Fakamulun 26 - Fanawbuid tagsibaliwas Fakayabian

Pablu Gfoyung sis Salubangan Fun Agripa

¹ Ay fun Agripa nalong sas Pablu te, “Kaylat au nu gfoyung o sabaliwa am sadili.” Ay Pablu gyafe at daluap ay gfasigad gfoyung sabaliwa at sadili.

² Ay glong te, “Fun Agripa, guseganan au aroro dumungug ro wo ku foyungan sabaliwa ngay taw Udyu at fantabugan sa angku.

³ Aroro nasaful wam taw Udyu at faugali ay at fagbadbaboanun. Ay maksvn nu get au sa emu te, dungugani angku.

⁴ “Fagayu taw Udyu saful wan nusnga setaw ku ugali siginan ngay nu sisian au, si ku sadili furuan ay dewa sis Erusalem.

⁵ Kanya fagayu nu glong di at matuyan, kanya wan tagfatuyan nu kaylat di gfoyung te, sik taw Fariseu au. Ngay taw Fariseu sik gaban at maksvn nu gfaning em faugali.

⁶ Ay kanya wan katsi ku fagsteun sim daga salubangan, aroro e fagsegun au sas Dius at fatuyanan sa tam ngay mangaguyang.

⁷ Ay kanya yangay fag fatuyanan tam mangaguyang fag labi duak gaban at fagsegun ay maksvn daul kanya nu gseg Dius kayu menit ay yabi. Fun Agripa, kanya yangay ngay taw Udyu at fagfantabuganun sa baliwa angku.

⁸ Lag am gamatangan te, Dius wa mafadog ya gfaleleg at ngay kinbul.

⁹ “Ebi taguna fag ngay menit, antuyan kwa te, masine nu gfakamulun au nusnge wain laman gfauri Isus tagsiginans furuan Nasaret.

¹⁰ Ay kanya yangay ku fakamulun sis Erusalem, aroro gfaning au ngay fun tagfon fanggalangun at fon angku fag fagmabalyananun, ngayu ku nafaubung Dius at ngay nafili. Ay nu e gfabul, gfadiuganan kyangay.

¹¹ Ay malayun nu glao au sa sangay bale fakafulan laman namaurianan at maful sanya, ay gfabulun au laman kanya fagayu glong at mauri sas Dius. Ay aroro maksvn nu kadotama au anya fagayu, gugatan au dewa sa tangayayu fag ngay furuan laman namaurianan anya fagayu.

Pablu Gfoyung sabaliwa nu Gafanud

¹² “Katanya ku algan ku fagnasauns Damasku, gbuba ngay fun tagfon fanggalangun at fagmabalyananun ay at suguan.

¹³ Fun Agripa, ginami sangaba dalan, sis wabilug menit nalag au sik mayamag siginans banwa, amasulo yap tam menit ay nayamag sa ku ligung ay anggan sa ku ngay ibama.

¹⁴ Ay anlub waymi lang sas daga, ay nadungug au sik aringang glong angku sas Ebreu fag fangaringang te, ‘Saulu, Saulu, wain am fagfauriun angku? Am fagfauriun am sadili yay, kata nu gturang o sik masungad.’

¹⁵ “Ay nainto au te, ‘Sinu o, ku Fun?’ “Ay tam Fun glong te, ‘Au wan Isus am fagfauriun.

¹⁶ Ay katsi, malindug o. Ansure au sa emu laman gfili emu sik fagsuguan ay sik tagfoyung sabaliwa am nalag katsi ay ku fagnamalagun yay ban sa emu.

¹⁷ Ay gfalangfe kban emu siginan am ngay kaiban taw Udyu ay siginan at yud Udyu fag ngay taw. Gsugu au emu sanya fag ngay taw,

¹⁸ laman nanluang at ngay mata ay namafoli sasad mayamag siginan sad madulum ay gfafoli sas Dius siginans Satanas at fagmabalyananun, ay namalyam kafag ngay taw at asalanan ay gtap anya te, ku ngay nafili, aroro siginan at fagafanudun sa angku.’

Pablu Gfoyung sabaliwa nu Gfaning Isus

¹⁹ “Aroro katanya, fun Agripa, kdi nafamabo ku nalag fag taginfan siginans banwa.

²⁰ Nafoyung au taguna sis Damasku ay sanya ginan sas Erusalem ay sas fagdaul talun Udea ay anggan sas yud Udyu fag ngay taw. Nafoyung au laman sanya fag ngay taw gubun tua at asalanan ay kafoli sas Dius ay gfatuyan siginan at ngay fakamulun te, naubun wan at asalanan.

²¹ Siginan takatanya, ngay taw Udyu nagamat angku siginans Dius at bale, ay at algan namabul angku.

²² Dasug katsi Dius ggubuk angku, nu katanya malindug au gfoyung sas fagayu taw dewa sat mabalyanan ay sat yud mabalyanan. Ku foyungan sa way lang baliwa Dius at ngay taglong at nalong ay Muisis at longan takafasludan ban te,

²³ Dius at nafili fag Fun nanginkidapan ban ay kanya ban taguna at nadog naleleg siginan at fagmabulanan, laman gfoyung ay gfayamag fakalangfean sas taw Udyu ay anggan sas yud Udyu fag ngay taw.”

²⁴ Ay kaduge Pablu gfoyung, Festu nauro te, “Pablu, gfansaful wo! Am fagyudun e amatanganan ya, aroro am fagsafulun gsawe wan.”

²⁵ Ay Pablu nabalus te, “Mesug fag fun Festu, kwa gfansaful. Ku longan fagayu matuyan ay masine tua.

²⁶ Fun Agripa, maseganama nu gfoyung au emu, aroro nasaful wo takatanya fagayu. Antuyan au te, nalag o fagayu takatanya, aroro wa masuksukan.

²⁷ O gafanud o sas Dius at ngay taglong? Saful kwa te, gafanud o.”

²⁸ Fun Agripa nalong sas Pablu te, “Ay wain, o nu glong o mafabulun ro wo vtv angku laman gafanud au sas Dius at nafili fag Fun?”

²⁹ Pablu nabalus te, “Dewa katsi ay dewa ban ngaduge yay, gdarangin au sas Dius te, bundi ban nangus o lang at kumke fagafanudun kata angku, nu bunway anggan tua ban nangus fagayu tagdungugan angku katsi. Ay am ban nangus diam kaubung kata angku.”

³⁰ Ay fun Agripa ay Festu ay Bernisi anlindug gasfuan fagayu at malunggung sanya.

³¹ Ay kanya fagayu nu naduksun gkamatoan te, “Kafag taw we nafakamulun nusnga setaw at mauri sak gfabul ay gfaubung anya.”

³² Ay Agripa nalong sas Festu te, “Kafag taw yaman nafadasug at mamalong sas talun Ruma at fun, satu ro gfalfas watam anya.”