Fangatulun 11 - Fanawbuid tagsibaliwas Fakayabian

¹ Yawi kauri sik taw tagfandaya nu gfabudbungguan, dewa katanya, guseganan nu kasakan tua.

² Takamatungudun fag taw, masakit gafaplan, dewa katanya, takamababaun, e fagsafulun tua gugat.

³ Sik taw at matuyan, gbanwan tua sas fagmatuyanun, dewa katanya, tagfandaya fag taw umfaurianan way, aroro wa matuyan.

⁴ Ramraman wa mafagubuk nu si wa sfanginsafulan fag menit, dewa katanya, at matuyan fag ugali, mafalangfe emu siginans fakabulun.

⁵ At matuyan ay at yud e malong fag ugali, tagfae fagmanabayanun nu gbanwan, dewa katanya, at mauri fag ugali, at fungfung sa ways faurianan.

⁶ At matuyan fag taw at ugali, kanya wan tagfalangfe anya, dewa katanya, tagfandaya fag taw, at ngay algan at mauri gfaurianan way anya.

⁷ Sik taw at mauri nu nbul wan, umkalyam wan at fagsegun, ay at ngay algan we masuad ya.

⁸ Dius gfalangfe tua at matuyan fag taw gina e fagidapun, dewa katanya, kanya gfabayan way at mauri fag taw.

⁹ At yud gfaning Dius, gfauri way at iba siginan at ngay aringang, dewa katanya, at matuyan fag taw at fagsafulun gfalangfe tua at ngay iba.

¹⁰ Sik taw at matuyan nu nke fagmanabayanun, ngay taw guseganan. Ay sik taw mauri gina gafaurianan, ngay taw gfanagsag.

¹¹ Ngay taw tagbanwan si sik furuan nu matuyan tua, ngayu tua takadasug sa anya ngay famonun, dewa katanya, kafag furuan umrasras siginan ngay taw mauri at aringang.

¹² Sik taw at yud gtogdungug, gfalingun at iba, dewa katanya, sik taw tagsaful gtogdungug, di kamalingun.

¹³ Ngay taw at mabarisan glong wan dewa at fagsuksukun fag ngay longan, dewa katanya, sik taw at mafatigwananan di glong at fagsuksukun fag ngay longan.

¹⁴ Tagfangguna si sik talun nu dway e fagsafulun, at furuan umrasras, dewa katanya, nu ngayu tua at tagfalu, gbabo tua.

¹⁵ Malimu way nu nafatuyanan way o namayad am iba at bedan, nu katanya saruyi takatanya fag fakamulun laman di o kae fagidapun.

¹⁶ Sik mangena nu masine tua at ugali, mul tua famauseganan, dewa katanya at mauri fag mangama umkapla way. Ay sik taw at momuy gidapan way, dewa katanya, at maleleg, karamraman tua.

¹⁷ Nu kafanyu tuo am iba, manabayan tua ban o, dewa katanya, nu mauri way o, umfaurianan way ban o.

¹⁸ At mauri fag taw wa magbilug at matuyan fag fanggalangun, dewa katanya, at matuyan fag taw, mul tua at matuyan fag fanggalangun.

¹⁹ Sik taw tagfakamulun at matuyan, kadugdug yay at leleg, dewa katanya, tagfakamulun at mauri, kabul way.

²⁰ Yawi maksvn nu kauri at mauri fag ngay taw, dewa katanya, kanya guseganan tua sik taw at yud e malong.

²¹ Sik taw at mauri umfaurianan, dewa katanya, tagbanwan sat matuyan, di gafaurianan.

²² Sik masine fag mangena at yud saful gamatangan, kata sik fanumyu at mawatan siginans gintu, at nafasulmanan sas bumbu at dungus.

²³ At matuyan fag taw at fakaylatun, sa tuas fagmasineun, dewa katanya, at mauri fag taw at fakaylatun fagmauriun way gugat.

²⁴ Takamon fag ngay taw, kaugat yay nu karamraman, dewa katanya, at yud kamon fag ngay taw, umke fagidapun way.

²⁵ Sik taw takamon, mul tua ramraman, ay sik taw at mafanggubuk, e ggubuk yangay anya.

²⁶ Sik taw tagsuksuk at famaloun, ay nu gfalao gina way ngabat nu gfalao, ngay taw kauri, ay dewa katanya nusnga sinu fag taw tagfalao tua at famaloun gina yud bangan e gbul, ngay taw guseganan.

²⁷ Sik taw tagrvbvy at masine, lumag wa fia fagmasineun, ay sik taw tagrvbvy at mauri, lumag fagmauriun.

²⁸ Sik taw tagseg at ramraman, umbalu way, dewa katanya, at matuyan fag taw kata tua sik tanum takabia.

²⁹ Ngay taw yud e fagsafulun at buba sat bale nu fagyudun way mabayan, wa ban e nabul at masine. Ay kanya ban fagayu ngay taw way lang at ke fagsafulun at fagsuguan.

³⁰ At matuyan fag taw magubuk tua at ngay iba, laman gfadugdug at leleg. Ay sik taw tagfalangfe ngayuk taw, e fagsafulun tua.

³¹ At matuyan fag ngay taw at ngay fakamulun ste swa daga gbangsi ban fagmasineun, dewa katanya, sabans taw mauri ay tagasalanan, matuyan gafaurianan way.