Fangatulun 14 - Fanawbuid tagsibaliwas Fakayabian

¹ At ke fagsafulun fag mangena, manabayan tua gugat at talanan, dewa katanya, at yud e fagsafulun, wa saful gfangguna at talanan.

² Sik taw tagsuyu Yawi gugali tua at matuyan. Dewa katanya, takauri Yawi wa kaylat way at masine.

³ At yud e fagsafulun fag taw at ngay longan gfauri anya, dewa katanya, at ke fagsafulun at aringang gfoyung tua anya sat matuyan fag ugali.

⁴ Nu dway o e baka laman am fangaradu, wa ban o e faggutluun, dewa katanya, nu e fangaradu tuo ngayu tua am gutluan.

⁵ At matuyan fag tagfatuyan di kamuag, dewa katanya, at yud matuyan fag tagfatuyan kamuag way.

⁶ Takamalingun fag taw, wa kae fagsafulun. Dewa katanya, sik taw tagtogdungug, masakit tua nu kae fagsafulun.

⁷ Lag o gfadgaloan at yud mamatanganan fag ngay taw, aroro wa ban o e nabul nusnga setaw at masine siginan anya.

⁸ Sik taw at ke fagsafulun, saful tua at fagnamakamulunun, dewa katanya, sik taw at yud mamatanganan, gdaya way at sadili.

⁹ At yud e fagsafulun fag ngay taw, dewa nafakamulun at mauri we masuad sa anya, dewa katanya, at matuyan fag ngay taw, kaylat gugali at masine laman gfauseganan Dius.

¹⁰ Sik taw mandi tagsaful at mesa fakabaluun ay at fagusegananun.

¹¹ At mauri fag taw at talanan umsaruayan, ay at matuyan fag taw at talanan umke fagmanabayanun.

¹² Nu gamatangan o, am faglaoan fag dalan sa tua ro at matuyan, ay aroro mangaro sa ways fakabulun.

¹³ Mafasuksuk o am fakabaluun way siginan nu gfangase, dewa katanya nu ntabu nu guseganan, kabalu yay.

¹⁴ Sik taw mul ban nusnga setaw at nafakamulun masine man ay mauri.

¹⁵ Sik taw at yud mamatanganan, gafanud wan fagayu at nadungug, dewa katanya, sik taw tagsaful gtogdungug, gamatangan tua nusnga setaw at fagnamakamulunun.

¹⁶ Sik taw at ke fagsafulun, gdiri tua at sadili ay gsaruy tua fagmauriun, dewa katanya, sik taw at yud mamatanganan wa gdiri ya nusnga setaw at fagnamakamulunun.

¹⁷ Tagfangauri fag taw nu nafakamulun we masuad, ay ngayu takauri tagfandaya fag taw.

¹⁸ Sik taw at yud e fagsafulun, takalag si anya fagyudun way mamatanganan. Dewa katanya, fagsafulun kalag si sik taw tagsaful gfili at matuyan ay at mauri.

¹⁹ At mauri fag taw garungan gfainfanyuan sat matuyan fag taw te, “Afanyui angku.”

²⁰ Wa glayun nu e namagadgalangan sat yud e kwa fag ngay taw dewa at fasabale, dewa katanya, sat maramraman fag ngay taw, ngayu tua at namagadgalangan.

²¹ Takauri at iba asalanan way, dewa katanya, taggubuk at yud e kwa, e ggubuk yangay ban anya.

²² At ke algan gfakamulun at mauri sat iba, asalanan way, dewa katanya, sik taw nu e algan tua at masine sa ngay iba, kanya mafangafanyu tua ay matuyan.

²³ Tagugatan gfakamulun, e fanambagun tua, dewa katanya sik taw nu si way langs nalong, sik tagidapan way ban.

²⁴ Sik taw at ke fagsafulun, at famauseganan anya at fagsafulun wan. Dewa katanya, at yud mamatanganan kafamut way at fagyudun mamatanganan.

²⁵ Sik matuyan fag tagfatuyan, gfalangfe tua tibak taw at leleg, dewa katanya, takamuag fag tagfatuyan, kamuagan way.

²⁶ Sik taw nu gsuyu tua Yawi, e fagmanabayanun tua, ay at talnayan kasun tua.

²⁷ Sik taw nu gsuyu tua Yawi, Yawi gfaduge at leleg ay gfayayu anya siginans fakabulun.

²⁸ Sik fun at fagmabalyananun kalag sit fagfagtainanun fag ngay taw at kayuan, dewa katanya, nu dway ngayu at fagfunanun, gababawan way.

²⁹ Sik taw at magwanta, e fagsafulun, dewa katanya, tagfangauri fag taw gfalag te, we fagsafulun.

³⁰ Nu mabayan tua am amatanganan, mabayan yangay am bilug, dewa katanya, nu gfangalabianun way o, kata nu gfauri o am bilug.

³¹ Tagfalingun at yud e kwa, gfalingun Dius; dewa katanya, takafanyu at yud e kwa, gfauseganan Dius.

³² At mauri fag ngay taw gafaurianan, aroro siginan at fagmauriun, dewa katanya, at matuyan fag taw e fagsarirungan tua gina gakabulun.

³³ Fagsafulun siwas taw at amatanganan, dewa katanya, at yud mamatanganan wa saful sabaliwas fagsafulun.

³⁴ Ngay taw nu matuyan tua nu gbanwan, at talun manabayan tua, dewa katanya, nu nasalanan way, at talun gafaplan.

³⁵ Sik fun guseganan tua at fagsuguan at ke fagsafulun, dewa katanya, kauri way at fagsuguan yud e fagsafulun.