Fangatulun 18 - Fanawbuid tagsibaliwas Fakayabian

¹ Takamasadiliun fag taw, masaman way siginans fagngayuan, ay wa gfadiuganan sat matuyan fag ngay amatanganan.

² At yud mamatanganan fag taw wa kaylat nangae fagsafulun, at fakaylatun nusnga setaw wan tagsi at amatanganan.

³ Tagfakamulun fagmauriun ay nusnga setaw at mapla, gfae fakaplaun way.

⁴ At ke fagsafulun fag taw at aringang gfae fagsafulun tibak taw, kata sik liskung nu gfamilugan.

⁵ Wa masine gfadgaloan sik taw at ke asalanan, laman gfasaruyan o am gubuk sat yud e asalanan fag taw.

⁶ Sik taw at yud mamatanganan, at ngay aringang wa matuyan, ay kanya gfae fakadkaurianun way, ay gfae fagidapun at sadili.

⁷ Sik taw at yud mamatanganan, at aringang wan tagfadasug anya sas fagmalimuun ay sas faurianan.

⁸ Sik inasan kata sik fakonun at mayayum nu kaon ay nu kangvp.

⁹ At momuy fag taw kata at takamauri fag taw.

¹⁰ Yawi kata sik bale tangabat ay at mogat, ay at matuyan fag taw at fagnansarirungan gina e malimu.

¹¹ At maramraman fag taw at fagsegun at ramraman ban mafagubuk anya, kata sik maksvn fag alad nu maligung furuan.

¹² Takamatungudun fag taw gfauri way at sadili, dewa katanya, takamababaun gfae fagusegananun at sadili.

¹³ Mapla way sik taw tagbalus vtv si sik kamatoanan deyud nadungug.

¹⁴ Sik taw at ke fakasaitun, nu maksvn tua at amatanganan, gfabitsug tua anya. Dewa katanya, nu dway e fagsegun ya, wa mafangagwanta.

¹⁵ At ke fagsafulun fag taw ay tagsaful gtogdungug, kaugat yay nu kaylat kae fagsafulun.

¹⁶ Sik taw at ke fagmabalyananun, gabanganan namablang nu e gbuba sa anya famonun.

¹⁷ Nusnga sinu taguna gfoyung sik mamalong sas fagfasinean, tibaginan, kata wa nu sia at matuyan, nu dyakmay e nainsaful.

¹⁸ Siginan nu gfafidfilian mafaragang badbaboan, ay mafasadi tagawayan at ngay amatanganan.

¹⁹ Amasakit yap nu nangagbilug sik furuan at mafaligungan alad, nu gamut tagfawakalong sat nafamomuy at faduksay. Nu gfasine ngay badbaboan kaidap yay nu ggatvng sik dingding sakbawan at famalabag.

²⁰ At mamatanganan fag ngay longan gfae fagmabitsugun, kata sik mataba fag fakonun nu gfapsug.

²¹ Sik taw at aringang makatu gfalangfe ay gfabul. Nu katanya, dirii tua nu garingang o, aroro gumutlu ban o kata am ngay nalong.

²² Nu nafamubay ban o, manabayan tuo, ay kanya tagfatuyan sa emu te, Yawi matuyan.

²³ At yud e kwa nu garingang mafainfanyuan tua, dewa katanya, at maramraman nu gbalus, mauri way.

²⁴ E ggadgalangan wa ngaduge, ay e ggadgalangan gtungud yay sik duksay nu ggadgalangan.