Fakamulun 19 - Fanawbuid tagsibaliwas Fakayabian

Pablu sis Furuan Efesu

¹ Kaduge Apulus sis furuan Kurintu, Pablu nalao sa sangay buksul sanya fag afud talun ay andasug sas furuan Efesu. Ay nalag sanya sik ngay tagafanud,

² ay nainto sa anya fagayu te, “Siginan nu gafanud am sas Isus, o at Masine fag Falad siwa ayu?” Ay kanya fagayu nabalus te, “Duan, nusdi tagsaful te, e Masine fag Falad.”

³ Ay Pablu nainto te, “Nu katanya, tain fag balyawvtan nu kasurung am?” Ay kanya fagayu nabalus te, “Nafaning ami Uan at foyungan nu gfasurung taw.”

⁴ Ay Pablu nalong te, “Uan nu gfasurung taw, sik fakatoglagan te, naubun wam ay asalanan. Ay Uan nalong sa sangay taw te, ‘Afanudi sa ban tagguyan angku fag taw,’ at masuad te, Isus.”

⁵ Ay kafag ngay tagafanud nu nadungug katanya, kanya fagayu ansurung sa tam Fun Isus at ngayan.

⁶ Sanya ginan, Pablu nafatayuk at daluap sa kafag ngay taw, ay at Masine fag Falad antayuk sa anya fagayu ay naringang sa tibak fangaringang ay mafafoyung Dius at longan.

⁷ Malgau labi duak mangama at maful sanya.

⁸ Ay kayu Famiangalay fag Menit kaduge tuluk magdanun, Pablu nanakbo sanya sas taw Udyu at bale fakafulan. Ay kanya maseganama nu gfoyung ay gfayamag sabaliwa tam Dius nu gfagtainan.

⁹ Dewa katanya, tibak taw kamaogatun at ngay amatanganan, sarokta wa kaylat gdungugan, ay kanya fagayu gfasaful sas fagngayuan te, wa matuyan at foyungan sabaliwas Isus. Nu katanya, Pablu ay anggan sanya fag ngay tagafanud nalao wan sanya ginan fag bale fakafulan, ay kayu menit, Pablu nangaful sas Tiranus at fagagbilugun fag fagadalan, laman gfataglayun namoyung sas fagngayuan taw.

¹⁰ Katanya at fakamulun kaduge duak banwa, ay fagayu taw Udyu ay taw Gresya tagbanwan sis talun Asya nadungug tam Fun at longan.

Eskeba at ngay Baguama

¹¹ Ginanya, Dius nafasure at madulo fag ngay fakamulun siginan nu gagbilug Pablu.

¹² Pablu at buba dewa sik fangarus fangenit ay sik ramit lang, nu nafatayuk sat ngay ke fakasaitun, kafia, ay at mauri fag ngay falad glao sanya ginan fag ngay taw.

¹³ Ay sik ngay taw Udyu gaiyan yangay at mauri fag falad siginan sa ngay taw. Kanya fagayu kamaningan gagbilug tam Fun Isus at ngayan laman gaiyan ngay mauri fag falad, glong te, “Sas Isus at ngayan, Pablu at fakamoyungun, gsugu au te, loi wan sanya ginan!”

¹⁴ Gsud yay Eskeba at baguama fag fitu at fakamulun. Eskeba sik taw Udyu, sik fun tagfon fanggalangun.

¹⁵ Ay kafag mauri fag falad nabalus te, “Toglag kway Isus ay saful kway Pablu, ay am, sinu am?”

¹⁶ Kanya fag mangama ke mauri fag falad natos sanya fag fituk taw ay nababo anya fagayu, ay kafag ngay taw gduksun sanya ginan fag bale ay gtarung malulasan ay gatagukun.

¹⁷ Ay fagayu taw Udyu ay taw Gresya tagbanwan sis Efesu nadungug takatanya, ay andasug sik fakalimuun daul sa anya fagayu. Ay ankugat nu gseg tam Fun Isus.

¹⁸ Ay ngayuk tagafanud nafoyung at ngay mauri fag fakamulun.

¹⁹ Ay tibak taw at ke balugbugan nafaful fagayu at fagtapan, ay nairug sis fagngayuan at daga salubangan. Ay kafag ngay fagtapan nu kabayad, limak sandank libuk pisu.

²⁰ Nu katanya, ankugat yay nu kafagdaul Dius at longan nu mabalyanan.

