Fakamulun 28 - Fanawbuid tagsibaliwas Fakayabian

Ndasug sas Malta

¹ Ay nu nlangfe wami, nasaful ami te, em fakadasugan mangaro furu Malta.

² Ay sanya fag ngay taw malukme mandi sa emi. We gtungud ya at fagmagalangun. Kanya fagayu ggubuk emi gfae afuy laman ro em fagfangenbungan, aroro ginanya karak ay marios.

³ Ay Pablu nanfansarab laman ro at famaygang. Ay nu natungu wan, sik ule nalfas siginan at ba sarab ay nabarikus Pablu at take.

⁴ Ay tagsanya fag ngay taw nu nalag kafag ule nu mabaringbing sis Pablu at take, gkamatoan te, “Matuyan, in fag taw sik takamabul way. Dewa kanya nlangfe yay sis dagat, tam fagsegan at ngayan Matuyan wa kaylat ya kanya nu gleleg.”

⁵ Ay Pablu nafarikfik kafag ule sasad afuy ay di e ndasug sa anya at mauri.

⁶ Ay kafag ngay taw gfanya Pablu nu kabaga ay nu kabul. Ay nu ngaduge wan nu gfanya, nalag te, we ndasug sa anya at mauri. Nu katanya, at ngay amatanganan anbali ay glong te, “Kanya ngaro sik dius.”

⁷ Sanya fag furu at fun at ngayan Publiu, ay at daga munakbang si em fakadasugan. Ay kanya maksvn nu guseganan gfasakbo emi sat bale, ay kaduge tuluk menit galaga emi.

⁸ Ay ginanya fag buknga antunggu Publiu at mama e fakasaitun. Kanya gtaygilidan way gugat sit igyan aroro garagnat ay gafanguyas. Ay Pablu nasakbo sat bale ay nadarangin, ay nafatayuk at daluap ay anfia.

⁹ Ay aroro katanya at kinfakamulun, fagayu ke fakasaitun sanya fag furu andasug sas Pablu ay fagayu anfia yangay.

¹⁰ Ay kafag ngay taw gfauseganan mandi emi ay ngayu at famonun. Ay nu galoun wami, kanya fagayu nafon yay fia sa emi, em ngay fagayudanun kaba ami glao.

Siginans Malta Glo sas Furuan Ruma

¹¹ Nu nlangfe wa tuluk magdanun, nasakay ami sa sik sakayan lino tagsiginans Aleandria. Kanya nafalangfe yay abagat sis Malta. Ay sanya fag sakayan at fagunan e mawatan sik aninu, kanya duak fagsegan tagasfuan nu kasalug.

¹² Ay glo wami sas Sirakusa fag furuan ay natungkud ami sanya tuluk menit.

¹³ Sanya ginan, nalo wami ay andasug ami sas furuan Regyu. Ay balabag di, sik maksvn fag tagmara andasug siginan baliwas indulungan ay sat fadogan fag menit, andasug ami sas furuan Puteuli.

¹⁴ Ay sanya e ngay tagafanud ay glong sa emi te, “Ste yap am si emi fituk menit.” Ay sanya ginan gtaglayun wami glao ay andasug ami sas furuan Ruma.

¹⁵ Ay sis furuan Ruma at ngay tagafanud nu nadungug te, kadasug ban mi, kanya fagayu nalao sas furuan Apyu at Fagnamulan nusnge wain, ay sas Tuluk Bale Fagtaglayunan, laman namablang emi. Ay Pablu nu nalag ngay tagafanud, guseganan sas Dius ay anbitsug at amatanganan.

Pablu sis Furuan Ruma

¹⁶ Nu ndasug ami sas furuan Ruma, Pablu masine way gtaglayun nusnga nday fag bale at fakaylatun, dewa katanya, sik tagfawayan ro galo yay gugat anya, laman galaga.

¹⁷ Nu nlangfe tuluk menit, Pablu nafauro taw Udyu at ngay tagfangguna. Ay nu nful wan, Pablu glong sa anya fagayu te, “Ku ngay faduksay, dewa yud au e nafakamulun nusnge wain tagfauri tam furuan ay tam ngay mangaguyang at ngay faugali, e nagamat angku sis Erusalem ay nafon angku sas taw Ruma laman gfaurianan angku.

¹⁸ Ay nu ntabu nu gfaurianan angku, kanya fagayu kaylat wama gfalfas angku, aroro kwe asalanan sak au gafaurianan sas fakabulun.

¹⁹ Ay dewa katanya ngay taw Udyu glong te, ‘Deyud.’ Ay kwe fagmafakamulunun ya nu bunway get laman kakbang sas talun Ruma at fun, dewa yud au e fantabugan tagfauri tam ngay kaiban.

²⁰ Kanya wan ku fagnafauroun ayu, kaylat au gyalagun ay gfakamatoan ayu aroro ku fagmasalodanun fia salambitan aroro sa sangay taw Israel at fagsegun.”

²¹ Ay ngay taw Udyu gbalus te, “Wami batang e dungganan barita sabaliwa emu. Ay wami batang e nalag rirukan siginans talun Udea, ay dewa ste ginan fag ngay taw at kindasug siginans furuan Erusalem we nalong mauri sabaliwa emu.

²² Ay dewa katanya, kaylat ami gdungugan nusnga setaw am fagyalongun, aroro saful wami te, nusnga ndaginan ngayuk taw takauri sam naylatan fag fagafanudun.”

²³ Ay kanya fagayu nafili sik menit laman gdog yay maful, ay ngayuk taw at kindasug sas Pablu at bale nu ndasug at nafili fag menit. Ay Pablu gfoyung sas fagayu taw siginans balabag yakmay anyabi, ay gfayamag sa anya fagayu siginan Muisis at Faugali ay siginan Dius at ngay taglong at ngay rirukan, sabaliwa Dius nu gfagtainan. Ay Pablu gugatan gfoyung sabaliwas Isus laman kafag ngay taw gafanud.

²⁴ Ay tibak taw gafanud tua sas Pablu at foyungan, ay tiba duan.

²⁵ Ay aroro kanya fagayu wa masadi, mesa way lang nauli sat ngay bale. Dewa katanya, kanya fagayu nu galoun wan, Pablu nalong yay te, “Matuyan at Masine fag Falad at longan sa ay ngay mangaguyang siginan Isayas, Dius at taglong at nalong te,

²⁶ ‘Dius glong te, Loi wan sanya fag ngay taw ay longi te, Dewam gugat gdungugan, wam gtogdungug, ay dewam gugat gdama, wam glag.

²⁷ Aroro tuy fag ngay taw we amatanganan, ay kauri gdungug, ay at mata gtipan way. Satu ro nu dyaman katanya, kafag ngay taw glag tua ban ay gdungug tua ban ay gtogdungug tua ban, ay kafoli sa angku ay namafia kban anya fagayu.’ ”

²⁸ Ay Pablu nalong yay fia te, “Kaylat au gfasaful sa ayu te, tuy fag barita sa baliwa tam Dius nu gfalangfe, at yud Udyu fag ngay taw nadungug wan, ay kanya fagayu gdungugan mandi.”

²⁹ Pablu nu nalong wan takatanya, kafag ngay taw Udyu glo wan ay maksvn nu gbadbaboan.

³⁰ Pablu nabanwan sis Ruma sit fagtaglayunan fag bale, mabuktung duak abagat, ay kaylat mandi gfasakbo ngay taw at nansibo anya.

³¹ Ay fagdaul at amatanganan di e gsalag nu gfoyung sabaliwa tam Dius nu gfagtainan ay sabaliwa tam Fun Isus.