Fakasigadan 27 - Fanawbuid tagsibaliwas Fakayabian

Isak Nafadante Akub

¹ Isak mafufuama wan ay arvs wa glag ya. Sik menit, nauro Isaw te, “Faglon.” Ay Isaw nabalus te, “Nataw, ste au mama.”

² Isak nalong te, “Mafufuama kwan ay wa glugo ya, kabul kwan.

³ Namul o am godun, ay loi sas talun ay nanggamat o sik mangilafang laman sa angku.

⁴ Ay fatamai kata ku fakaylatun nu mafataman, ay bubai wa vtv stae laman kon au. Nu ntabu kro kon, gfadante au emu aroro wa ban glugo ya nu gleleg au.”

⁵ Gina Isak gfakamatoan Isaw, Rebeka gdungugan. Ay Isaw nu nalo wan laman nanggamat sik mangilafang,

⁶ Rebeka nalong sat baguama Akub te, “Nadungug au am mama nu glong sam kaka Isaw te,

⁷ ‘Bubai sa angku sik mangilafang ay fatamai wa vtv kata ku fakaylatun nu mafataman. Ay nu naon kro, gfadante au emu sis Yawi at daga salubangan gina kyay gleleg.’

⁸ Nu katanya, faningi ku suguan emu.

⁹ Loi sa tam ngay fagbaugun ay namul o duak kambing riangan at mataglu, ay namatama kro kata am mama at fakaylatun.

¹⁰ Ay bubai ro sa mama, ay nu naon ro, kanya gfadante emu gina yay gleleg.”

¹¹ Ay Akub nalong sat mina te, “Nasaful wo, ku kaka sik tagasigyuun tua ay au, duan.

¹² Ku mama ro nu nated angku sumaful ro te, gdaya kway anya, ay kauri way ro angku abat ngate, gfadante angku.”

¹³ Ay Rebeka nabalus te, “Ngenge, angku wa ro at fagfauriun nu kauri way ro emu, ku fakaylatun faningi ku suguan emu. Loi wan ay bubai sa angku sik kambing.”

¹⁴ Akub nabul duak kambing at mataglu ay nabuba sat mina, ay Rebeka nafatama kata Isak at fakaylatun.

¹⁵ Nu nafalganan wan fagayu, Rebeka nabul Isaw at lanbung at masine ay nafasulun sas Akub.

¹⁶ Nafasa yays Akub at take ay anggan sat liug balat kambing, aroro sanya we sigyu.

¹⁷ Sanya ginan, Rebeka nafon sas Akub at nafatama fag fakonun ay tinapay.

¹⁸ Ay Akub nabuba sat mama kafag ngay fakonun ay nalong te, “Mama.” Isak nalong te, “Ay sinu o ku baguama?”

¹⁹ Ay Akub nabalus te, “Au Isaw am faglon. Nafakamulun kwan am suguan angku. Malunggungi wan ay oni wan ku nagamat fag mangilafang ay nu ntabu ro wo kon, fadantei wa ro angku.”

²⁰ Isak nalong te, “At kasakit nu ggamat o tuy.” Ay Akub nabalus te, “Yawi am Dius nagubuk angku.”

²¹ Ay Isak nalong yay fia te, “Akbangi fia stae, gted au emu laman sumaful au te, o wan Isaw.”

²² Nu katanya, Akub ankakbang, ay at mama nated anya ay glong te, “Am aringang kata ways Akub, ay nute am kabilugan kata wa fias Isaw tagasigyuun.”

²³ Isak wa nasaful te, kanya mangaro Akub aroro at kabilugan gasigyuun kata Isaw. Ay nu namadante wan,

²⁴ Isak nainto yay fia te, “O anud o wan Isaw?” Ay Akub gbalus te, “Sabv, au wan.”

²⁵ Isak nalong te, “Kin, agvd, bubai stae am nagamat ay am nafatama fag fakonun, ay nu ntabu kwa ro gfangon gfadante kwan emu.” Nu katanya, Akub nafon at ba fakonun ay at ba fanginum at malangu ay Isak nafangon wan ay nainum.

²⁶ Ay nu ntabu, Isak nalong anya te, “Wainyayo, akbangi sa angku ay ugwani angku.”

