Fakasigadan 23 - Fanawbuid tagsibaliwas Fakayabian

Sara Anbul wan ay Abrayam Nabayad at Fagfolian

¹ Sara nu gleleg sadik sandan duak safulu e fituk banwa.

² Ay kanya anbul sis furuan Kiryat-Arba at ngayan yangay te, Kebrun, sis Kanaan fag talun. Ay Abrayam kabalu Sara ay gwayway.

³ Ay Abrayam nafamato yay at mangena at bilug ay nananget sa sangay taw Ket te,

⁴ “Gbanwan au ste si ay talun, ay sik betaw kway. Nu katanya, nu masine sa ayu, falaoi sa angku sik afud ay daga at kasakan laman ku fagfolian ku mangena.”

⁵ Ay ngay taw Ket gbalus te,

⁶ “Fagtainan, dungugani yap emi. Nasaful ami te, sik takadungug o fag taw, nu katanya, masine way o gfoli am mangena nusnga nday. Wami e yud kamon am fagfolian laman mafoli o am mangena.”

⁷ Ay siginan takatanya, Abrayam namalub si sangay taw Ket at daga salubangan, sik fagtoglagan te, guseganan.

⁸ Ay sanya ginan, Abrayam glong te, “Nu kaylat tuam nu gfoli au ste ku mangena, fakamatoani Efrun, Sukar at baguama, laman sa angku,

⁹ laman gfalao sa angku at fagagbilugun fag luib sit tigyangan gamasun sis Makpela. Ay longi sa anya te, namayad au sa anya at kasakan si ay daga salubangan laman kafag luib ku fagagbilugun wan, ay nangawat au fagfolian.”

¹⁰ Ay Efrun mangaro sanya way magamut at ngay kaiban fag ngay taw Ket at malunggung sis sakbawan furuan daul.

¹¹ Ay kanya nalong te, “Ste si ku ngay iba at daga salubangan gfon kwan sa emu fagdaul ku gamasun ay anggan luib. Nu katanya, namoli wo am bubay.”

¹² Abrayam nadog yay namalub si sangay taw Ket at daga salubangan, sik fagtoglagan te, guseganan.

¹³ Ay gina kanya fagayu gdungugan, Abrayam nalong sas Efrun te, “Fagayu am dungugani angku. Gbayad au kasakan at gamasun. Aylati ku famayad sa emu laman manamoli kwan sanya ku bubay.”

¹⁴ Ay Efrun nabalus te,

¹⁵ “Fagtainan, tuy fag daga nu kabangsi ufatk sandank lifung sanbung salapi. Dewa katanya, siwa anta fagdua, nu nsadi tua ta, wata e fagkamatoanun ya. Kin, namoli wo am bubay.”

¹⁶ Ay Abrayam naylat Efrun at nalong at kayuan fag famayad. Nu katanya, Abrayam nafabudbungguan ufatk sandank lifung salapi kata ebi fag ngay tagfalao nu gfae bayad. Ay kanya nafon sas Efrun si sangay taw Ket at daga salubangan.

^17-18 Nu katanya, Abrayam nagbilug Efrun at gamasun tagsis Makpela sis Mamre sis fakamenitan baliwa anggan luib ay ngay fun kayu tagsis ligung gamasun. Ay at maful sis day sakbawan furuan fag ngay taw Ket nafatuyan.

¹⁹ Abrayam nanamoli wa vtv Sara at bilug sasad luib tagsis gamasun sis Makpela tagsis Kanaan fag talun. Makpela munakbang sis Mamre (at ngayan yangay te, Kebrun.)

²⁰ Nu katanya, kanya fag gamasun anggan kafag luib, ebi ngay taw Ket way at fagagbilugun, ay Abrayam nagbilug wan, ay nawat at fagfolian.