Fangatulun 13 - Fanawbuid tagsibaliwas Fakayabian

¹ At ke fagsafulun fag sisian gdungugan tua at mama at foyungan, dewa katanya, takamalingun fag sisian, wa gdungugan dewa e gfoyung anya.

² Sik taw at longan nu masine tua, umke fagmasineun, dewa katanya, at mauri fag taw kaylat gugat fagawayanun.

³ Sik taw nu madiri tua nu garingang, gdiri tua at leleg, dewa katanya, sik taw nu mabarisan way, gatabanan way sas faurianan.

⁴ At mamomuy fag taw wa mabul at ngay fakaylatun, dewa katanya, at maseganama fag taw, at fagmafabulun gtungud yay at ngay naylatan.

⁵ At matuyan fag taw, kauri tua fakamuagun, dewa katanya, at mauri fag taw, gfakamulun way nusnga setaw at mapla.

⁶ At matuyan fag taw, mabayan tua, aroro at ugali matuyan, dewa katanya, at mauri fag taw, gafaurianan, aroro sat fagmauriun.

⁷ Tibak taw gfalagan te, maramraman, dewa katanya, maidap way, ay e tibak taw gfalagan te, sik maidap way, dewa katanya, maramraman tua.

⁸ Sik maramraman fag taw dewa nagamatan, e famayad tua at famalfas anya, dewa katanya, sik maidap fag taw fangkabat e famayad, we gamatang ya anya.

⁹ At matuyan fag taw at leleg masine, kata sik salung nu gyamag, dewa katanya, at mauri fag taw at leleg, kata way sik salung tagakarabungun.

¹⁰ Fakamatungudunun at fungfung fagawayanun way, ay fagsigadan fagbadbaboanun, dewa katanya, tagdungugan tua ngay foyungan, kanya gfasaful te, kafag taw e fagsafulun.

¹¹ Sik taw at ramraman nu siginan way at nafandaya, masakit way kalyam, dewa katanya, sik taw at ramraman nu siginan tua at nainkidapanan, mauseganan tua.

¹² Sik algan nu dway anfasludan, kamamomuy way, dewa katanya, sik algan nu nfasludan tua, kanya gfabitsug ay gfamanabayan amatanganan.

¹³ Sik taw nu dway kaylat gdungugan foyungan, umfaurianan way ban, dewa katanya, nusnga sinu tagfaning tua, e gfon tua ban sa anya nusnge wain.

¹⁴ Sik taw ke fagsafulun, at ngay foyungan gfae fagmasineun tua anya, ay gfaduge at leleg, ay gfayayu anya siginans fakabulun.

¹⁵ Sik taw tagsaful gtogdungug e gsuyu tua, dewa katanya, takamabo fag taw at fakadasugan sa ways faurianan.

¹⁶ Ke fagsafulun fag taw gina ganamakamulunun, gamatangan tua te, inday at masine ay at yud masine. Dewa katanya, at yud mamatanganan fag taw gfasure te, we fagsafulun siginan at fakamulun.

¹⁷ At mauri fag fagsuguan, gfae awayan, dewa katanya, at matuyan fag fagfatigwanan gfaksvn tua at fagmasadiun sat ngay iba.

¹⁸ Sik taw nu dway kaylat gdungugan foyungan, dumalan fagidapun ay fakaplaun. Dewa katanya, sik taw nu kaylat tua gdungugan foyungan, e gfauseganan tua anya.

¹⁹ Sik algan at kinfasludan, at fungfung fagmanabayanun tua, dewa katanya, sik taw at yud mamatanganan wa gfaragang nu gfakamulun at mauri.

²⁰ Kabavn am fadgaloan nu sik taw tua at ke fagsafulun, umke fagsafulun yangay o, dewa katanya, am fadgaloan nu sik yud way mamatanganan, umfaurianan ban o.

²¹ Takadasug sa sangay tagasalanan faurianan way, dewa katanya, sat matuyan fag ngay taw, gfon ban nusnga setaw at masine.

²² At matuyan fag taw gfagbilug ban at ramraman sat ngay fufu, dewa katanya, at mauri fag taw at ramraman, umfon sat matuyan fag ngay taw.

²³ At yud e kwa fag taw, dewa ngayu at gutluan, bunwa ban sia tagagbilug kanya fagayu, aroro at ibama wa masine at fakamulun sa anya.

²⁴ At mafangesug fag fagtainan gatul tua at sisian, aroro nu kesug tuo am sisian gfoyung tuo at matuyan.

²⁵ At matuyan fag taw e fakonun tua gugat, dewa katanya, at mauri fag ngay taw kabavn kalunus way.