Fangatulun 22 - Fanawbuid tagsibaliwas Fakayabian

¹ Amasine yap sik ngayan at yud e malong, nu gamut nangae ramraman. Ngay taw nu gsuyu emu, amasine yap tuas sanbung salapi ay gintu.

² Yawi at nawat at maramraman ay at yud e kwa fag ngay taw.

³ Sik taw at mamatanganan gsaruy tua fagmalimuun, ay at yud e fagsafulun gtaglayun way lang, katanya wan at faginfauriananun.

⁴ Nu gsuyu tuo ay kamababaun sas Yawi, e fagmaramramanun ay famauseganan o, ay ngaduge tua ban am leleg.

⁵ At mauri fag taw at dalan sa way at madugi ay ke sangdaw. Ay takesug at leleg, gsaruy tua kafag dalan.

⁶ Foyungi sas sisian at matuyan fag ugali, laman di kalyam dewa anfagtainan.

⁷ At maramraman nafagsuguan at maidap fag ngay taw, ay tagbedan, gafagsuguanan tagfabedan.

⁸ At nafasigad fagmauriun umfaurianan, ay karagang wan nu gfauri at ngay iba.

⁹ Nusnga sinu tagfon tua at fakonun sat yud e kwa fag ngay taw, matuyan, e ggubuk yangay ban anya.

¹⁰ Nu naiyan tuo takamalingun fag ngay taw, umragang wan fakadkaurianun, fagyudun mabayan ay fagawayanun.

¹¹ Sik taw nu matuyan tua at amatanganan ay malukme nu gfakamatoan, takatanya tua fag taw sik fun at fagadgalangan.

¹² Yawi gdiri tua at ke fagsafulun fag ngay taw, dewa katanya, gsalag way ngay taw tagasalanan at algan.

¹³ At momuy fag taw e fanlonganan way gugat, glong te, “E liun sas lod bale ay mafangagat ro.”

¹⁴ At mauri fag mangena nu kamaylatan, kata sik tangabasad fag alian, ay Yawi at fakadotamaun fag ngay taw umtong sanya.

¹⁵ Nu sik sisian yay kamabo yay, dewa katanya, nu nafoyung tuo anya, at ugali umsik matuyan.

¹⁶ Nusnga sinu fag taw tagfon sat maramraman, ay tagfalingun at maidap fag ngay taw laman kaylat kae ramraman, kanya ban umsik yud e kwa.

Tuluk Safuluk Mafanud fag ngay Fangatulun

¹⁷ Dungugani at ke fagsafulun fag ngay taw at foyungan, nu katanya, dungugani tua fia kaduge au gfoyung emu,

¹⁸ aroro tuy at mafae fagmanabayanun emu nu nafasa tuo am amatanganan.

¹⁹ Nafoyung au emu takatanya, laman ban gafanud tuo sas Yawi.

²⁰ Ku rirukan fag tuluk safuluk foyungan, gfon emu fagsafulun ay famalun laman ban am fagnangugaliun.

²¹ Nu katanya, kanya ggubuk emu laman sumaful o at matuyan ay laman mafabalus tuo ngay taw taginto sa emu.

-1-

²² Lag gfalingun at ngay yud e kwa, ay fasinei tua at ngay malong,

²³ aroro Yawi taggubuk tua at ngay yud e kwa.

-2-

²⁴ Lag gfasedsegan sik taw at masakit gfangadotama,

²⁵ aroro mafaning o anya, ay manangugali o kata anya.

-3-

²⁶ Lag o gfatuyanan te, namayad o am iba at bedan,

²⁷ aroro nu dway o nafabayad, anggan am igyan gbul wan.

-4-

²⁸ Lag o gfalin ngay fatuan lutuk am ngay mangaguyang at nafoli.

-5-

²⁹ At ke fagsafulun sas nusnga setaw, at fagnamakamulunan sa tuas fun, bundi sa tibak taw.