Fakamulun 23 - Fanawbuid tagsibaliwas Fakayabian

¹ Ay Pablu nadama fia anya fagayu ay glong te, “Ku ngay faduksay, dasug katsi gugali ktua matuyan sis Dius at daga salubangan ay masine tua ku amatanganan.”

² Ay Ananias, tiba tungud fag tagfon fanggalangun, nasugu sat ngay malindug at munakbang sis Pablu te, “Falangi at bibig.”

³ Ay Pablu glong te, “Dius ro gfalang yangay emu, o fag takamaningan fag taw! Malunggung o sanya laman gfauri angku gfaning tam faugali, ay dewa katanya kamabo o tam faugali, aroro o wa fia at nafafalangan angku.”

⁴ Ay at ngay malindug sas day Pablu glong te, “Takatanya am nalong, gfauri o Dius at tiba tungud fag tagfon fanggalangun.”

⁵ Ay Pablu gbalus te, “Ku ngay faduksay, kwa nasaful te, kanya mangaro at tiba tungud fag tagfon fanggalangun. Aroro anriruk te, ‘Lag am glong at mauri sa ay ngay fun.’”

⁶ Ay Pablu nu nasaful te, tibak taw tagsanya taw Saduseu ay tiba yangay, taw Fariseu, mabitsug nu garingang sanya fag ngay tagfangguna te, “Ku ngay faduksay, sik taw au Fariseu, anggan ku mama taw yangay Fariseu. Ku fagafauriananun katsi aroro e fagsegun au te, fagayu ban taw dewa nbul, gdog yay gleleg.”

⁷ Ay nu ntabu wan Pablu nu garingang, ngay taw Fariseu ay Saduseu gbadbaboan, ay ngay tagfangguna wa gdiuganan at ngay amatanganan.

⁸ Aroro taw Saduseu wa gafanud te, at ngay kinbul gdog yay ban gleleg, ay wa yangay gafanud te, e tagbarita ay e falad. Ay dewa katanya, taw Fariseu gafanud tua fagayu takatanya.

⁹ Ay ankaksvn kafag ngay taw at fagudguroanun. Ay tibak taw Fariseu at tagfoyung Muisis at Faugali malindug ay gfafanud te, “Wami e nalag tuy fag taw at asalanan. Malgau sik falad, mannga sik tagbarita at nafakamatoan anya.”

¹⁰ Ay nu nkaksvn wan kafag duak gaban nu gbadbaboan, tagfawayan at tagfangguna kalimu te, kafag ngay taw maradranggutan Pablu. Aroro katanya nafaduksun at ngay tagfawayan laman gago Pablu siginan sa ngay taw ay gtabanan sa sangay tagfawayan at fagmafulan fag bale.

¹¹ Ginanya fag yabi tam Fun malindug sis Pablu at day tigyangan ay glong te, “Faksvni am amatanganan. Nusnga setaw yay nu gfoyung o ku longan iste sis furuan Erusalem, katanyai yangay ban am fakamulun sas furuan Ruma.”

Ngay Taw Udyu at Algan nu Namabul Pablu

¹² Balabag di ngay taw Udyu maful ay masadi gfatuyanan te, “Ya ban tam nanfangon ay nanginum yakmay tam nafabul Pablu.”

¹³ Tagfatuyanan katanya, gtungud yay ufatk safuluk mangama.

¹⁴ Ay kanya fagayu glo sa sangay fun tagfon fanggalangun ay sas taw Udyu at ngay fagtainan, ay glong te, “Maksvn nu gfatuyanan ami te, ya ban mi gfangon yakmay mi nafabul Pablu.

¹⁵ Ay katsi am ay anggan tam ngay funan eti sa tagfawayan at tagfangguna te, dogi yap falfasi Pablu sa ay salubangan kata nu nanginsaful am matuyan sabaliwa anya, ay mafalganan ami gfabul anya gina yud andasug ste.”

¹⁶ Ay Pablu at mangwai nadungug kafag algan ay glo wa vtv sa sangay tagfawayan at fagmafulan fag bale ay nafoyung sas Pablu at nadungug.

