Fangatulun 10 - Fanawbuid tagsibaliwas Fakayabian

Sulumun at ngay Fangatulun

¹ Katatuy Sulumun at ngay fangatulun: At ke fagsafulun fag sisian gfae fagusegananun tua at fagtainan, dewa katanya, at yud e fagsafulun fag sisian, gfae fakabaluun way.

² Sik ramraman nu siginan way at mauri fag balyawvtan, wa mafae fagmasineun, dewa katanya, nu matuyan tua am ugali, takatanya gfalangfe tua am leleg.

³ Yawi di gfalunus at matuyan fag ngay taw, dewa katanya, wa gfadiuganan at mauri fag ngay taw at algan.

⁴ Fagmamomuyun gfae yud way e fagekwaun, dewa katanya, at maleleg karamraman tua.

⁵ Tagsaful tua gfungsu sis fanggutluan, e fagsafulun tua, dewa katanya at nafamomuyun, gina fanggutluan, gafaplan way.

⁶ Dius gfon tua sat matuyan fag taw, dewa katanya at mauri fag taw at aringang gfauri way at sadili ay at ngay iba.

⁷ Kabavn at matuyan fag taw kamatang tua, dewa katanya, at mauri fag taw, duan, wa kamatang.

⁸ Sik taw ke fagsafulun, gfaning tua ngay suguan, dewa katanya, tagaringang sas fagyudun e fagsafulun, at fakadasugan sa ways faurianan.

⁹ Sik taw tagugali sat yud e malong, e fagmabayanun tua, dewa katanya, sik taw nu mauri way at ugali, kasaful yay ban.

¹⁰ Tagfandaya fag taw at fagnamakamulunun fagmauriun way, ay sik taw tagaringang sas fagyudun e fagsafulun, umfaurianan.

¹¹ At matuyan fag taw at ngay aringang, e fanambagun tua sat ngay iba, dewa katanya, at mauri fag taw at ngay aringang gfauri way at ngay iba.

¹² Fakauriun, fagsigadan way awayan, dewa katanya, fakesugun mafafalyam tua ngayuk asalanan.

¹³ Sik taw at ke fagsafulun, kabavn at aringang matuyan, dewa katanya, at yud matuyan fag taw at aringang gtaban way anya sas faurianan.

¹⁴ Sik taw at ke fagsafulun kafamut tua at nasaful, dewa katanya, at yud e fagsafulun, glong at mauri ay kadasug sas faurianan.

¹⁵ At maramraman fag taw at fagsegun at ramraman ban mafagubuk tua anya, ay sik taw at yud e kwa, gidapan aroro we ramraman.

¹⁶ At fon sat matuyan fag taw, at mabayan ay tangaba tua fag leleg. Dewa katanya, at fon sat mauri fag taw, faurianan way.

¹⁷ Sik taw nu gdungugan tua nu gfoyung sabaliwa at ugali, mabayan tua ban ay nu gleleg ngaduge, dewa katanya, at yud gdungugan, gfalyam way anya at dalan.

¹⁸ Tagsuksuk at dotama kamuag way, ay takamauri at ngay iba, we fagsafulun.

¹⁹ Sik taw at mabarisan, masakit gsalan siginan at longan, ay at ke fagsafulun, saful tua gragangan.

²⁰ At matuyan fag taw at longan mafanud tua kata sik salapi, ay at mauri fag taw at amatanganan we fanambagun.

²¹ Ngayu tua tagdungugan at matuyan fag taw at aringang, dewa katanya, at yud e fagsafulun umbul, aroro wa gtogdungug.

²² Yawi at famonun fagmaramramanun, ay di gfadasug nusnga setaw fag mabalu.

²³ At yud mamatanganan guseganan way gfakamulun at mauri, dewa katanya, at ke fagsafulun gfanagsag tua at fagmatogdungugun.

²⁴ At mauri fag taw at fakalimuun kafasludan wa fia, ay sik taw at matuyan, magbilug tua ban nusnga setaw at fakaylatun.

²⁵ Sik fulug nu ndasug sat mauri fag taw, kafag taw umbul wan, dewa katanya, at matuyan fag taw kabavn maksvn tua.

²⁶ Sik fagsuguan at momuy nu galongan way gugat at tagfayafun, kanya kata way sik sanggvtan at mafayat bagang, ay kata anus takamaliasun.

²⁷ Sik taw tagsuyu Yawi, ngaduge tua nu gleleg, dewa katanya, at mauri fag taw wa ngaduge nu gleleg.

²⁸ At matuyan fag taw at fagsegun, fagmanabayanun tua, ay at mauri fag taw at fagsegun, wa kafasludan.

²⁹ At matuyan fag taw, nu gfaning tua Yawi at faugali, kanya wan tagdiri anya, dewa katanya, at yud gfaning, umfaurianan way.

³⁰ At matuyan fag taw di gaiyanan siginan at daga, dewa katanya, at mauri fag taw gaiyanan way.

³¹ At matuyan fag taw nu garingang, ngayu tua at fagsafulun, dewa katanya, ggatvng wan takamuag at leplep.

³² Sik taw at matuyan, matuyan tua at ngay longan, dewa katanya, at mauri fag taw at ngay longan, at mauri way.