Fangatulun 20 - Fanawbuid tagsibaliwas Fakayabian

¹ Tagfasawe nu gmamaman fanlangu, at rawvg kamalingun ay fagyudun manabayan, nu katanya, nusnga sinu fag taw tagmamaman fanlangu, we fagsafulun.

² Sik fun nu kadotama malimu kata sik liun nu gsubang. Ay nu nafauri way o anya, gfabul emu.

³ Tagsaruy at mauri, kanya tagfatoglag at fagmasineun, ay sik yud way e fagsafulun takaylat awayan.

⁴ At momuy fag taw ya gtanum gina fananuman, ay wa ban e fagnanggutluun sis fanggutluan.

⁵ Sik taw wa saful tibak taw at amatanganan, kata tangabasad fag bubun, dewa katanya, sik taw at mamatanganan sumaful tua.

⁶ Ngayuk taw taglong te, matuyan ami, dewa katanya, sinu nunda si anya at matuyan?

⁷ Sik matuyan fag taw di e mauri. Ay at ngay sisian mauseganan tua nu nafaning tua anya.

⁸ Taginsaful nu sik funan way, taguna ginsaful yay te, sinu at ke mamalong.

⁹ Nusnga sinu fag taw we malong lang te, at amatanganan masine, ay di batang gfakamulun at mauri.

¹⁰ Tagsalan fag ngay famabudbungguan ay famasud, gsud way mauri sas Yawi.

¹¹ Sik sisian kalag sit ngay fakamulun te, o matuyan ay o duan.

¹² Yawi wan at nawat tam mata laman glag tam ay tam talinga laman gdungug tam.

¹³ Nu gtiug way o gugat, maidap way ban o, dewa katanya, nu gugatan tuo gfakamulun, di ban o e fagayudanun.

¹⁴ Tagbayad glong te, wa masine am famaloun, laman ro gfabuin at famayad. Dewa katanya, nu nabul wan, guseganan mandi kamatungudun.

¹⁵ Ngayuk gintu ay at mafanud fag ngay gang, dewa katanya, gsadsadian way taw tagaringang at ke fagsafulun.

¹⁶ Nusnga sinu fag taw at nafatuyanan sa emu laman namayad at fagyudun toglag fag taw at bedan, buli siginan anya at lanbung at sadi, laman sik fagsafulan te, namayad ban sa emu.

¹⁷ Sik fangkamulan fag fakonun mataba, dewa katanya, sa oma taguyan at namnam kata ways lagnas.

¹⁸ Fagayu am algan, eti tua famalun, anggan yangay gina o namawayan.

¹⁹ Sik taw nu mabarisan way, glong wan dewa at fagsuksukun fag longan, nu katanya, saruyani takatanya fag taw.

²⁰ Taglong mauri sat ngay fagtainan umbul kata sik salung at kinrabung gina madulum.

²¹ At masakit gbul at fagnangagbilugun ban, sa ban taguyan bunwa sik mauseganan.

²² Lag o gfasud sat nafakamulun sa emu at mauri. Afanudi sas Yawi ay kanya ggubuk emu.

²³ Yawi kadotama ngay taw tagfandaya nu gfabudbungguan. Takatanya fag fakamulun wa masine.

²⁴ Yawi tua at nafalganan tam dalan, nu katanya, wa tam saful sa bans fagunan.

²⁵ Galay o namatuyanan sas Dius, amatangani tua fia, tibaginan ban manga sa taguyan kamayud yay o.

²⁶ Sik fun at ke fagsafulun nu namaurianan wan, ginsaful yay fia te, sinu at nafakamulun mauri, sanya ginan long, namaurianan wan.

²⁷ Yawi kata sik salung gdamlag sa sangay taw at amatanganan.

²⁸ At mafangafanyu ay at matuyan fag fun ngaduge tua nu gfunan.

²⁹ Ngay baguama at fagmasineun siwa at kabitsugan, ay at ngay mafagtainan at fagmasineun siwa at fagmafagtainanun.

³⁰ Ngay fagidapun gfasine antam laman matuyan tua tam.