Fangatulun 17 - Fanawbuid tagsibaliwas Fakayabian

¹ Amasine yap dewa sik yudu way sirut fag fakonun nu guseganan tua ngap, ay dewa ngap ngayu fag fakonun nu kadkaurian way.

² Sik mamatanganan fag fagsuguan e fagmabalyananun gfangguna at tagfayafun at baguama takamabo, ay umke afud yangay siginan at tagfayafun at ramraman.

³ Sik sanbung salapi ay sik gintu gfasasad afuy laman katuyan te, o matuyan, dewa katanya, tagfaskud sik taw at amatanganan, Yawi wan.

⁴ At mauri fag taw kaylat gdungugan at mauri fag taw at longan, ay katanya yangay sik taw takamuag kaylat yangay gdungugan takamuag fag taw.

⁵ Sik taw nu nafalingun way at yud e kwa, nafalingun yangay at nawat anya fag Dius. Ay sik taw taguseganan tibak taw nu gidapan, kanya ban umfaurianan yangay.

⁶ Ngay fufu gfae fagusegananun sat fufuama ay sat fufuina, ay kabavn ngay sisian at fakamanagsagun at ngay fagtainan tua.

⁷ We tungkul at masine fag ngay longan sa sik taw at yud mamatanganan, ay kaugat wan nu yud e tungkul sik takamuag fag tagfangguna.

⁸ Tagfon sik famaylatan nu gamatangan at fakamulun takatanya, masine, aroro mafafakamulun nusnga setaw.

⁹ Nu gfalyam tuo am iba at asalanan sa emu, kaugat yay nu kedkesugan am, ay nu gfarapyag way o am fagadgalangan at ngay asalanan, takatanya gfasaruayan way ayu.

¹⁰ Ke fagsafulun fag taw gfaning tua dewa sayginan yay nu e gsalag anya, dewa katanya, at yud mamatanganan fag taw, dewa gugat gafalangan wa gfaning.

¹¹ At mauri fag taw kabavn at fagrvbvyun mauri way, nu katanya, namadasug ban sa anya sik taw laman namauri anya.

¹² Amasine yap gfablang sik tagfangagat fag mela, nu gamut sik taw at yud mamatanganan tagfakamulun at mauri.

¹³ Sik taw nu nafasud way at mauri sat nafakamulun sa anya at masine, mauri way ban gugat takadasug sa kafag talanan.

¹⁴ Tagfae awayan kata way sik famalabag mamam at ke sulbung, fauti wan, laman di kabia.

¹⁵ Yawi maksvn nu kauri sik taw tagfauri at yud e asalanan, ay tagfalfas sik taw at ke asalanan.

¹⁶ We masuad dewa e gfoyung sik yud mamatanganan fag taw, aroro ngap wa kaylat kae fagsafulun.

¹⁷ Sik fagadgalangan kesug tua gugat, ay at faginke faduksayun, laman taggubuk anya gina anke fagidapun.

¹⁸ Sik taw tagfatuyanan te, namayad tibak taw at bedan, we fagsafulun.

¹⁹ Sik taw takaylat fagmauriun, kaylat yangay asalanan. Ay takamatungudun, grvbvy faurianan.

²⁰ Sik taw at amatanganan nu mauri way, wa manabayan, ay takamuag, umke fagidapun.

²¹ At yud mamatanganan fag sisian, gfabaluanan way ay gfae yud e fagsegun at fagtainan.

²² Sik taw taguseganan tua gugat, kata sik famafia tagfamanabayan at iba at bilug, ay nu mafabaluanan way gugat, kamomuy way at bilug.

²³ At mauri fag taw gbul famayad laman fagmatuyanun wa kafasludan.

²⁴ At mamatanganan fag taw gugatan tua nangae fagsafulun, dewa katanya, at yud mamatanganan, nusnga setaw way lang at amatanganan.

²⁵ At yud mamatanganan fag sisian, gfae fagidapun way ay gfabaluanan at fagtainan.

²⁶ Wa masine gfaurianan sik taw at matuyan, ay at yud e malong.

²⁷ Sik taw at ke fagsafulun, ay at mamatanganan, di glong nu dway matuyan, ay di gfangabanganan.

²⁸ At yud e fagsafulun fag taw gina maragangan, tibak taw gamatangan te, e fagsafulun.