Fakamulun 27 - Fanawbuid tagsibaliwas Fakayabian

Pablu nu Glao sas Furuan Ruma

¹ Ay gina anke algan gfalao emi sas talun Italya, nafatigwanan Pablu ay tiba yak maubungan sas Ulyu fag fun tagfawayan, tagfangguna talun Ruma at fun at ngay tagfawayan.

² Ay nasakay ami sa sik sakayan lino siginans furuan Adramitiu, tagsa sangay furuan sis tigyangan dagat sis talun Asya. Ay Aristarku tagsiginans furuan Tesalunika sis talun Masidunya, galo emi.

³ Balabag di, antungkud ami sis furuan Sidun. Ulyu malukme tua sas Pablu ay kaylat Pablu nu nansibo at ngay fagadgalangan laman ggubuk at fagayudanun.

⁴ Ay sanya ginan fag furuan, gfataglayun ami glao, ay ang way mi lang gulitan furu Sipre sas fakamenitan baliwa, aroro tagmara gfablang emi.

⁵ Ay nu ntabu nu gdalanan ami talun Silisya ay talun Panfilia sa sangaba tigyangan dagat, andasug ami sas Mira sis talun Lisya.

⁶ Ay Ulyu nalag sik sakayan lino siginans Aleandria, tagsas Italya fag talun, ay nasakay wami sanya.

⁷ Ngayuk menit em sakayan nu glo aroro maranan way, ay naidapan mandi mi at nangadasug sas Gnidu. Wami maturunan glao sas wabilug dagat aroro tagmara gfablang way emi. Ay nu katanya gulitan way mi sa sangaba tigyangan dagat sabaliwa furu Kreta sis aturunan furuan Salmune.

⁸ Ay gugatan ami gulitan glao sa sangaba tigyangan lino nangadasug sa sik furuan at ngayan te, Masine fag Fakaragangan, munakbang sis furuan Lasea.

⁹ Ay nu nlangfe wan ngayuk buknga malimu wan taglao, aroro munakbang wan abagat ay ginanya antabu wan taw Udyu at fagyudun gfangon fag menit. Ay Pablu nalong sa em ngay ufud sis sakayan lino te,

¹⁰ “Nu gfangalganan au, gidapan ban tam glao ay maksvn ban at malimu takadasug sa tam sakayan ay sa tam ngay famubaun, ay anggan sa antam.”

¹¹ Ay tagfawayan at fun wa gfandungug Pablu at longan, gfandungug way tagfalao ay tagagbilug sakayan at longan.

¹² Ay kanya fagayu nasaful te, sanya fag buknga wa masine fakatungkudan sakayan laman gfalangfe abagat, ay tangayu baliwa gfasadan laman gtaglayun ami glao, at amatanganan te, bangaran ro manga dumasug ami sas furuan Fenise, ay sanya nu gfalangfe ami abagat. Furuan Fenise sik fakatungkudan ngay sakayan lino sis furu Kreta tagsas indulungan baliwa.

Fulug sis Dagat

¹³ Ay nu natagmara siginan baliwas indulungan malukme way sirut, ngay tagfakamulun sis sakayan at amatanganan te, masine wan nu gdog ami glao. Nu katanya, kanya fagayu nafabat at famatawad em sakayan ay gfasigad wami glao sa sangaba tigyangan lino sas furu Kreta.

¹⁴ Ay arodi vtv, andasug sik fulug daul siginans wabilug indulungan ay fakamenitan baliwa.

¹⁵ Ay kafag tagmara nu ndasug sa em sakayan wami mafataglayun ya glao, nu katanya, gfabayan waymi lang tagmara nu gbuba emi.

¹⁶ Ay tagmara nabuba emi sa sangaba tigyangan lino sa sik furu at ngayan Kauda, ay nafasakbo ami em sakayan sirut em faguyudan sis guyan sakayan daul, dewa ami naidapan.

¹⁷ Ay nu nafabat wami kanya sas sakayan daul, ngay tagfakamulun nasalod maksvn kafag sakayan sirut. Aroro kalimu te, mantungkud ro sasad bangsi lino munakbang sis Libya, kanya nafababa ramit daul famalao em sakayan ay nafalimus way lang.

¹⁸ Ay balabag di aroro maksvn yay gugat nu gfulug, ngay tagfakamulun sis sakayan gfasigad gukas at ngay famubaun sasad lino.

¹⁹ Ay sis fatuluk menit, at fagukasun anggan wa at ngay fagagbilugun sis sakayan lino.

²⁰ Ngayu wak menit nu yud ami glag ya menit ay anggan ngay galeme ay wa karagang ya nu gfulug, ay gafanawa ami te, wa ban mi anlangfe ya.