²¹ Nu nfasludan wan takatanya fagayu, Pablu anke algan laman glao sas Erusalem, dewa katanya, taguna nandalan yay Masidunya ay Akaya. Ay namatangan yangay te, sa yay bans Ruma nu nanansibo wan Erusalem.

²² Ay Pablu nafaguna Timuteu ay Erastu sas Masidunya, kafag duama taggubuk anya sas Dius at fakamulun, dewa katanya, sia anfamato yay sis Asya.

Awayan sis Furuan Efesu

²³ Ay ginanya, anke awayan sis furuan Efesu sabaliwa sangay foyungan sabaliwas Isus.

²⁴ Ay sanya sik taw at ngayan Demetriu, kanya sik taw takawat sanbung salapi. Kanya ay at ngay fagsuguan kawat ngay fagnansegan ayu sirut gfaning Artemis fag fagsegan at bale fagnansegan. Ay at ngay nawat nafaramraman anya fagayu.

²⁵ Nu katanya, Demetriu nafaful at ngay fagsuguan ay tibak tagsaful kawat, ay nalong te, “Ku ngay ibama, saful tam te, takatatuy tam fakamulun, kae ramraman tua tam.

²⁶ Ay nalag wam ay nadungug te, Pablu nagewan ngayuk taw sis furuan Efesu ay sas fagdaul talun Asya. Kanya gfoyung te, taw at nawat fag ngay fagsegan bunwa at matuyan fag fagsegan.

²⁷ Nu katanya, namatangan au te, wa ban tam e fagbulun ya salapi, ay ngay taw ban gamatangan yangay te, we tungkul tam ngay nawat. Saman ya kanya, ngay taw ban kauri wan tam fagsegan Artemis at bale fagnansegan, ay anggan wa ban e tungkul ya, ay fagayu ban taw tagseg anya stes Asya ay sas fagdaul daga, wa gseg ya.”

²⁸ Ay ngay takawat sanbung salapi nu nadungug takatanya, maksvn nu kadotama ay gfasigad gudguroan te, “Mabalyanan Artemis, taw Efesu at fagsegan.”

²⁹ Nu katanya, kafag fagbadbaboanun anrapyag sas fagdaul furuan. Ay kafag ngay taw nagamat Gayu ay Aristarku, Pablu at ufud ay taw Masidunya. Ay kaduge kafag ngay taw gfaurianan duama, ngay taw glagyu siginan at fagmafulan.

³⁰ Ay Pablu ganangaringangun oma, dewa katanya, ngay tagafanud sanya nasalag way.

³¹ Anggan tibak fun sirut sanya fag talun, Pablu at ngay fagadgalangan, nasugu sik longan sa anya te, “Lag yap o gtaglayun sanya.”

³² Fagayu taw sanya fag furuan, ankugat yay nu yud manabayan. Ay kafag ngay taw guro, ay nusnga setaw way lang at nalong, aroro tangayu wa nasaful at fagmafulun at masuad.

³³ Ay sanya e sik taw at ngayan Aleandru. Ay tibak taw nafasas fagunan laman namayamag te, ngay taw Udyu wa kataip sas Pablu at ngay fakamulun. Ay kanya nayafe sa sangay taw te, lag garingang.

³⁴ Ay fagayu taw nu nasaful te, kanya sik taw Udyu, kanya fagayu guro, te, “Mabalyanan Artemis, taw Efesu at fagsegan!” Ngay taw nu guro at kadugean, duak uras.

³⁵ Arodi, ngay tagfangguna sanya fag furuan, nanamaragang yay kafag ngay taw nu guro. Ay glong te, “Em ngay faduksay fag ngay taw Efesu, fagayu taw nasaful wa te, itam wan tagalaga tam fagsegan Artemis at bale fagnansegan, ay anggan at yud e malong fag gang at kintong siginans banwa.

³⁶ Aroro fagayu taw nasaful wan takatanya, amatangani tua fia, dangay gabanganan.

³⁷ Dewa am nataban ste kafag ngay taw, di e nabul siginan tam bale fakafulan, ay di e nalong at mauri sa tam fagsegan.

³⁸ Demetriu ay anggan at ngay ufud nu e mamalong way sas nusnga sinu, e bale way tam fagfasinean ay e tagwabilug laman sanya nu gfasine.

³⁹ Nu e fakaylatun yayam gfasine, fatunggui gina sis fagngayuan taw.

⁴⁰ Takatatuy tam fakamulun, taw Ruma at ngay tagfangguna, umke algan sa antam laman namawayan.”

⁴¹ Nu ntabu wan nu garingang katanya, nafauli wan fagayu taw.