Fakasigadan 41 - Fanawbuid tagsibaliwas Fakayabian

Use Nafayamag Igiptu at Fun at Taginfan

¹ Ay nu nlangfe duak banwa, Igiptu at fun nataginfan, kanya unu malindug sis tigyangan Liskung Nilu.

² Sit taginfan masakit ansure fituk baka mataglu ay masine mandi nu kalag ay gundaud siginan sad liskung gfangonan makmak.

³ Ay arodi vtv, ansure yangay fia fituk baka maniwang ay at yud masine nu kalag.

⁴ Ay at maniwang ay at yud masine nu kalag fag ngay baka naon at mataglu fag ngay baka. Ay Igiptu at fun anfulo wa vtv.

⁵ Ay Igiptu at fun anke taginfan ya gayvd. Ay sit taginfan, kanya nalag fituk raug ke bilug siginan sik bilugan.

⁶ Ay sanya ginan, ansure yangay fituk raug yud e bilug at kinkitut aroro siginan at masugba fag tagmara tagsiginans fakamenitan.

⁷ Ay at yud e bilug fag fituk raug naon wa vtv at ke bilug fag fituk raug. Ay Igiptu at fun anfulo wa vtv. Nu glong kanya matuyan wan ay aroro mangaro taginfan way.

⁸ Ay balabag di, Igiptu at fun at amatanganan wa manabayan aroro siginan at nataginfan. Ay kanya nafauro fagayu taw tagsaful gfasure at ngay madulo ay ngay taw at ke fagsafulun sis talun Igiptu, dewa katanya, we nafafayamag at taginfan at masuad. Ay kanya nafoyung yangay at taginfan sa sangay taw, dewa katanya, wa yangay mafafayamag at taginfan at masuad.

⁹ Ay sanya ginan, tagfangguna tagtalin fanginum ankakbang sas Igiptu at fun ay glong anya te, “E kurang au daul sa emu. Katsi yay nu gamatang au.

¹⁰ O nunda ebi wo ndotama angku ay anggan takamatama tinapay, ay nafaubung o emi sas fun tagulit at bale?

¹¹ Sik yabi, mesa ami e taginfan, ay saman at masuad.

¹² Ay sanya e ufud ami sik baguama, fag taw Ebreu, tagulit fun at bale daul at fagsuguan. Nafansulit ami em mesa taginfan sa anya ay kanya nafayamag em taginfan at masuad.

¹³ Ay matuyan at foyungan sa emi. Nafafoli wo fia angku sa ku fanambagun ay nafarabing wo fia sas kayu kafag takamatama tinapay.”

¹⁴ Ay Igiptu at fun nafauro wa vtv Use, ay nafalfas siginan sad ubung. Ay Use nu naufo wan at umi ay natubus at lanbung, nalao wan sas Igiptu at fun.

¹⁵ Ay Igiptu at fun nalong sa anya te, “E taginfan au ay we mafafayamag at masuad. Ay e nafansulit sa angku te, saful o gfayamag ngay taginfan at masuad.”

¹⁶ Ay Use gbalus te, “Mesug fag fun, bunwa au, nu bunway Dius tua tagfon angku famayamag ngay taginfan at masuad, laman sa am fagmasineun.”

¹⁷ Ay Igiptu at fun nafoyung at taginfan sas Use. Kanya nalong te, “Malindug au unu sis tigyangan Liskung Nilu.

¹⁸ Ay masakit ansure fituk baka mataglu ay at masine mandi nu kalag gundaud siginan sad liskung gfangonan makmak.

¹⁹ Ay arodi vtv, ansure yangay fia fituk baka maniwang ay at yud masine nu kalag. Kwa batang glag baka sas fagdaul talun Igiptu takatanya nu kalag.

²⁰ Ay kafag ngay baka at maniwang at yud masine nu kalag, naon at naguna ansure fag fituk baka mataglu.

²¹ Ay dewa katanya, dewa naon, kata way nu yud e naon aroro maniwang way gugat. Ay anfulo kwa vtv.

²² Ay nadog kyay natiug ay nataginfan kyay fia. Ay nalag au fituk raug ke bilug siginan sik bilugan.

²³ Ay fitu yangayk raug yud e bilug ansure sanya ginan yay fia fag bilugan. Sik masugba fag tagmara siginans fakamenitan nafaitut kafag fituk raug.

²⁴ Ay at yud e bilug fag raug naon at ke bilug fag fituk raug. Ay nafoyung koma ku taginfan sa sangay tagsaful gfasure at ngay madulo, ay nusdi sadi we nafafayamag angku at masuad.”

²⁵ Ay Use nalong sas Igiptu at fun te, “Mesug fag fun, am taginfan fagdua katanya yay at masuad. Dius ban gfasure sa emu at fagnamakamulunun kata am ngay taginfan.

²⁶ At mataglu fag fituk baka ay at ke bilug fag fituk raug at masuad gsud yay fituk banwa.

²⁷ Ay at maniwang fag fituk baka at yud masine nu kalag, ay at yud e bilug fag fituk raug at masugba fag tagmara siginans fakamenitan baliwa at nafaitut, at masuad fituk banwa ban nu malunus.

²⁸ Mesug fag fun, kata ku longan emu, Dius gfasure sa emu at fagnamakamulunun ban.

²⁹ Takadasug ban fag fituk banwa, ngayu ban fag fakonun sas fagdaul talun Igiptu.

