Fangatulun 23 - Fanawbuid tagsibaliwas Fakayabian

-6-

¹ Nu nanfangon way o gfasfuan ngay taw ke fanambagun, dirii tua.

² Nu ngayu way nu kon o, ginanya faragangi tua am sadili.

³ Lag yap vtv kaylat at nafalganan fag fakonun, aroro sik famaylatan way manga emu.

-7-

⁴ Lag o gfaidapan am sadili laman nangaramraman. Faragangi ay amatangani am sadili nu setain at masine.

⁵ Aroro ramraman masakit way nu kamin, kata sik bio taglayugan sis kiwang.

-8-

⁶ Lag o kon ay katebo tagungitun fag taw at fakonun, kanya dewa matebo.

⁷ Aroro takatanya fag taw gulit way fia emu galay o gsamsam. Ay glong te, “Oni way gugat.” Dewa katanya, wa katanya at amatanganan.

⁸ Nu katanya, gfangkok way ro wo fagayu am naon, ay am nafauseganan anya umyud e tungkul.

-9-

⁹ Lag o nanfamoyung sat yud mamatanganan fag taw, aroro wa ro e masuad sa anya am foyungan.

-10-

¹⁰ Lag o nangagbilug at yud e fagtainan ya fag ngay taw at daga, ay lag gfalin at ngay fatuan.

¹¹ Aroro Yawi tua taggubuk ay at namababo anya.

-11-

¹² Dungugani tua tagfoyung emu, laman am ugali matuyan tua.

-12-

^13-14 Lag o gfabayan am sisian nu kamabo. Nu gfakasakan tua nu gfalang o anya, ya kabul, nu bunway namalangfe way o at leleg siginans fakabulun.

-13-

^15-16 Ku sisian, guseganan au nu nke fagsafulun o, ay guseganan kyangay am ngay longan nu sa tua baliwas fagsafulun.

-14-

¹⁷ Lag o galabian tagasalanan, nu bunway suyui tua Yawi kaduge o gleleg.

¹⁸ Nu katanya, mabayan tua ban o, ay umfasludan ban am ngay fakaylatun.

-15-

¹⁹ Ku sisian, dungugani ku foyungan emu. Nangus e fagsafulun tuo ay sa tua nangus at matuyan fag dalan nu glao o.

^20-21 Lag o gfaning ngay taw taginuman ay at mafangkumon. Kanya fagayu gtiug way gugat, ay umsik ngay yud e kwa ban.

-16-

²² Dungugani am fagtainan at ngay foyungan, ay lag gfalingun anya dewa ban anfagtainan.

²³ Ugatani fabanwani si emu at matuyan, ay fagmamatanganun, ay foyungan ay fagtogdungugun. Lag o gfabangsi tuy fagayu sas nusnga setaw.

^24-25 Am ngay fagtainan guseganan nu matuyan tua am ugali ay e fagsafulun, ay kaugat wan am mina.

-17-

²⁶ Ku sisian, dungugani ku foyungan ay faningi tua ku ngay ugali,

²⁷ aroro at takamatugtug fag mangena namafaurianan way emu, kata sik tangabasad ay talay fag alian.

²⁸ Kanya kata sik taw mauri tagsuksuan laman gfanya at fagnamauriun fag taw, ay nusnga sinu fag mangama at nafaylatan anya, gubun at bubay.

-18-

²⁹ Sinu fag taw ke fakabaluun? Sinu fag taw at kinnanad sas awayan? Sinu fag taw takamayud? Sinu fag taw at nabasingan satu ro dewa yay kasaruyan? Ay sinu fag taw at maraska at mata?

³⁰ O nunda bunwa kafag ngay taw takaylat ginum nusnga setaw fag fanlangu?

³¹ Lag o kaylat fanlangu, nu kadama dewa matebo.

³² Aroro gina ro wo galangu, am bilug wa manabayan ya, ay kata sik maganga fag ule nu nagat emu.

³³ Nusnga setaw way lang am lagan, ay anggan am amatanganan wa manabayan ya.

³⁴ Ay nu gamatang o emu, si wo swabilug dagat ay gtaygilidan sis tungud sakayan lino.

³⁵ Sanya ginan, glong o te, “E nafalang angku ay kwa nbaga! Ay e nasuntuk angku, dewa katanya, kwa namatang. Ginain ya ban manga nu kafia ku fagalanguun laman mananginum kyay gdog?”