸ aroro Yawi kauri way nu nalag way nu gfanagsag o, ay wa namaurianan am fawayan.

-29-

¹⁹ Lag o gafanawa ay galabian at mauri fag taw,

²⁰ aroro wa ban mabayan sat fagunan ay umkata sik salung at kinrabung.

-30-

²¹ Ku sisian, suyui tua Yawi ay am fun. Lag o gfadgaloan ngay taw takamabo,

²² aroro wo nasaful nusnga setaw ban fag faurianan Yawi ay kafag fun at fagnamadasugun sa takatanya fag ngay taw.

At Famamut fag Fangatulun

²³ Katatuy ya ngay taw at ke fagsafulun at ngay fangatulun: Sik tagwabilug, wa masine nu e fagfili taw.

²⁴ Nu nafalfas way o sik taw ke asalanan, ngay taw kauri ay gfalingun emu.

²⁵ Dewa katanya, nu nafaurianan tuo sik taw at ke asalanan, ngay taw guseganan ay gsuyu tua emu.

²⁶ At matuyan fag ngay famalus sik famasaful te, ggadgalangan.

²⁷ Falganani yap am gamasun, sanya ginan masine wo nangawat am bale.

²⁸ Lag o gfatuyan am iba at mamalong nu dway o fia nasaful, ay lag o gelongan laman nanfamuagan.

²⁹ Lag o glong te, “Namakamulun au kata at nafakamulun sa angku.”

³⁰ Sanya ginan, nadalan au sat momuy ay at yud e fagsafulun fag taw at gamasun,

³¹ ay ku nalag makmak way lang ay dugi, ay at alad anfuan wan.

³² Gina au nalag takatanya, anke amatanganan au te,

³³ Nu gtiug way o lang sirut ay nu gfiangalay way o lang sirut,

³⁴ takadasug sa emu fagidapun, ay wa kae sawad ya si emu am ramraman, kata nu e nafangkamul.