Fakamulun 21 - Fanawbuid tagsibaliwas Fakayabian

Pablu Ganangadasugun sas Erusalem

¹ Ay nu nalong wami sa anya fagayu te, “Glo wami,” nasakay wami sas sakayan lino laman nangadasug sas furu Kus. Balabag di, andasug ami sas furu Rudas, ay sanya ginan, nataglayun wami sas furuan Patara.

² Ay nu ndasug wami, natunggu ami sik sakayan lino tagsas Fenisya ay nasakay wami.

³ Ay kaduge ami gsakay, nalibanawan ami furu Sipre, dewa katanya, wami nasanya, nasa waymi sfasiunan baliwa kafag furu ay nataglayun sas Sirya.

⁴ Ay nu ndasug wami sanya, narvbvy ami sanya fag ngay tagafanud, ay sanya yaymi fituk menit. Ay siginan at Masine fag Falad at gubuk, ngay tagafanud nalong sas Pablu te, “Lag sas furuan Erusalem.”

⁵ Ay nu nlangfe sik linggu, nalo wami sanya ginan laman gfataglayun wami glao. Ay fagayu tagafanud anggan at ngay sisian nanangufud yay emi sas day furuan sas tigyangan dagat. Sanya ginan, natudan ami laman gdarangin.

⁶ Ay sanya ginan, nalong ami te, “Glo wami,” ay nasakay ami sas sakayan lino ay kanya fagayu guli wan.

⁷ Siginans furuan Tiru, nafataglayun ami glao laman nangadasug sas Tulemaida. Ay nu ndasug wami, nafakamatoan ami sanya fag ngay tagafanud, ay sanya yaymi sik menit.

⁸ Balabag di, glo wami ay andasug ami sas Sesaria ay nataglayun sas Felipe at bale. Felipe, sik tagbuba at Masine fag Barita, ay kanya at nafili ebi at sadi sis Erusalem.

⁹ Ay kanya e ufatk baguina, kanya tanan wa Dius at taglong.

¹⁰ Nu nlangfe nu seyuk menit, sik taglong at ngayan Agabu andasug. Kanya siginans talun Udea.

¹¹ Ay kanya nanangaful sa emi ay nabul Pablu at famutus fagwan, ay nasiuk at ngay darafa ay at ngay take. Kanya glong te, “Kata at Masine fag Falad at nalong, katatuy ban ngay taw Udyu sis Erusalem at fakamulun sat ke famutus fagwan, ay namuba ban anya sas yud Udyu fag ngay taw.”

¹² Ay nu nadungug ami katanya, fagayu ami nafainfanyuan ami nalong sas Pablu te, “Lag gfataglayun nu glao sas Erusalem.”

¹³ Ay Pablu nabalus te, “Wain ay fagwaywayun? Lag am gfamomuy ku amatanganan. Aroro mafalganan au nangasiukan ay nangabul sas Erusalem aroro sa tam Fun Isus.”

¹⁴ Dewa katanya, wami mafaragang Pablu at algan, nu katanya, nalong waymi lang te, “Nangus tam Fun at fakaylatun at kumfasludan.”

¹⁵ Nu nlangfe nu seyuk menit, nafalganan ami laman glao sas Erusalem.

¹⁶ Ay tibak tagafanud siginans Sesaria nangufud emi. Kanya nataban emi sas Mnasun at bale. Mnasun siginans Sipre, ay kanya at sadi taguna tam Isus at tagadal.

Pablu Andasug sas Erusalem

¹⁷ Nu ndasug ami sas Erusalem, sanya at ngay tagafanud guseganan mandi gfasakbo emi sat bale.

¹⁸ Balabag di, nanangalo ami Pablu laman nansibo Santiagu. Anggan ngay fagtainan bale fakafulan sis Erusalem sanya yangay.

¹⁹ Sanya ginan, Pablu nalong sanya fagayu te, nangus manabayan tuam. Arodi, nafoyung Dius at ngay nafakamulun sas yud Udyu fag ngay taw, siginan Dius at gubuk anya.

²⁰ Kafag ngay taw nu nadungug, kanya fagayu naseg Dius. Ay nalong sas Pablu te, “Faduksay, katsi, ngay taw Udyu, ngayu wan tagafanud sas Isus, ay kanya fagayu maseganama nu gfaning Muisis at Faugali.

²¹ Ay kanya fagayu nadungug yangay te, gfoyung o unu sa sangay taw Udyu tagbanwan sa tibak talun te, lag gfae fakatoglagan ya at ngay sisian, ay lag gfaning ya tiba tam faugali.

²² Nu katanya, tain at masine tam fakamulun? Aroro kanya fagayu gtuyan wa fia te, katsi ste wo.

²³ Nu masine di, fakamuluni ro em longan sa emu. Ste e ufatk mangama at ke nafatuyanan sas Dius.

