Fakasigadan 7 - Fanawbuid tagsibaliwas Fakayabian

Nu Glugwak

¹ Ay Yawi nalong sas Nui te, “Am fag talanan, sakboi wan sa ay nawat fag sakayan lino. Aroro katsi fag kasugfunanan, o way lang ku nalag at matuyan.

² Fasakboi galay fituk dadwa magup ay mela at masine. Ay galay sik mangilafang at yud masine sadi yakmank dadwa.

³ Ay fasakboi yangay fituk dadwa manuk tungud laman gleleg tua ban sas fagdaul daga.

⁴ Aroro nu nlangfe ban fituk menit siginan katsi, gfarak kban sas fagdaul daga kaduge ufatk safuluk menit ay ufatk safuluk yabi, laman namamin fagayu ku nawat tagleleg tagsis daga.”

⁵ Ay Nui nafaning Yawi at ngay suguan.

⁶ Nui at banwa unumk sandan gina lugwak kadasug sas fagdaul daga.

⁷ Ay Nui nasakbo sas sakayan lino gadgaloan at mangena, ay at ngay baguama, ay anggan at ngay nugang, laman di ban kabul sis lugwak.

^8-9 Kata Yawi at suguan sas Nui, kanya nafasakbo sas sakayan lino fagayu mangilafang at masine, ay anggan at yud masine: tagalafang, taglayug, taglao, ay kanya fagayu nanangalo anya.

¹⁰ Ay nu nlangfe fituk menit, gfasigad wan nu glugwak sas fagdaul daga.

¹¹ Ay gina sis falabi fituk menit sis faduak magdanun, maksvn nu karak ay fagayu bulbug nasawe. Ginanya, Nui at banwa unumk sandan.

¹² Ay karak maksvn sas fagdaul daga kaduge ufatk safuluk menit ay ufatk safuluk yabi.

¹³ Ay ginanya fag menit, Nui nasakbo wan sas sakayan lino gadgaloan at mangena ay at ngay baguama Sem, Kam, ay Afet, ay anggan at ngay nugang.

¹⁴ Ay ngay magup ay mela taglao, tagalafang, ay taglayug galo anya.

^15-16 Nui nafasakbo galay sik dadwa mangilafang sas sakayan lino kata Dius at suguan sa anya. Sanya ginan, Yawi nadingding wan sakayan lino at sakbawan.

^17-18 Ay gtaglayun nu karak kaduge ufatk safuluk menit. Ay mamam gtaglayun nu kabia ay sakayan lino ankabat.

¹⁹ Ay gtaglayun nu kabat yakmay nasakfo fagayu buksul tangabat.

²⁰ Ay mamam at kabasadan ufatk dufa siginan tangabat fag buksul.

²¹ Ay fagayu tagleleg sas fagdaul daga anbul wan: taglayug, tagsis talun fag ngay mangilafang, tagalafang ay anggan fagayu taw.

²² Fagayu tagleleg sis tungud daga anbul wan.

²³ Fagayu tagleleg sis fagdaul daga dewa taw, taglao, tagalafang ay manuk tungud namin wan. Nui way lang fag talanan at kinsawad fag ngay taw.

²⁴ Nalugwak sas fagdaul daga kaduge sadik sandan limak safuluk menit.