Fakasigadan 2 - Fanawbuid tagsibaliwas Fakayabian

¹ Nu katanya, Dius nawat banwa ay fagdaul daga ay fagayu tagsanya.

² Ay sis fafituk menit, Dius gfiangalay wan, aroro antabu wan nu kawat fagayu nusnge wain.

³ Ay Dius nafadante ay nafasaman at fafituk menit. Ginanya fag menit kanya gfiangalay wan, aroro antabu wan nu kawat fagayu nusnge wain.

⁴ Katanya at fansulitan sabaliwa Dius nu kawat banwa ay fagdaul daga. Gina Yawi nawat fagdaul daga ay banwa,

Adan ay Eba

⁵ bunya fagayu fananumun tagtugbung, aroro Yawi ya batang gfarak ay ye taw at nangalaga.

⁶ Dewa yud e arak, e mamam tua tagsiginans daga tagfarugme lutuk.

⁷ Yawi nawat taw siginans lukbu. Ay kanya nauyup sat dungus laman kanya fag taw gleleg. Nu katanya, at nawat fag taw ansik tagleleg fag awatan.

⁸ Sanya ginan, Yawi nawat sik tanuman sis Eden, si baliwas fakamenitan, ay sanya nu gfabanwan at nawat fag taw.

⁹ Yawi nafatugbung ngay kayu at masine nu kadama ay at ngay rawvg mataba nu kaon. Sis wabilug tanuman e sik fun kayu tagfon leleg, ay e sik fun kayu tagfon fagsafulun sabaliwa at masine ay at mauri.

¹⁰ E sik liskung gfamilugan siginans Eden tagfarugme kafag tanuman. Ay sanya ginan fag tanuman, kafag liskung ankafud ufat.

¹¹ Taguna fag sarangan liskung nafangayan te, Pisun, ay gfamilugan gbaraudan sas fagdaul talun Abila, ay sanya e ngay gintu.

¹² Ay sanya fag talun at gintu di e suglat, ay e famaebebanglu fag lune, ay e ngay gang gladlaksiun at mabyat nu kabayad.

¹³ Ay at faduak liskung nafangayan te, Gikun, ay gfamilugan gbaraudan sas fagdaul talun Kus.

¹⁴ At fatuluk liskung nafangayan te, Tigris, ay gfamilugan sas fakamenitan sas Asirya baliwa. Ay at faufatk liskung nafangayan te, Eufrates.

¹⁵ Ay Yawi nafabanwan at nawat fag taw sas tanuman Eden laman nangalaga.

¹⁶ Yawi nalong sas taw te, “Masine way o kon nusnge wain fag fun kayu at rawvg sis tanuman,

¹⁷ dewa katanya, lag kon rawvg siginan sik fun kayu tagfon fagsafulun sabaliwa at masine ay at mauri. Aroro nu naon way ro wo, matuyan umbul o.”

¹⁸ Sanya ginan, Yawi nalong te, “Wa masine taw nu gsesadian way nu gbanwan, nu katanya, nangawat kban at ufud laman at taggubuk ay at masine sa anya.”

¹⁹ Yawi nawat ngay mangilafang siginans daga: fagayu tagbanwan sis daga ay anggan taglayug. Sanya ginan, kanya nafatigwanan kafag ngay mangilafang sas taw laman gfae ngayan. Ay nu nataw wan taw nu guro galay sik mangilafang, kanya wan at ngayan.

²⁰ Nu katanya, taw nafangayan ngay mangilafang tagbanwan sis tungud daga ay anggan taglayug. Dewa katanya, nusdi sadi we masine laman at ufud ay at taggubuk.

²¹ Nu katanya, Yawi nafatiug taw. Ay kaduge kafag taw gtiug, Yawi nabul at tagyang at sadi ay nafasine wa vtv at fagbulan,

²² ay nawat mangena siginan kafag tagyang at nabul siginans mangama, ay nu nkawat wan, nataban anya sas mangama.

²³ Ay mangama glong te, “Tuy wan sik takata angku! At bini nabul siginan ku bini ay at faknul nabul siginan ku faknul. Ay gfangayan au anya te, mangena, aroro nabul anya siginans mangama.”

²⁴ Kanya at masuad mangama fagubunun at mama ay at mina ay nangasadi sat mangena, ay kanya fag dua umsadi wan.

²⁵ Ay ginanya, kanya fag dua dewa malulasan wa kapla.