Fangatulun 15 - Fanawbuid tagsibaliwas Fakayabian

¹ At maranan fag famalus mafafalyam tua at mauri, dewa katanya, at masakit fag famalus fagmauriun way.

² At ke fagsafulun fag taw at aringang gfasaful te, e fagsafulun, dewa katanya, at yud mamatanganan at aringang gfasaful te, we fagsafulun.

³ Yawi glag way nusnga nday fag talun, ay glag yangay at mauri ay at masine fag ngay taw at fakamulun.

⁴ At malukme fag aringang, gfamanabayan tua sik taw at amatanganan, dewa katanya, tagfandaya fag aringang gfauri way taw at amatanganan.

⁵ At yud e fagsafulun fag baguama, wa gdungugan at mama at foyungan, dewa katanya, at ke fagsafulun, gfaning tua at ngay foyungan.

⁶ At matuyan fag ngay taw at ramraman kafamut tua, dewa katanya, at mauri fag ngay taw at ramraman kamin way.

⁷ At ke fagsafulun fag taw, gfafagdaul tua at fagsafulun, dewa katanya, at yud mamatanganan fag taw, wa mafakamulun takatanya.

⁸ Yawi kauri way at mauri fag ngay taw at fanggalangun, dewa katanya, kaylat tua at matuyan fag ngay taw at darangin.

⁹ Yawi kauri way nusnga sinu fag taw at fakamulun nu mauri way, dewa katanya, kesug tua nusnga sinu fag taw tagugatan gfakamulun at matuyan.

¹⁰ Sik taw at yud matuyan, kauri way nu e gfoyung anya, ay sik taw at yud kaylat fangatulun, kanya kabul way.

¹¹ Yawi saful way takafasludan sa sangay kinbul at talun, kaugat wan nu saful tagleleg fag ngay taw at ngay amatanganan.

¹² Takamalingun fag taw wa gasalagan dewa e gsalag anya, ay wa yangay kaylat at ke fagsafulun fag taw at foyungan.

¹³ Sik taw nu manabayan tua, gfangase tua, ay sik taw nu mabaluanan way, anggan at kamatan mabaluanan yangay.

¹⁴ Sik taw tagsaful gtogdungug, kaylat tua nu kafamut at fagsafulun, dewa katanya, at yud mamatanganan fag taw, gugatan yangay sat fagyudun mamatanganan.

¹⁵ Kabavn at yud e kwa gidapan way gugat, dewa katanya, nu saful di guseganan, mabayan tua ro.

¹⁶ Amasine yap sik taw dewa yud ngayu at ramraman nu gsuyu tua Yawi, nu gamut sik maramraman at amatanganan nu dway ngap mabayan.

¹⁷ Amasine yap dewa svran lang at fakonun, tagfangon nu kedkesugan tua, dewa ngap sik yamas ay tagfangon nu gawayan way.

¹⁸ Sik taw at masakit gfangauri, fagsigadan awayan, dewa katanya, at magwanta fag taw gfae fagmanabayanun.

¹⁹ Sik taw nu momuy way gfakamulun, gidapan way ban gugat, dewa katanya, at maleleg fag taw manabayan tua.

²⁰ At ke fagsafulun fag sisian gfae fagusegananun tua at fagtainan, dewa katanya, at yud mamatanganan fag sisian kauri way at fagtainan.

²¹ Sik taw at yud saful gtogdungug, guseganan way sat fagyudun e fagsafulun, dewa katanya, sik taw tagtogdungug, gbanwan tua sat matuyan.

²² Nu dway o get ya fangatulun sabaliwa am ngay algan, umbalu way ban o, dewa katanya, nu ngayu tua tagfalu emu, umfasludan am ngay algan.

²³ Sik taw guseganan at famalus nu matuyan tua, kaugat wan at famalus nu si tua fia at kasakan fag buknga.

²⁴ Ke fagsafulun fag taw nu glao, sa tua sdalan tagsas leleg laman masaruy fakabulun.

²⁵ Yawi grasras takamatungudun at bale, dewa katanya, galaga tua sik fagbubayun at fagbanwanan.

²⁶ Yawi kauri at mauri fag ngay taw at namatangan, dewa katanya, guseganan tua ngay taw at amatanganan nu ddi e malong.

²⁷ Sik taw tagfangalabian, gfae fagidapun way anya talanan. Ay sik taw nu ddi gbul famayad laman nanfandaya, gleleg tua kabavn.

²⁸ At matuyan fag taw, gamatangan tua at fagnanlongun, dewa katanya, at yud matuyan fag taw wa gamatangan ya.

²⁹ Yawi wa ggubuk at yud matuyan fag ngay taw, dewa katanya, gdungug tua at matuyan fag ngay taw at darangin.

³⁰ Sik taw nu manabayan tua, guseganan, ay sik barita nu masine tua nu kadungug, mauseganan.

³¹ Sik taw nu gdungugan tua ngay foyungan sabaliwas fagelelegun, katap te, sik taw at ke fagsafulun.

³² Sik taw nu dway gdungugan fangatulun gfauri way at sadili, dewa katanya, nu gdungugan tua, kafamut at fagsafulun.

³³ Sik taw nu gsuyu tua Yawi, kae fagsafulun, ay takamababaun, e gfauseganan anya.