Fakasigadan 1 - Fanawbuid tagsibaliwas Fakayabian

Nu Kawat

¹ Taguna, Dius nawat banwa ay fagdaul daga.

² Ginanya, fagdaul daga ye kawalungan ay ye gleleg nusnge wain. Ay fagmadulumun tagtabun fagngabasadan. Ay Dius at Falad glelegan sis tungud lino.

³ Ay Dius nalong te, “E yamagi!” Ay ansure wa fia.

⁴ Ay Dius guseganan nu nalag yamag. Ay kanya nafasaman yamag ay dulum.

⁵ Ay kafag yamag nafangayan te, “Menit” ay dulum, “Yabi.” Yabi nu nlangfe, balabag andasug. Kanya taguna fag menit.

⁶ Ay Dius nalong te, “E gwabilugi tagfasaruayan lino sas duak afud.”

⁷ Ay anke tagwabilug lino sit tungud ay sit daga.

⁸ Tuy fag tagwabilug Dius nafangayan te, “Kiwang.” Yabi nu nlangfe, balabag andasug. Kanya at faduak menit.

⁹ Sanya ginan, Dius nalong te, “Lino, afuli sa sik afud daga, ay asurei at matat fag daga.” Ay katanya wa fia at kinfasludan.

¹⁰ Ay at matat fag afud nafangayan te, “Daga” ay at kinful fag lino nafangayan te, “Dagat.” Ay Dius nalag te, masine.

^11-12 Ay Dius nalong te, “Tugbungi sas daga nusnga setaw fag tanum, ay anggan tibak kayu tagrawvg at ke bini. Ay kanya fag ngay bini rumawvg yangay ban kata at mesa bilugan.” Ay anfasludan takatanya. Ay Dius nalag te, masine.

¹³ Yabi nu nlangfe, balabag andasug. Kanya at fatuluk menit.

¹⁴ Ay Dius nalong te, “E ngay tagyamagi sis banwa laman famasaful te, menit ay yabi. Ay kanya sik famasaful yangay te, gfasigad ngay buknga, ngay menit, magdanun ay banwa.

¹⁵ Ay kanya fag ngay tagyamag gyamag sas fagdaul daga.” Ay katanya wa fia at kinfasludan.

¹⁶ Nu katanya, Dius nawat duak tagbia fag tagyamag: tagbia nafangayan te, “Menit,” tagyamag gina menit. Ay talay vtv nafangayan te, “Magdanun,” tagyamag gina yabi. Ay nawat yangay ngay galeme.

^17-18 Ay Dius nafasis banwa fagayu at awatan tagyamag laman gyamag sas fagdaul daga galay menit ay yabi, laman gfasaman yamag ay dulum. Ay Dius nalag te, masine.

¹⁹ Yabi nu nlangfe, balabag andasug. Kanya at faufatk menit.

²⁰ Sanya ginan, Dius nalong te, “E taglelegi nusnge wain sis dagat, ay e taglayugi nusnge wain sas kiwang.”

²¹ Ay nawat yangay tagbia ayu daul tagleleg sisad lino ay anggan nusnge wain taggabanan ay tagalafang, ay nawat yangay fagayu manuk tungud. Ay Dius nalag te, masine.

²² Ay Dius nafadante kafag ngay mangilafang ay glong te, “Ayui tagleleg sisad lino ay ayui yangay manuk tungud taglayug.”

²³ Yabi nu nlangfe, balabag andasug. Kanya at falimak menit.

²⁴ Ay Dius nalong te, “E ngay taglelegi tagsaman saman sis daga: at magup, ay at mela, ay anggan ngay tagalafang.” Ay katanya wa fia at kinfasludan.

²⁵ Ay Dius nawat kanya fagayu ay nalag te, masine.

²⁶ Ay Dius nu ntabu wan nu kawat fagayu, nalong te, “Nangawat watam taw kata antam. Kanya ban tagalaga sas fagayu gaban tagleleg: tagfioan, taglayug, ay taglao, ay anggan tagalafang.”

²⁷ Nu katanya, Dius nawat taw kata anya, at awatan sik mangama ay sik mangena.

²⁸ Ay Dius nafadante ay nalong te, “Ayui laman ban ay ngay sugfun rumapyagan ay nangagbilug sas fagdaul daga. Ay alagai yangay ban fagayu tagleleg: tagfioan, taglayug, taglao, ay anggan tagalafang.”

²⁹ Ay Dius nalong te, “Nafon au sa ayu fagayu tanum at rawvg ke bini ay anggan fagayu kayu tagrawvg laman ay fakonun.

³⁰ Ay nafon kyangay sa sangay magup ay sa sangay mela, sa sangay taglayug, ay sa sangay tagalafang, ngay tanum at marabung laman e fakonun yangay.” Ay katanya wa fia at kinfasludan.

³¹ Ay Dius nu nalag fagayu at awatan, nalag te, masine mandi. Yabi nu nlangfe, balabag andasug. Kanya at faunumk menit.