¹⁷ Ay Pablu guro sik fun sirut ay glong te, “Agvd, nangufud yap o tuy fag baguama sa am tagfangguna. E fagyalongunun sa anya.”

¹⁸ Ay kanya nangufud sat tagfangguna ay kafag fun sirut glong te, “Pablu, at maubungan, nasugu angku sa emu laman nantaban au sa emu tuy fag baguama, aroro e fagyalongunun sa emu.”

¹⁹ Ay at tagfangguna nated kafag baguama at take ay nataban sa sik afud yud e gdungug nu gkamatoan, ay nainto te, “Nataw am fagyalongunun sa angku.”

²⁰ Ay kafag baguama nabalus anya te, “Balabag ban tibak taw Udyu nanget sa emu te, ‘Ansadi wami te, falfasi wan Pablu sa em ngay tagfangguna at daga salubangan kata nu nanginsaful o at matuyan sabaliwa anya.’

²¹ Ay lag o gfandungug at fagetun aroro gtungud yay ufatk safuluk mangama gsuksuan laman namalabag ay namabul Pablu. Kanya fag ngay taw nafatuyanan wa te, ‘Ya ban mi nanfangon ay nanginum yakmay ban mi nafabul Pablu.’ Katsi kafag ngay taw mafalganan wan ay gfanya am algan.”

²² Ay kafag tagfangguna glong anya te, “Loi wan ay lag glong sas nusnga sinu fag taw te, nafoyung o sa angku takatatuy.”

Nataban Pablu sas Fun Feliks

²³ Tagfawayan at tagfangguna nauro duak fun tagfawayan ay nalong te, “Falganani duak sandank tagfawayan gadgaloan fituk safuluk taw mesa gsakay sis kabayu ay duak sandank taw ke ngay bangko, laman glo sas Sesaria katsi ro sad yabi sfasiam.

²⁴ Falganani sik ngay kabayu famuba ro Pablu ay anggan at ngay ufud. Alagai fia anya laman andasug manabayan sas fun Feliks.”

²⁵ Ay tagfawayan at tagfangguna nariruk sas fun Feliks te,

²⁶ Siginan angku Klaudyu Lisyas, sa emu at matuyan fag fun Feliks, mabayan tuo nangus.

²⁷ Tuy fag mangama, tibak taw Udyu nagamat anya, gfabul wa ma. Ay gina gafabulun, au ay ku ngay tagfawayan nalag ami anya, ay nafalangfe au anya aroro saful au te, kanya sik taw Ruma.

²⁸ Ay nataban au anya sas taw Udyu at ngay tagfangguna laman nangasaful au te, nataw at asalanan.

²⁹ Ay nasaful au te, tuy fag taw at mamalong sabaliwa kafag ngay taw at faugali, ay dewa katanya we asalanan at sak gfabul ay mannga gfaubung anya.

³⁰ Ay nadungug au te, e algan ganamabulun anya, ay nu katanya, ang kwa vtv nafataban sa emu. Ay nalong au sa sangay tagfantabugan anya te, sai waban emu nu namoyung at longan mauri sabaliwa kafag taw.

³¹ Ay gfaning Klaudyu Lisyas at suguan, ginanya fag yabi, ngay tagfawayan nataban Pablu sas furuan Antipatris.

³² Ay sbalabag sirut, ngay tagfawayan tagsaful gsakay sis kabayu gfataglayun gtaban Pablu, ay tibak tagfawayan anfoli way sat fagmafulan fag bale.

³³ Ay ngay tagtaban Pablu nu ndasug sas furuan Sesaria, nafosuk at ba rirukan sas fun Feliks ay nafadasug Pablu sa anya.

³⁴ Ay nu natap kafag rirukan, fun Feliks nainto Pablu te, “Daginan o fag talun?” Ay nu nasaful te, siginans Silisya,

³⁵ nalong sa anya te, “Ggubuk kban emu sam mamalong nu ndasug at ngay tagfantabugan sa baliwa emu.” Ay kanya nafaulit Pablu sis Erudes at bale daul.