²¹ Aroro ngaduge wan kafag ngay taw nu yud gfangon ya, Pablu anlindug ay glong te, “Ku ngay ibama, nu nafandungug di am ku longan te, ‘Lag yap ngap tam glelegan siginans furu Kreta,’ satu ro di tam e fagidapun takatatuy.

²² Ay katsi glong au ayu te, faksvni ay amatanganan aroro fagayu ban tam kalangfe tua tam, tam sakayan ban dewa umrasras.

²³ Aroro aro sad yabi Dius at tagbarita at sadi malindug si ku day tigyangan. Dius, ku fagsegan ay ku fagfaningan at nafadasug ste,

²⁴ glong angku te, ‘Pablu, lag kalimu. Aroro matuyan wan manalubang ban o talun Ruma at fun, aroro siginan emu, Dius gfalangfe ban fagayu am ufud sis sakayan.’

²⁵ Nu katanya, ku ngay ibama, faksvni ay amatanganan, aroro gafanud au te, matuyan, umfasludan fagayu kata Dius at longan sa angku.

²⁶ Tam sakayan dewa anrasras wan, umdasug ban tam sa sik furu.”

²⁷ Nu swabilug yabi wan at falabi ufatk yabi nu gfulug, Adriatiku fag dagat gbuba emi nusnga nday, ay ngay tagfakamulun sis sakayan nalag te, munakbang wami sa sik furu.

²⁸ Ay kanya fagayu nananginsaful sanya fag afud, ay nasaful te, dua yak safuluk dufa at kabasadan. Arodi vtv, gdog yay fia nanginsaful, ay nasaful te, labi lima way lang kdufa sanya at kabasadan.

²⁹ Ay aroro kalimu te, mantungkud ami sis wa gang, kanya fagayu nafatong sas faguyanan sakayan lino at famatawad fag ufat. Ay kanya fagayu kanbang wa daul nu kamenit.

³⁰ Ay at ngay tagfakamulun namatangan te, gfamato watam tam sakayan lino ay glo watam ste ginan. Ay kanya fagayu nafasasad lino at sakayan sirut, ay gfalagan te, namatong way at famatawad at sakayan lino sas fagunan.

³¹ Ay Pablu nalong sa tagfangguna ay sa sangay tagfawayan te, “Nu nalao way ro ngay tagfakamulun, wa ro am umlangfe.”

³² Nu katanya, ngay tagfawayan nagufas way lang fansiuk sakayan sirut ay nafalimus wan.

³³ Ay sis daga kamenit sirut, Pablu glong sas fagayu taw te, “Fangoni yap, newa nu yud am gfangon labi ufat wak menit.”

³⁴ Ay Pablu nalong sa sangay taw te, “Fangoni yap laman mabitsug tuam ay diam umbul. Di ban e kabul nusdi sadi si ayu.”

³⁵ Ay Pablu nu ntabu garingang, nabul tinapay ay nafauseganan Dius sis salubangan ngay taw. Ay naramyuk at ba tinapay ay kon wan.

³⁶ Ay kanya fagayu anbitsug at ngay amatanganan, ay guseganan kon.

³⁷ Ay nu fagayu wami sis sakayan lino duak sandan fituk safulu e unumk taw.

³⁸ Ay fagayu taw nu napsug wan, kanya fagayu naukas wan sas dagat at ngay ba trigu laman ro at sakayan lino kagan.

Sakayan Lino nu Karasras

³⁹ Ay nu nmenit wan, ngay tagfakamulun sis sakayan e nabanawan sik furu, dewa katanya, wa saful sanya fagwaya, ay nalag yangay sanya sik furuan ay sik tigyangan dagat, ay naugatan nanamasanya at sakayan lino.

⁴⁰ Ay kanya fagayu nagufas wan ngay fansalod famatawad sakayan lino, ay naluas yangay salod sis famaturunan. Ay nafabat at famalao fag ramit tagsit fagunan laman tagmara gbuba sakayan lino sat nalag fag tigyangan dagat.

⁴¹ Ay em sakayan antungkud sis fagngababaan, ay at fagunan ansungkud sasad lagnas ay wa malelegan ya. Ay sis faguyanan, anrasras wan, aroro at kaksvnan nu glugwak.

⁴² Ay kafag ngay tagfawayan gafabulun kafag ngay kinkubung, at amatanganan te, kanya fagayu mananfioan sas tigyangan, laman glagyu.

⁴³ Ay at tagfangguna nasalag at ngay tagfawayan, aroro kaylat gfalangfe Pablu. Nu katanya, kanya nasugu te, “Fagayu tagsaful gfioan tosi wan sasad lino ay adasugi sas tigyangan.”

⁴⁴ Ay fagayu at naubunan nabul ngay balse ay tibak afud sakayan. Nu katanya, fagayu ami ndasug tuami sas tigyangan ay anlangfe.