Fangatulun 1 - Fanawbuid tagsibaliwas Fakayabian

Fangatulun at Kamafanudan

¹ Katatuy Sulumun at ngay fangatulun, fun Dabid at baguama ay taw Israel at funan.

² Siginan ban tuy fag ngay fangatulun, kae fagsafulun ban o, saful ban o gfasine am ugali, ay saful yangay ban o faugali tagfae fagsafulun emu.

³ Ay siginan yangay kanya fag fagsafulun, umsik matuyan o, ay umsine am ngay ugali, ay mafakamulun tuo at kasakan ay at matuyan.

⁴ Ay kanya fag foyungan gfae fagsafulun sa sangay taw at yud e fagsafulun, ay gfoyung yangay sa sangay baguama ay baguina laman sumaful sabaliwa at matuyan.

⁵ At ke fagsafulun fag taw nu gdungugan tua at ke fagsafulun at foyungan, kafag taw kafamut at fagsafulun, ay at ke nagadalan, kafamut tua at ngay fagsafulun,

⁶ ay umyamag yangay ngay fangatulun ay faydayuanan at masuad, ay at ngay ke fagsafulun at ngay fagintoun at masuksuk.

⁷ Nu kaylat o kae fagsafulun, suyui tua Yawi. Ay dewa katanya, sat yud e fagsafulun, we fanambagun sa anya fagsafulun ay wa yangay kaylat gafoyungan laman at ugali umsine.

Foyungan laman Gsaruy at Mauri fag Taw

⁸ Ku sisian, dungugani am ngay fagtainan nu gfoyung ay nu gturun emu sat matuyan fag ugali,

⁹ aroro kanya ban gfon emu sik fagusegananun kata sik sangbo at mawatan siginans barugwak ay kata sik dalag nu mafasine emu.

¹⁰ Ku sisian, lag galoan ngay taw mauri at famaylatan.

¹¹ Lag o nangalo kanya fagayu dewa glong te, “Gewan, aloi emi! Namanya watam ay namabul tam nusnga sinu fag taw tam nalag deyud e nafakamulun at mauri.

¹² Dewa at masisian gfabul wa ro tam, laman kafagayu umkata ngay taw at nalao sat mabulan fag ngay taw at fagfolian,

¹³ laman mafabul tam at ngay ramraman ay namapnu tam tam ngay mesa bale tam ngay nabul fag ngay ramraman.

¹⁴ Gewan, nangafud watam tam ngay nabul.”

¹⁵ Ku sisian, lag o nangalo kanya fagayu, abat ngate, saruyani yakman.

¹⁶ Aroro kanya fagayu masakit nu gfakamulun at mauri, ay nu gfabul taw.

¹⁷ We masuad sik sangdaw, at fagnanggamatun fag manuk tungud nu glag way, nu kawat kafag fanggamat.

¹⁸ Manuk tungud saful way te, kasangdaw ro. Dewa katanya, ngay taw mauri wa saful te, sia yay ban at nangafaurianan sat ngay nafakamulun.

¹⁹ Katanya yangay ban takadasug sa sangay taw at ramraman nu siginan way at nafangkamul. Kanya ban fagayu umbul kata yangay at nafakamulun.

Famararang sat yud Kaylat Fagsafulun

^20-21 Fagsafulun kata sik takamoyung gfoyung sa sangay dalan, ay sas fagaweanan, ay sas furuan daul ngay taw at fagnamalaoan ay fagnamulan nusnge wain, ay sa sangay furuan daul at sakbawan, ay kanya glong te,

²² “Am fag ngay taw at yud e fagsafulun, seduge ya ban nu katanya am gugat? Ay am fag ngay taw takamalingun, seduge ya ban nu kamanagsag am kamalingun gugat? Ay am fag ngay taw at yud mamatanganan, seduge ya ban nu yud am kaylat fagsafulun?

²³ Dungugani ku foyungan ayu fag ngay fansalag. Glong au sa ayu nusnga setaw tagsi ku amatanganan. Ay glong kyangay ku fakauriun tagsi ayu,

²⁴ gina au guro, wam nafandungug ku ngay famalun ay ku ngay fansalag,

²⁵ ay wam yangay nafae masuad ku fansalag ayu fag ngay fangatulun.

^26-27 Gina ban am gafaurianan, kase kban ayu, ay nu ndasug ban sa ayu ngay fagidapun ay nusnga setaw at malimu kata sik tagridribudan fag tagmara ay sik fulug, gfalingun kban ayu.

²⁸ Ay gina ban am guro angku, kwa ban gbalus ayu. Grvbvy ban am angku, dewa katanya, wa ban am lumag.

²⁹ Aroro wam kaylat gfayfoyung, ay wam gsuyu Yawi.

³⁰ Ay wam naylat ku ngay fangatulun sa ayu, ay ankuri wayam ku ngay foyungan fag fansalag.

³¹ Nu katanya, umdasug ban sa ayu fagidapun, aroro mauri way ay fakamulun anggan ay ngay algan.

³² Aroro tagfabul at yud mamatanganan fag ngay taw at fakamaboun wan, ay tagfaurianan ngay taw at yud e fagsafulun, at fagyudun wa gfae masuad.

³³ Dewa katanya, takaylat gdungugan angku, gbanwan tua manabayan, ay kalangfe tua siginans fagidapun, ay di e fakalimuun ya.”