³⁰ Ay at fadogan ban takadasug fag fituk banwa maksvn nu malunus, at kaksvnan ban fagayu taw wa gamatang ya ebi ataw fag ngay fakonun at nadalan sis talun Igiptu.

³¹ Maksvn ban daul fag fanlunus takadasug kata ban nu yud e fakonun ya sis talun Igiptu.

³² Mesug fag fun, dua ginan o gtaginfan, laman sumaful o te, Dius nafafalganan takadasug ban, ay gakafasludanun wan takatanya.

³³ “Mesug fag fun, at masine filii sik taw ke fagsafulun ay at makatu ban gfunan talun Igiptu.

³⁴ Ay filii yangay sik ngay fagsuguan sas fagdaul talun Igiptu laman namaful siginan sangay taw at falimak afud at gutluan kaduge fituk banwa gina ngayu at fakonun.

³⁵ Ay kaduge yud gayudan, kanya fag ngay taw namaful ngay gutluan ay gfaulit sas furuan siginans fun at fagmabalyananun, laman ban at fakonun.

³⁶ Kanya ban fag ngay fakonun laman sa sangay taw sa takadasug ban fag fanlunus daul fag fituk banwa sis talun Igiptu, laman ban fagayu taw e fakonun tua.”

Nafili Use Tagfunan Talun Igiptu

³⁷ Igiptu at fun ay at ngay tagfakamulun naylat Use at longan.

³⁸ Ay kanya nalong sat ngay fagsuguan te, “Watam e nalag tibak taw takata Use, Dius at Falad tagsi anya.”

³⁹ Ay Igiptu at fun nalong sas Use te, “Aroro Dius nafoyung emu takatanya fagayu, we tiba yak taw ke fagsafulun ay at mamatanganan takata emu.

^40-41 Ay katsi, gfili au emu tagfunan ban ku ngay taw sas fagdaul talun Igiptu, ay kanya ban fagayu gfaning am suguan. Ay dewa katanya, au, gtungud ktua emu.”

⁴² Ay Igiptu at fun nabul wa vtv siginan at sumyu at fanriruk fag fanumyu ay nafasulun sas Use at sumyu, ay nafaelanbung anya sik lanbung at mawatan siginan at masine fag ramit, ay nafadalagan anya sik dalag at mawatan siginans gintu,

⁴³ ay nafagbilug sas Use at sadi at kabayu ke faguyudan, ay e sik ngay taw sit fagunan taguro te, “Fauseganani tam fun.” Ay Use gfasigad gfunan fagdaul talun Igiptu.

⁴⁴ Ay Igiptu at fun nalong yay fia sas Use te, “Au tua talun Igiptu at fun, ay nute ban we taw mafakamulun nusnge wain nu dway o nasugu.”

⁴⁵ Ay kanya nafangayan Use te, Safenat-Panea, ay nafafamubay Use sas Asenat, Putifera fag tagfon fanggalangun at baguina siginans furuan daul Un. Ay Use wan tagfunan sas fagdaul talun Igiptu.

⁴⁶ Kanya tuluk safuluk banwa nu gfasigad ggubuk Igiptu at fun. Ay kanya nalao siginans Igiptu at fun at akbang ay anfagdaul talun Igiptu.

⁴⁷ Ay kaduge fituk banwa ngayu tua at gutluan sas fagdaul talun.

⁴⁸ Ay ginanya fag ngay buknga, Use nafafungsu fagayu at kinful siginan at gutluan. Ay siginan sangay ligung fag ngay furuan at gutluan, kanya nafafungsu sas furuan ayu daul at bale fagfungsuan.

⁴⁹ Ay at nafaful fag ngay gutluan ngayu tua, kayu lagnas sis tigyangan dagat, ay at kayuan wa mafatap ya.

⁵⁰ Ay nu gakakbangun wan fanlunus, Use at mangena Asenat anke sisian duak munama. Asenat at mama, Putifera fag tagfon fanggalangun sis furuan daul Un.

⁵¹ Ay Use nafangayan taguna at ngenge te, Manase, ay nalong te, “Aroro siginans Dius at gubuk, nalyam wan ku ngay fagidapun ay ku fakabaluun sabaliwa ku mama.”

⁵² Ay nafangayan yangay at fadua at ngenge te, Efraim, ay nalong te, “Aroro siginans Dius at gubuk, e kwa ktua gugat sis talun nu inda nu kae fagidapun au.”

⁵³ Antabu wan fituk banwa nu ngayu at faggutluun sis talun Igiptu.

⁵⁴ Ay andasug wan kafag fanlunus daul fag fituk banwa kata Use at longan ebi. Ay si way langs talun Igiptu at ke fakonun.

⁵⁵ Ay nu ndasug tibak buknga anggan yangay tagbanwan sis talun Igiptu kalunus wan. Nu katanya, sanya fag ngay taw nanget fakonun sas Igiptu at fun. Ay Igiptu at fun glong sanya fag ngay taw te, “Loi sas Use, ay kanya wa ro taglong ayu nusnga setaw ay fagnamakamulunun.”

⁵⁶ Ay dewa nday fag talun kalunus. Ay Use nafafaluang wan sa sangay furuan at ngay fagfungsuan gutluan ay nafalao fakonun sa sangay taw Igiptu.

⁵⁷ Ay arvs fagayu talun at ngay taw nalao sas Igiptu laman namayad fakonun sas Use aroro nusnga nday maksvn wan nu malunus.