Fakasigadan 8 - Fanawbuid tagsibaliwas Fakayabian

Lino nu Kalay

¹ Dius di nalyam Nui fag talanan ay anggan ngay mangilafang sisad sakayan lino. Ay kanya nafadasug sik tagmara, ay lino sas fagdaul daga kalay wan.

² Ay kanya nafaut ngay bulbug, ay nafaragang nu karak.

³ Lino gtaglayun nu kalay kaduge sadik sandan limak safuluk menit.

⁴ Ay gina sis falabi fituk menit sis fafituk magdanun, sakayan lino antungkud sis Buksul Ararat.

⁵ Ay lino gtaglayun nu kalay. Ay sis fasafuluk magdanun taguna fag menit, ansure wan ngay tungud buksul.

⁶ Nu nlangfe ufatk safuluk menit, Nui naluang sakayan lino at fagbanawanan,

⁷ ay nafalfas sik ugak. Kanya gfoyfolian glayugan yakmay lino anlanggang.

⁸ Ay Nui nafalfas yay fia sik labikung laman ginsaful te, o lino ankalay wan.

⁹ Ay dewa katanya, kafag labikung ye fagnangafunan aroro lino gsuklub yay fagdaul daga. Nu katanya, labikung anfoli yay sas sakayan lino. Nui nafalugde at take ay labikung naafun ay nasakbo wan.

¹⁰ Ay Nui nafanya yay fituk menit ay nafalfas yay gayvd labikung.

¹¹ Ay nu nyabi wan, labikung anfoli ay e tangagan sik don melo. Ay Nui nasaful te, lino anlanggang wan.

¹² Ay Nui nafalangfe yay fitu ya gayvd kmenit, ay sanya ginan nafalfas yay gayvd labikung, ay wa nfoli ya.

¹³ Gina Nui at banwa unumk sandan sadi, gina taguna fag magdanun, sis fasadik menit, lino anlanggang wan. Nui naluang sakayan lino at fagbanawanan ay nalag te, daga marugme yay.

¹⁴ Ay nu siwas faduak safulu e fituk menit sis faduak magdanun, daga matat wan.

¹⁵ Ay Dius nalong sas Nui te,

¹⁶ “Fagayu am duksuni wan siginans sakayan lino, o ay am mangena ay am ngay baguama ay anggan am ngay nugang.

¹⁷ Ay faduksuni yangay fagayu mangilafang laman nangayu ay nangarapyag sas fagdaul daga.”

¹⁸ Nu katanya, Nui naduksun gasfuan at mangena ay at ngay baguama ay anggan at ngay nugang.

¹⁹ Ay nafaduksun yangay fagayu mangilafang: taglao, taglayug, tagalafang, ay galay sik mangilafang gadgaloan at mesa gaban.

Nui Nafon sik Fanggalangun

²⁰ Ay Nui nawat fagirugan fanggalangun laman sas Yawi. Sanya ginan, kanya nabul ngay mangilafang at masine ay anggan yangay manuk tungud at masine, ay nairug sas fagirugan laman at fanggalangun sas Yawi.

²¹ Ay Yawi nu nayuk kafag fanggalangun at anus, nalong te, “Kwa ban gfadog ya gfaurianan daga aroro sas taw at nafakamulun, dewa au nasaful te, taw at ngay amatanganan kabavn mauri way siginan nu masisian. Kwa ban gfadog ya gfamin fagayu tagleleg, kata ebi ku nafakamulun.

²² Kaduge ban e fagdaul daga, di ban karagang nu e fananuman, ay nu e fanggutluan, ay nu e marios, ay nu e maroy, ay nu e abagat ay nu e mangune, ay anggan nu e menit ay nu e yabi.”