Fangatulun 19 - Fanawbuid tagsibaliwas Fakayabian

¹ Amasine yap at maidap fag taw nu matuyan tua nu gbanwan, nu gamut sik yud mamatanganan fag taw takamuag.

² Dewa ngap o mabitsug, nu dway o e fagsafulun we tungkul, ay nu mafangabanganan way o, masakit way nu gsalan o.

³ Sik taw at fagyudun e fagsafulun gfauri at sadili, ay arodi kanya namayud Yawi.

⁴ Sik taw at maramraman, ngayu at fagadgalangan, dewa katanya, nu maidap way fag taw, at ngay fagadgalangan gubun anya.

⁵ At yud matuyan fag tagfatuyan umfaurianan, ay takamuag wa kalangfe.

⁶ Ngayu takakbang sat malukme fag funan, ay nusnga sinu fag taw nu kamon tua, ngayu at namagadgalangan.

⁷ Sik taw nu maidap way, at ngay kalongan wa kasalag ya anya, kaugat wan at ngay fagadgalangan. Ay dewa gfagubuk, we kasalag.

⁸ Tagugatan nangae fagsafulun kesug tua at sadili, ay takaylat fagsafulun, manabayan tua nu gbanwan.

⁹ At yud matuyan fag tagfatuyan umfaurianan, ay takamuag, umfaurianan.

¹⁰ Wa masine sik taw at yud mamatanganan nu gbanwan fafaningan sik maramraman, ay kaugat wan nu yud masine sik fagsuguan nu namagtainan sa sangay tagfagtainan.

¹¹ At mafainfanyuan fag aringang famasaful te, e fagsafulun o, ay nu gfawakalong tuo nusnga sinu at nasalan sa emu, gfae fagusegananun emu.

¹² Sik fun nu kadotama way, kata sik liun nu gsubang, dewa katanya, nu mafanggubuk kata damug tagsi sangay tanum.

¹³ At yud mamatanganan fag sisian, gfae fagidapun way at mama, ay sik bubay at mabarisan, kata sik arak at yud kasiwang.

¹⁴ Ngay fagtainan at famonun sat ngay baguama bale way ay ramraman, dewa katanya, sik bubay at mamatanganan siginan tuas Yawi.

¹⁵ Nu momuy way o, ay gtiug gugat, umlunus ban o.

¹⁶ Sik taw tagfaning Dius at ngay suguan ngaduge tua nu gleleg, dewa katanya, at yud gfaning kabul way masakit.

¹⁷ Nu ggubuk tuo at maidap fag taw, kata nu nafaulbus o sas Yawi, ay Yawi ban gfafoli sa emu.

¹⁸ Foyungi am sisian kaduge e buknga, aroro nu dway o nafoyung, o ban at nafaurianan anya.

¹⁹ Lag o ggubuk tagfangadotama fag taw dewa gafaurianan, aroro nu nagubuk ro wo, kanya ban gdog yay nangugali at mauri.

²⁰ Dungugani ay faningi at fangatulun sa emu, ay umdasug ban sik menit, umke fagsafulun tuo.

²¹ Ngayu tam algan, dewa katanya, Yawi tua at fakaylatun takafaning.

²² Masine sik taw nu matuyan tua. Amasine yap sik taw tagidapan, nu ddi ngap kamuag.

²³ Fagsuyuun sas Yawi, at fungfung tangaduge fag leleg, ay gbanwan manabayan kalangfe tua siginans faurianan.

²⁴ At momuy fag taw gfuyut oma at fakonun ay siginan at kamomuyan wa masamsam.

²⁵ Faurii takamalingun, laman fagayu takatanya umke fagsafulun. Ay at ke fagsafulun, umfamut yay at fagsafulun nu e nalong tua.

²⁶ Fangkapla way sik sisian nu gfawayan way at mama ay nu gaiyan way at mina.

²⁷ Ku sisian, nu dway o kaylat gdungugan ku ngay foyungan, umsaruy o foyungan tagfon emu fagsafulun.

²⁸ Takamuag fag tagfatuyan gfayud e tungkul at matuyan, ay at mauri fag taw guseganan nu gfoyung fagmauriun.

²⁹ E faurianan at mafalganan sa sangay takamalingun, ay e famalang at mafalganan sa sangay yud mamatanganan.