Fakasigadan 11 - Fanawbuid tagsibaliwas Fakayabian

Tagsis Babilunya fag Bale Ngabat

¹ Ginanya, fagayu taw sas fagdaul daga sadi way at fangaringang.

² Kaduge ngay taw gadgalinan at fagbanwanan siginans fakamenitan sas fakayabian, kanya fagayu andasug sa sik datag sas talun Sinar, ay gbanwan sanya.

^3-4 Kanya fag ngay taw gkamatoan te, “Nangawat tam sik furuan daul at ke bale ngabat gdasug sas banwa, laman kadungug tam ay wa tam gsaruayan sas fagdaul daga.” Ay kanya fagayu at famale, abat ngate gang, lutuk way at mafasugban fia laman matugas mandi. Ay at fandafut at madai fag langis malayung.

⁵ Nu katanya, Yawi natustus siginans banwa laman nanlag kafag ngay taw nu kawat kafag furuan daul ay bale ngabat.

⁶ Yawi nalong te, “Kanya fag ngay taw masadi anggan at fangaringang. Tuy at famagsigad yay lang at fagnamakamulunun ban! Ay wa glugo ya namakamulun wan nusnge wain at fakaylatun.

⁷ Nu katanya, gtustus watam laman namasadsamanan tam at ngay fangaringang laman ban wa gtodtogdungugan ya.”

⁸ Nu katanya, Yawi nafasadsamanan kanya fag ngay taw at fangaringang ay nasalag wan nu kawat kafag furuan daul.

⁹ Kafag furuan daul nafangayan te, Babel. Kata kafag ngayan, Yawi nafasadsamanan taw at ngay fangaringang, ay sanya ginan fag furuan, Yawi nafasaruayan anya fagayu sas fagdaul daga.

Sem at ngay Kasugfunanan

¹⁰ Katatuy at fansulitan sabaliwa Sem at ngay kasugfunanan. Nu nlangfe lino daul, Sem at banwa sadik sandan, ay ginanya at baguama Arfaksad ansalug.

¹¹ Ay siginan Arfaksad nu kasalug, Sem nu gleleg limak sandan yak banwa ay anfamut yay at ngay sisian.

¹² Arfaksad at banwa gina tuluk safulu e lima, ansalug at baguama Sela.

¹³ Ay siginan Sela nu kasalug, Arfaksad nu gleleg ufatk sandan tulu yak banwa ay anfamut yay at ngay sisian.

¹⁴ Sela at banwa gina tuluk safulu, ansalug at baguama Eber.

¹⁵ Ay siginan Eber nu kasalug, Sela nu gleleg ufatk sandan tulu yak banwa ay anfamut yay at ngay sisian.

¹⁶ Eber at banwa gina tuluk safulu e ufat, ansalug at baguama Peleg.

¹⁷ Ay siginan Peleg nu kasalug, Eber nu gleleg ufatk sandan tuluk safulu yak banwa ay anfamut yay at ngay sisian.

¹⁸ Peleg at banwa gina tuluk safulu, ansalug at baguama Reu.

¹⁹ Ay siginan Reu nu kasalug, Peleg nu gleleg duak sandan siam yak banwa ay anfamut yay at ngay sisian.

²⁰ Reu at banwa gina tuluk safulu e dua, ansalug at baguama Serug.

²¹ Ay siginan Serug nu kasalug, Reu nu gleleg duak sandan fitu yak banwa ay anfamut yay at ngay sisian.

²² Serug at banwa gina tuluk safulu, ansalug at baguama Nakur.

²³ Ay siginan Nakur nu kasalug, Serug nu gleleg duak sandan yak banwa ay anfamut yay at ngay sisian.

²⁴ Nakur at banwa gina duak safulu e siam, ansalug at baguama Tera.

²⁵ Ay siginan Tera nu kasalug, Nakur nu gleleg sadik sandan labi siam yak banwa ay anfamut yay at ngay sisian.

²⁶ Tera at banwa gina fituk safulu, ansalug at ngay baguama: Abram, Nakur ay Aran.

Tera at ngay Kasugfunanan

²⁷ Katatuy at fansulitan sabaliwas Tera at ngay kasugfunanan. Tera at baguama tulu: Abram, Nakur ay Aran. Ay Aran, Lut at mama.

²⁸ Aran anbul sis furuan Ur, si sangay taw Kaldea at talun, ay sit fakasalugan fag furuan. Kanya anbul gina yay at mama Tera gleleg.

²⁹ Abram nafamubay Saray, ay Nakur nafamubay Milka. Milka ay Iska at mama Aran.

³⁰ Saray wa gsisian aroro garanas.

³¹ Tera nalao siginans Ur, taw Kaldea at furuan daul, gadgaloan at baguama Abram ay at nugang Saray ay at fufu Lut. Lut, Karan at baguama. Kanya fagayu at algan gtaglayun sas Kanaan, ay dewa katanya, nu ndasug sas furuan daul Karan, kanya fagayu sanya wan nu gbanwan.

³² Ay sanya wan Tera nu kabul, gina at banwa duak sandan lima.