Fangatulun 16 - Fanawbuid tagsibaliwas Fakayabian

¹ Taw wan tagamatangan nusnga setaw at fagnamakamulunun, dewa katanya, Yawi tua at namafasludan.

² Nu glong tam, fagayu tam fakamulun matuyan, dewa katanya, Yawi way tagsaful tam ngay algan.

³ Fatigwanani sas Yawi fagayu am fagnamakamulunun, ay am ngay algan umfasludan.

⁴ Yawi e algan sat awatan fagayu, anggan at mauri fag ngay taw, nafalganan wan laman ban sas faurianan.

⁵ Yawi maksvn nu kauri fagayu takamatungudun, ay takatanya fag ngay taw umfaurianan.

⁶ Sik taw nu mafangesug tua ay matuyan, Yawi gfalyam at ngay asalanan. Ay nu masuyu tua sa anya, umyayu siginans fagmauriun.

⁷ Nu maylat tua tam sas Yawi, mafalukmeanan tua tam ngay fawayan, laman tam fagadgalangan ban.

⁸ Tam nabul dewa alay way, amasine yap nu siginan tua at masine fag balyawvtan, nu gamut tangayu fag ramraman, ay nu siginan way at mauri fag balyawvtan.

⁹ Taw at algan ngayu, dewa katanya, Yawi tua tagfafasludan.

¹⁰ Yawi tua taggubuk sik fun at ngay aringang, nu katanya, matuyan tua at ngay fangatulun.

¹¹ Yawi wa kaylat ngay taw nu gfandaya way nu gfabudbungguan at ngay famalaoun.

¹² Ngay fun wa kaylat nusnga sinu tagfakamulun at mauri, aroro nu matuyan tua nu gfangguna, gfataglayun tua nu gfunan.

¹³ Ngay fun kaylat tua ngay taw at yud kamuag, ay kesug tua taglong at matuyan.

¹⁴ Sik fun nu ndotama way, tibaginan e kabul fia, nu katanya, ke fagsafulun fag taw gugatan tua gfalukmeanan at fun.

¹⁵ Sik fun di gfabul sik taw nu gfauseganan tua anya, nu bunway at falagan masine tua, kata arak nu gfatugbung tanum.

¹⁶ Amasine yap takaylat kae fagsafulun ay kae fagmamatanganun abat ngate kaylat nangae sanbung salapi ay gintu.

¹⁷ Sik taw tagugali at matuyan, gsaruy tua at mauri, ay tagdiri at sadili, di gdalan sas fagmalimuun.

¹⁸ Sik taw takamatungudun, at fakadasugan sa ways faurianan, ay takadasug sa anya, fagidapun way.

¹⁹ Gtungud yay nu masine nu mabanwan nu masuyu tua, ay magamut at maidap fag ngay taw, nu gamut ngay taw takamatungudun ay gfafudan at ngay nafangkamul.

²⁰ Sik taw nu gdungugan tua nu e gfoyung anya, umkayu at ramraman, ay mauseganan sik taw nu gafanud tua sas Yawi.

²¹ At ke fagsafulun fag taw, katoglag tua te, e fagsafulun, ay nu masine tua at aringang, ngay taw umke fagsafulun siginan anya.

²² Sik taw at ke fagsafulun, manabayan tua ay ngaduge nu gleleg, dewa katanya, nu dway e fagsafulun, gafaurianan way ban.

²³ At ke fagsafulun fag taw, gamatangan tua nusnga setaw at fagnanlongun, nu katanya, ngayuk taw takasaful siginan anya.

²⁴ At masine fag ngay longan kata tua sik deut, kanya gfae fagmanabayanun ay gfabitsug tam bilug.

²⁵ Nu gamatangan o, am faglaoan fag dalan sa tua ro at matuyan, ay aroro mangaro sa ways fakabulun.

²⁶ Fanlunus tagfamatangan taw laman gfakamulun tua.

²⁷ At yud matuyan fag taw at fagamatanganun fagmauriun way lang, ay at ngay longan kata sik afuy nu masugba.

²⁸ Sik taw takamawayan gfasigad awayan, ay gfasaruayan taggadgalangan.

²⁹ Sik taw tagfangauri gfaylatan tibak taw laman gfakamulun yangay at mauri.

³⁰ Saruyani tua sik taw at mafangase ay tagligbat ayu sirut, aroro tibaginan at algan mauri way.

³¹ Mauseganan sik taw at kinfagtainan tua, aroro gfatoglag te, gugali tua gugat at matuyan.

³² Amasine yap at magwanta, nu gamut sik taw at mabalyanan. Ay amasine yap sik taw nu saful tua gfaragang at sadili, nu gamut sik taw at nangagbilug sik furuan.

³³ Ngay taw gfafidfilian laman sumaful at ngay fakamulun, dewa katanya, Yawi tua tagfafasludan.