²⁷ Akub ankakbang ay naugwan at mama, ay Isak nu nayuk Akub at lanbung, gfadante wa vtv anya ay glong te, “Ku baguama nu kayuk kata yay Yawi at nafadante fag gamasun.

²⁸ Dius ban nangus gfon emu tagsiginans banwa fag damug laman ban am gutluan ngayu tua gugat, ay laman ban kasakan am fakonun ay am fanginum.

²⁹ Ay gfagsuguan ban o nangus ngayuk gaban taw ay kanya ban nangus fagayu gfaning emu. Gfunan ban o nangus am ngay kalongan ay kanya ban fagayu tumoglag emu. Nusnga sinu ban at nafauri emu e gfauri yangay ban anya, ay at nafadante emu e gfadante yangay ban.”

³⁰ Ay Isak nu nafadante wan, Akub nalo wa vtv. Ay Isaw andasug siginan at fagnanlafatan.

³¹ Ay kanya nafatama yangay at mataba fag fakonun ay nabuba sat mama ay nalong te, “Mama malunggungi wan ay oni ku nafatama ku nagamat ay fadantei ro angku.”

³² Isak nainto te, “Sinu o?” Ay Isaw gbalus te, “Au am faglon Isaw.”

³³ Isak nu nadungug, nafatadtaruyan glong te, “Sinu way manga aro at nagamat ay at nabuba sa angku fakonun? Nafangon kwan aro gina o gakadasugun. Ay nafadante kwan anya ay kwa mabul ya.”

³⁴ Ay Isaw nu nadungug takatanya, maksvn nu gwayway ay nalong te, “Mama, fadantei yap anggan angku.”

³⁵ Nu katanya, Isak nabalus te, “Am arian nadaya angku ay nabul wan ku famadante laman sa emu.”

³⁶ Ay Isaw nalong te, “Katsi at fadua ginan wa gdaya angku. Katanya wan fagnafangayanun anya te, Akub. Nabul wan ku fagmakakaun ay nabul yangay at famadante laman sa angku.” Sanya ginan, nainto te, “Mama, o wa gayvd e sawad ya am famadante laman sa angku?”

³⁷ Ay Isak nabalus te, “Nafili kwan anya laman am tagfayafun, ay nafili kyangay anya laman namagsuguan fagayu at kalongan. Nafon kwa anya ngayuk fakonun ay fanginum. Nu katanya, nataw yaro ku fon emu, faglon?”

³⁸ Isaw nafainfanyuan yay at mama te, “O wa gayvd e sawad ya dewa sadik famadante? Fadantei yap angku.” Ay kanya gfataglayun nu gwayway.

³⁹ Isak nalong anya te, “Am fagbanwanan ban wa ngayu am gutluan, ay kabavn ban ngayayu o siginans damug tagsiginans banwa.

⁴⁰ Ay gfawayan way ban o gugat, ay gafagsuguanan ban o gugat am faduksay. Dewa katanya, nu kauri way ban o gafagsuguanan, makalfas wayo siginan at fagmabalyananun.”

⁴¹ Isaw maksvn nu kadotama Akub aroro siginan at mama at nafadantean Akub. Nu katanya, Isaw gamatangan te, “Ku mama gakabulun wan; ay gina ban anbul, namabul kwan ku arian Akub.”

⁴² Dewa katanya, Rebeka nasaful Isaw at algan, nu katanya, nafauro Akub ay nalong te, “Am kaka Isaw e algan namabul emu laman kalyam at dotama.

⁴³ Nu katanya, dungugani ku longan emu. Loi masakit sas talun Karan, sa ku faduksay Laban.

⁴⁴ Sanyai yap ban o yakmay ban am kaka at dotama nalyam.

⁴⁵ Ay am kaka ban at dotama sa emu nu nalyam wan ay nu ddi ban gamatang ya am nafakamulun sa anya, namafablang kyay ban emu sanya ginan fag talun. Aroro kwa kaylat nu gasfuan am kalyam siginan angku, siginan nu gfadfabulan am.”

Isak Nasugu Akub sas Laban

⁴⁶ Ay Rebeka nalong sas Isak te, “Kwa kaylat ya gleleg aroro Isaw at ngay namangena ngay taw Ket way. Akub ban at mangena nu ste ginan yangay at masine ngap kabul kwan.”