Fakamulun 22 - Fanawbuid tagsibaliwas Fakayabian

¹ Sanya ginan, Pablu nalong te, “Ku ngay faduksay ay ku ngay fagtainan, dungugani ku famayamag sabaliwa ku sadili!”

² Fagayu taw nu nadungug nu garingang sas Ebreu fag fangaringang, kaugat nu maragangan. Ay Pablu nalong te,

³ “Sik taw Udyu au, ay ansalug au sis Tarsu, sis talun Silisya, ay an-gurang stes Erusalem. Nu gadal au ste yangay, ay ku takamoyung Gamaliel. Kanya nafoyung sa angku Faugali tam ngay mangaguyang at nafaning yangay. Ay gfaning kyangay ayu at maseganama gfakamulun sa tam Dius.

⁴ Nafauri au ay gugatan namabul fagayu tagfaning ngay foyungan sabaliwas Isus. Ay nagamat au fagayu mangama ay mangena, ay nafaubung.

⁵ Tam tiba tungud fag tagfon fanggalangun ay fagayu tam ngay fagtainan mafatuyan ku ngay nalong. Kafag ngay fagtainan nafon angku sik rirukan laman sanya fag ngay taw Udyu. Ay aroro siginan kafag rirukan, nalao au sas Damasku laman nanggamat fagayu tagafanud sas Isus ay namuba sties Erusalem, laman namaurianan.

Pablu Gfoyung sabaliwa nu Gafanud sas Isus

⁶ “Gina swabilug menit nu munakbang wami sas Damasku, sik yamag daul masulo siginans banwa nayamag si em ligung.

⁷ Ay anlub kway lang sas daga ay nadungug au sik aringang glong angku te, ‘Saulu, Saulu, wain am fagfauriun angku?’

⁸ “Ay gbalus au te, ‘Ku Fun, sinu o?’ “Ay glong angku te, ‘Au wan Isus siginans Nasaret am fagfauriun.’

⁹ Ku ngay ibama nalag kafag yamag, dewa katanya, wa gdungug kafag aringang tagfakamatoan angku.

¹⁰ “Ay nainto kyay fia te, ‘Ku Fun, Tain ban ku fakamulun?’ “Ay tam Fun gbalus angku te, ‘Malindugi ay loi wan sas Damasku, ay e gfoyung ro sa emu fagayu ku nafalganan am fagnamakamulunun ban.’

¹¹ At kaksvnan nu masulo, kwa glag ya. Nu katanya, ku ngay ibama natabanan angku sas Damasku.

¹² “Ay sanya sik taw at ngayan Ananias, kanya gafanud sas Dius ay gfaning Muisis at Faugali, ay fagayu taw Udyu tagbanwan sanya gsuyu anya.

¹³ Kanya ndasug sa angku ay malindug si ku day tigyangan ay glong angku te, ‘Faduksay Saulu, glag wa ro wo.’ Ay arodi vtv glag kwan ay nalag au anya.

¹⁴ “Ay kanya nalong sa angku te, ‘Tam mangaguyang at Dius nafili emu laman sumaful o at fakaylatun, ay lumag o ay dumungug tam Isus, at Matuyan fag taw at aringang.

¹⁵ Aroro namoyung ban o sa sangay taw am nalag ay am nadungug.

¹⁶ Ay nataw am fagfanyaun katsi? Alindugi wan ay nangasurung wo, ay uroi sa tam Fun laman gfalyam am ngay asalanan.’

Pablu nu Kamoyung sat Yud Udyu fag ngay Taw

¹⁷ “Sanya ginan, anfoli au sas Erusalem ay kaduge au gdarangin sis Dius at bale, anke taginfan au,

¹⁸ ay nalag au tam Fun, ay nalong sa angku te, ‘Sakiti, loi wan sanyaginans Erusalem, aroro tagste fag ngay taw wa kaylat gafanud sa am foyungan sa baliwa angku.’

¹⁹ “Ay nabalus au te, ‘Ku Fun, wain kafag ngay taw way gafanud ay nasaful oma te, narvbvy au ngay taw Udyu at ngay bale fakafulan laman nanggamat ay namaurianan ngay taw tagafanud sa emu?

²⁰ Ay gina gfabul Esteban, am tagfatuyan, malindug au sanya ay gfadiuganan kyangay anya fagayu, ay kanya fagayu nafaulit sa angku at ngay lanbung.’

²¹ “Ay tam Fun nalong angku te, ‘Loi wan, aroro gsugu au emu sa tangayayu fag talun, sas yud Udyu fag ngay taw.’ ”

²² Ay Pablu fagnalong di katanya, ngay taw wa kaylat ya gdungugan anya. Ay kanya fagayu guro te, “Fabuli wan kafag taw! At masine, kanya lag nangus gleleg ya!”

²³ Ay ngay taw gina guro, nafamayabyaban way lang at ngay lanbung ay naukas dafug sat tungud.

²⁴ Tagfawayan at tagfangguna nasugu te, “Tabani anya sas fagmafulan fag bale.” Ay nasugu yangay te, “Falangi anya laman umsaful te, wain kafag ngay taw at faguroun anya.”

²⁵ Ay gina gsiuk, laman namalang, Pablu nainto sa sik tagfawayan at fun sirut sanya at malindug te, “O gfaning faugali nu gfalang sik taw Ruma deyud e gfatuyan te, kanya e asalanan?”

²⁶ Kafag fun sirut nu nadungug katanya, nalo sat tagfangguna ay glong te, “Tain ro am fakamulun? Aroro tuy fag taw, sik taw way Ruma.”

²⁷ Ay kafag tagfangguna ankakbang sas Pablu ay nainto anya te, “O sik taw Ruma o?” Ay Pablu gbalus te, “Sabv.”

²⁸ Ay kafag tagfangguna glong te, “Ngayu ku nabayad laman sik taw Ruma au.” Ay Pablu glong te, “Sik taw Ruma au siginan ngay nu kasalug au.”

²⁹ Ay at nanginto anya fag ngay tagfawayan wa nananginto ya, ay at tagfangguna anlimu yangay aroro nafasiuk Pablu, aroro kanya mangaro sik taw way Ruma.

Pablu sis Taw Udyu at ngay Funan at Daga Salubangan

³⁰ Balabag di, tagfawayan at tagfangguna nafalfas wan Pablu aroro kaylat gyasafulun te, nataw Pablu at malong sa sangay taw Udyu. Nu katanya, kanya nafauro ngay tagfon fanggalangun ay taw Udyu at ngay tagfangguna. Sanya ginan, kafag tagfangguna tagfawayan nasugu te, luasi Pablu at siuk sit take, ay arodi nafasalubang anya sa sangay taw laman gfayamag.