Fangatulun 12 - Fanawbuid tagsibaliwas Fakayabian

¹ Sik taw takaylat gafoyungan, kaylat tua fagsafulun, ay sik taw at yud kaylat gafoyungan, we fagsafulun.

² Yawi guseganan sik taw nu matuyan tua, ay gfaurianan fagayu at ke algan mauri.

³ Sik taw tagfakamulun at mauri wa maksvn at amatanganan, dewa katanya, sik taw at matuyan, maksvn tua at amatanganan, kata sik fun kayu tangabasad at lalid.

⁴ At matuyan fag bubay, maylat tua ay mauseganan sat indugan, dewa katanya, sik bubay at mapla, kata way sik fakasaitun sit indugan at bini.

⁵ Sik taw at matuyan, at ngay algan matuyan tua. Ay at mauri fag taw at fangatulun, kamuag way.

⁶ Sik taw at mauri, at ngay longan kamabul way, dewa katanya, at matuyan fag taw at longan, mafalangfe tua.

⁷ At mauri fag ngay taw umfaurianan ay umkalyam, dewa katanya, at matuyan fag ngay taw at kasugfunanan, wa ban umkalyam kabavn.

⁸ Ngay taw gfauseganan tua sik taw ke fagsafulun, dewa katanya, sik taw at amatanganan nung way kamalingun, mauri way.

⁹ Amasine yap sik taw at yud kadungug dewa katanya mafabayd tua ngap sat fagsuguan, nu gamut sik taw tagfalagan te, e kwa, ay wa ngap e fakonun.

¹⁰ At matuyan fag taw, kesug tua at ngay fagbaugun, dewa katanya, at mauri fag taw madot way dewa sat ngay fagbaugun.

¹¹ At maleleg nu gfananumun ngayu tua at fakonun, ay sik taw tagfangulan at buknga sat yud e tungkul fag fakamulun we fagsafulun.

¹² At mauri fag taw at fakaylatun, fagmauriun way, dewa katanya, at matuyan fag taw, maksvn tua at amatanganan kata sik fun kayu tangabasad nu glalid.

¹³ At mauri fag taw at ngay longan gsangdaw anya, dewa katanya, at matuyan fag taw, gsaruy tua fagmauriun.

¹⁴ Galay ban sik taw mul famonun kata at nalong, kata nu e fanambagun siginan at nafakamulun.

¹⁵ At yud e fagsafulun fag taw nu gamatangan at sadili, matuyan wan, dewa katanya, sik taw at ke fagsafulun, gdungugan tua ngay foyungan.

¹⁶ Sik taw at yud e fagsafulun gfangauri way nu e nafauri wa sirut, dewa katanya, ke fagsafulun fag taw, wa kasalag dewa e gfauri anya.

¹⁷ At matuyan fag tagfatuyan, matuyan tua at ngay longan, dewa katanya, at yud matuyan fag tagfatuyan, kamuag way.

¹⁸ Sik taw tagfangabanganan nu garingang, gfauri way at iba at ngay amatanganan, dewa katanya, at ke fagsafulun fag taw at ngay longan, gfae fagmanabayanun tua at iba.

¹⁹ Kabavn at matuyan fag aringang sanya tua gugat, dewa katanya, fakamuagun kalyam way masakit.

²⁰ Tagamatangan sat mauri, kabavn at algan fandaya way, dewa katanya, sik taw tagfae fagmanabayanun, guseganan tua.

²¹ Di e kadasug at mauri sa sik taw at matuyan, dewa katanya, ngayu takafasludan at mauri sat mauri fag taw.

²² Yawi kauri takamuag fag ngay taw, ay guseganan tua taglong at matuyan.

²³ Sik taw at ke fagsafulun di kamatungudun at fagsafulun, dewa katanya, sik taw at yud mamatanganan wa gadgaragun garingang.

²⁴ At maleleg fag taw umsik tagfangguna, dewa katanya, at momuy fag taw umsik fagsuguan.

²⁵ Fagafanawaun gfae fakabaluun way, dewa katanya, at masine fag aringang, gfae fagmanabayanun tua.

²⁶ At matuyan fag taw ggubuk tua at fagadgalangan, dewa katanya, at mauri fag taw gtaban way sas fagmauriun.

²⁷ At momuy fag taw wa mabul at fakaylatun, dewa katanya, at maleleg fag taw, umramraman.

²⁸ At matuyan fag famanwanun, at fungfung sa tuas leleg, ay gfalangfe emu siginans fakabulun.