²⁴ Dewa gina ro nangalo o kafag ufatk mangama ay namakamulun ro am gfaning Muisis at Faugali nu gfasine at sadili. Ay o yangay ro tagbayad gina am gfakamulun, laman anggan ro kafag ufat mafaufo yangay. Takatanya fag balyawvtan, fagayu taw sumaful te, at nadungug fag barita sa baliwa emu, di matuyan, ay sumaful yangay te, gfaning tuo Muisis at Faugali.

²⁵ Ay nu sabaliwa at yud Udyu fag ngay taw tagafanud, nariruk ami sa anya fagayu te, ‘Lag kon fakonun at nafon sa sangay fagsegan ay taguk, ay fagbaugun at kinbul at yamas nu dway nafataguk ya, ay lag gfanugtug ay lag namatugtug.’ ”

²⁶ Ay balabag di, Pablu gtaban kafag ngay mangama ay gfasine at sadili gfaning Muisis at Faugali. Sanya ginan, Pablu nalao sas Dius at bale laman namasaful te, kaduge ban nya nu gfasine at sadili, ay laman galay at sadi manamon at fanggalangun fag ngay fagbaugun.

Taw Udyu Nagamat Pablu

²⁷ Nu gakatabuun wan kafag fituk menit, sik ngay taw Udyu nalag Pablu sis Dius at bale. Ay kanya fagayu nabayad ngay taw tagsis Dius at bale, laman nanggamat Pablu.

²⁸ Ay kanya fagayu guro te, “Em kaiban fag ngay taw Israel, gubuki emi! Tuy fag taw gfoyung at yud matuyan sa tam faugali, ay sas Dius at bale dewa nday at fakadasugan. Saman kanya, nataban ya sas Dius at bale sik yud Udyu fag ngay taw, takatanya at fakamulun, gfauri way ste fag afud at yud e malong.”

²⁹ (At fagnalongun katanya, aroro nalag Trufimu fag taw Efesu nu nangalo Pablu sas Erusalem, at amatanganan yangay te, Pablu nataban anya sas Dius at bale.)

³⁰ Nu katanya, fagayu taw sis Erusalem wa mabayan at ngay amatanganan, ay kanya fagayu, nasas Dius at bale laman nanggamat Pablu. Ay nu nagamat wan, naguyudan ay nafaduksun, ay nadingding wa vtv Dius at sakbawan bale.

³¹ Ay kanya fag ngay taw at algan namabul wa fia Pablu ay andasug sik barita sa tagfangguna tagfawayan te, fagayu taw sis Erusalem gawayan.

³² Ay kanya masakit nu gtaban tibak tagfawayan ay at ngay fun sirut, ay kanya fagayu nasas sangay taw. Ay kafag ngay taw nu nalag kafag fun ay at ngay tagfawayan, nafaragang nu gfalang Pablu.

³³ Kafag tagfangguna ankakbang ay nagamat Pablu ay gsugu te, “Siuki anya duak salambitan.” Ay nainto te, “Sinu tuy fag taw ay nataw at nafakamulun?”

³⁴ Dewa katanya, kafag tagfangguna nu gdungugan kafag ngay taw at famalus, wa gdiuganan. Ay aroro kafag ngay taw wa manabayan, kafag tagfangguna tagfawayan wa saful te, nataw fia at matuyan, ngay taw fakatanyaun. Nu katanya, kanya nasugu at ngay tagfawayan laman namuba Pablu sat fagmafulan.

³⁵ Ay kafag ngay tagfawayan nu ndasug wan sas agdan tagsas fagmafulan, naurugan wa daul Pablu aroro sa kafag ngay taw maksvn nu kadotama.

³⁶ Kanya fagayu gguyan Pablu ay guro te, “Fabuli anya!”

Pablu Gfoyung sa sangay Taw

³⁷ Ay gina e ganamasakboun wa Pablu sas tagfawayan at fagmafulan fag bale, Pablu glong sanya fag tagfangguna te, “O masine nu gfakamatoan au emu?” Ay kafag tagfangguna gbalus te, “O saful o Griegu fag fangaringang?

³⁸ Nu glong au, sik taw o tagsiginans Igiptu, at nafangguna sik awayan laman kamabo at fun. Kanya, nataban sat yud e taw ufatk libuk mangama, ay kanya fagayu maseganama ay e ngay famawayan.”

³⁹ Ay Pablu nabalus te, “Sik taw Udyu au, ay ansalug sis Tarsu, talun Silisya at fagagbilugun. Tarsu, sik takadungug fag furuan. Ay katsi gfainfanyuan au glong sa emu te, o kwa masine garingang sa sangay taw?”

⁴⁰ Ay kafag tagfangguna tagfawayan naylat. Nu katanya, Pablu nanangalindug sas sik siklang agdan ay gyafe sa sangay taw te, lag am garingang. Ay kafag ngay taw nu maragangan wan, Pablu naringang sa anya fagayu sas Ebreu fag fangaringang.