Fakamulun 24 - Fanawbuid tagsibaliwas Fakayabian

Ngay taw Udyu Nafantabugan sabaliwas Pablu

¹ Ay nu nlangfe limak menit, Ananias, tiba tungud fag tagfon fanggalangun andasug sas Sesaria, gadgaloan tibak fagtainan ay sik tagfasine mamalong at ngayan Tertulu. Ay kanya fagayu nafoyung sas fun Feliks at longan mauri sabaliwa Pablu.

² Ay nu nauro wa Pablu sas fun Feliks at daga salubangan, Tertulu gfasigad gfoyung sabaliwas Pablu. Glong te, “Mesug fag fun Feliks. Aroro sa am fagmafunanun, anke fagmabayanun ami maksvn ay siginan am fagmaseganamaun tam talun anke fagmasineun.

³ Sas fagayu furuan nasaful ami takatanya fagayu, ay maksvn nu guseganan ami.

⁴ Ay laman dimi son gfasalag emu, gfainfanyuan ami glong te, dungugani em longan.

⁵ “Tuy fag mangama kamauri sa sangay taw Udyu sas fagdaul daga, ay kanya sik tagfangguna sik gaban at ngayan Nasarenu.

⁶ Kanya gugatan namauri Dius at bale, nu katanya, nagamat ami anya ay namaurianan, gfaning em faugali.

⁷ Dewa katanya, at fun daul tagfawayan Lisyas, andasug ay nafabulun naago siginan emi.

⁸ Ay Lisyas nalong sa emi te, nusnga sinu at ke fanlonganan sai wa emu nu namasine. Ay nu gyainsafulun way o sa baliwa anya, sumaful ro wo at masuad em fagyafauriananun anya.”

⁹ Ay ngay taw Udyu nafadiuganan Tertulu at ngay nalong, ay kanya fagayu nafatuyan yangay te, “Matuyan, katanya wa fia.”

Pablu Gfoyung sis Salubangan Fun Feliks

¹⁰ Ay fun Feliks gyafe at daluap sas Pablu laman gfaringang, ay Pablu nabalus anya te, “Saful kwa te, ngaduge wan nu sik tagwabilug o ste fag talun, ay guseganan au gfoyung ku sadili sim daga salubangan.

¹¹ Nu gyasafulun way o, labi dua yay kmenit at kinlangfe ay ndasug au stes Erusalem, laman nanseg au Dius.

¹² Ay nusdi sayginan, ngay taw Udyu wa batang glag te, gfabadbaboan au sas nusnga sinu, ay kdi batang nansalag ngay taw sas Dius at bale, ay dewa sa sangay taw Udyu at bale fakafulan, ay anggan sas fagdaul Erusalem.

¹³ Kanya fagayu we famatuyan sa emu sabaliwa angku te, mauri au.

¹⁴ Ay dewa katanya, gfoyung au emu te, gseg au em mangaguyang at Dius, sik tagfaning au at foyungan sabaliwas Isus, kata kafag ngay taw at amatanganan te, at yud matuyan fag gaban fagafanudun. Ay gafanud kyangay fagayu at kinriruk sis Muisis at Faugali ay sis Dius at ngay taglong at rirukan.

¹⁵ Ku fagsegun kata yangay kafag ngay taw at fagsegun te, fagayu ban taw gdog yay gleleg, at mauri man ay at masine fag ngay taw.

¹⁶ Aroro katanya kabavn gugatan au gfasik matuyan ku amatanganan sas Dius at daga salubangan ay sas fagayu taw.

¹⁷ “Ay nu nlangfe ngayuk banwa, anfoli au sas Erusalem laman namosuk fanggubukun sa ku ngay kaiban tagidapan ay laman namon fanggalangun sas Dius.

¹⁸ Kafag ngay taw nalag angku sis Dius at bale gina au ntabu gfon fanggalangun sabaliwa nu gfasine ku sadili. Ginanya, tagsanya fag ngay taw wa ngayu ay di e awayan.

¹⁹ Ay ste yangay tibak taw Udyu tagsiginans afud talun Asya, kanya nangus fagayu tagfatuyan sa emu nusnga setaw at fantabugan sa angku at mauri.

²⁰ Ay aroro kafag ngay taw wa ste, tagstei way lang fag ngay taw tagfoyung ku ngay asalanan, ebi gina ginsaful angku.

²¹ Malgau ro, at foyungan te, gsalan au ebi ku nalong gina au sit ngay daga salubangan, aroro mabitsug au nalong te, ‘Gafanud au te, at ngay kinbul ban gdog yay gleleg, kanya wan fagnafoyungun angku katsi sim daga salubangan.’ ”

²² Ay aroro fun Feliks kasakan at fagsafulun sabaliwas Isus at foyungan, nafaragang yay nu ginsaful. Sanya ginan, Feliks nalong te, “Gina ban Lisyas fag tagfangguna tagfawayan andasug, gdog kyay ginsaful tuy fag mamalong.”

²³ Ay kanya gsugu sa sangay tagfawayan at fun te, “Uliti Pablu ay lag daul gfaksvn, ay lag gsalag at ngay fagadgalangan nu nansibo ay nu gfon at ngay fagayudanun.”

Pablu sis Salubangan Fun Feliks ay Drusila

²⁴ Nu nlangfe nu seyuk menit, Feliks gdog yay andasug ay nataban at bubay Drusila, sik taw Udyu. Ay kanya nafauro Pablu laman gdungugan at foyungan sabaliwas fagafanudun sas Isus, Dius at nafili fag Fun.

²⁵ Ay Pablu gfataglayun wa gugat nu gfoyung sabaliwas fagmatuyanun ay nu gfaragang at sadili, ay sabaliwa takadasug ban fag menit Dius nu ginsaful fagayu taw at ngay asalanan, fun Feliks anlimu maksvn ay nalong sas Pablu te, “Sabv yap ro nu gfoyung o! Nu e buknga kyay ban, gdog kyay gfauro emu.”

²⁶ Ay kanya malayun nu gfauro Pablu laman gfakamatoan, aroro gseg te, Pablu namon anya sik salapi.

²⁷ Ay nu nlangfe duak banwa, fun Feliks antubus wan, ay Pursyu Festu at naungbus anya. Ay fun Feliks naubun wan Pablu sisad ubung laman gfauseganan ngay taw Udyu.