Fakamulun 18 - Fanawbuid tagsibaliwas Fakayabian

Pablu sis Furuan Kurintu

¹ Ay sanya ginan, Pablu nalao wan siginans Atenas ay nataglayun sas Kurintu.

² Ay nalag sanya sik taw Udyu at ngayan Akila tagsiginans Puntu. Kanya bagu yay kadasug siginans talun Italya, gadgaloan at bubay Prisila aroro fun Klaudyu naiyan fagayu taw Udyu siginans furuan Ruma. Ay Pablu nanansibo dadwa sat bale,

³ ay aroro Pablu sik takawat yangay bale ramit kata dadwa, kanya gbanwan yangay sanya ay gfakamulun.

⁴ Ay galay Famiangalay fag menit Pablu gfoyung sa sangay taw Udyu at bale fakafulan, laman ngay taw Udyu ay ngay taw Gresya gafanud yangay sas Dius at Nafili.

⁵ Silas ay Timuteu nu ndasug wan siginans talun Masidunya, Pablu nafalganan fagdaul at buknga laman kamoyung, ay gfoyung sa sangay taw Udyu te, Isus, Dius at nafili fag Fun.

⁶ Dewa katanya, ngay taw Udyu wa naylat Pablu at foyungan abat ngate nafalingun way, nu katanya, Pablu nafagfag at lanbung sik fakatoglagan te, kafag ngay taw mauri. Sanya ginan, kanya nalong sa anya fagayu te, “Ay kakurangan yay ban, nu nfaurianan ban am. Ay siginan ban katsi nu nanfamoyung au, sa ways yud Udyu fag ngay taw.”

⁷ Ay sanya ginan Pablu nalo wan siginans taw Udyu at bale fakafulan, ay nanamanwan sas Tisyu Ustu at bale, munakbang sanya fag bale fakafulan. Tisyu sik tagseg yangay Dius. At bale munakbang sis taw Udyu at bale fakafulan.

⁸ Krispu, tagfangguna sanya fag bale fakafulan, ay at fagyafunan gafanud sa tam Fun, ay ngayuk taw Kurintu at nafanud ay at kinsurung nu nadungug Pablu at foyungan.

⁹ Sik yabi, tam Fun naringang sas Pablu sa sik taginfan te, “Lag kalimu, ay lag gfaragang nu kamoyung o.

¹⁰ Aroro gufud au gugat emu. We mafauri emu aroro ngayu tua tagfaning angku ste fag furuan.”

¹¹ Nu katanya, Pablu nabanwan yay sis Kurintu sik banwa ay unumk magdanun laman kamoyung Dius at longan.

¹² Ay gina Galyu gfunan talun Akaya, ngay taw Udyu ansadi laman nanggamat Pablu ay namuba sa tagwabilug at bale.

¹³ Ay kafag ngay taw glong te, “Kanya ggewan ste fag ngay taw laman nanseg Dius, dewa katanya, wa gfaning kata tam faugali.”

¹⁴ Ay Pablu nu nangaringang wan, Galyu nalong sa sangay taw Udyu te, “Am fag ngay taw Udyu, ay mamalong nu sa tua baliwa sik asalanan ay mannga sik maksvn fag fagmauriun, masine nu gdungugan au ayu.

¹⁵ Dewa katanya, kafag mamalong nu sa way baliwa ngay longan, ngay ngayan ay ngay faugali, kwa kasalag, ay kwa magubuk ayu.”

¹⁶ Ay Galyu naiyan Pablu ay taw Udyu siginans bale fagfawabiluganan.

¹⁷ Ay fagayu taw nagamat Sustenes, tagfunan taw Udyu at bale fakafulan, ay nafalang anya sis day tagwabilug at bale. Ay Galyu wa nsalag.

Pablu nu Kafoli sas Antiukya

¹⁸ Sanya ginan, Pablu nabanwan yay sis Kurintu ngayuk menit, ay nu nalong wa sanya fag ngay tagafanud te, glo kwan, kanya nasakay gasfuan Prisila ay Akila sa sik sakayan lino tagsas Sirya. Ay nu ndasug wan sas furuan Senkrea, nafagud at buk laman gfafasludan at fatuyanan.

¹⁹ Ay nu ndasug sas Efesu, Pablu naubun wan Prisila ay Akila, ay nasakbo sas taw Udyu at bale fakafulan ay gfadfayamagan sanya fag ngay taw Udyu.

²⁰ Ay kanya fagayu get sas Pablu te, “Banwani yap ste.” Ay dewa katanya, Pablu wa naylat.

²¹ Ay Pablu nu galoun wan sanya ginan fag ngay taw, nalong te, “Kafoli kyay ban stae, tam Dius nu kaylat.” Ay Pablu nalo siginans Efesu ay nasakay sas sakayan lino.

²² Pablu nu ndasug sas Sesaria, naundaud sas Erusalem ay nafakamatoan ngay tagafanud sanya, ay nataglayun sas Antiukya sis talun Sirya.

²³ Ay Pablu wa glugo nu sanya, sanya ginan nalao wan laman nansibo sis talun Galasya ay Frigya at fagagbilugun fag ngay furuan laman namaksvn at ngay tagafanud at fagafanudun.

Apulus Kamoyung sis Efesu ay sis Kurintu

²⁴ Ay sik taw Udyu andasug sas Efesu, at ngayan Apulus, kanya siginans Aleandria. Kanya ngayu at nagadalan sabaliwas Dius at longan.

²⁵ Ay e nafoyung yangay sa anya sabaliwa tam Fun at balyawvtan, ay kanya maseganama nu kamoyung, ay kasakan at foyungan sabaliwas Isus. Dewa katanya, at fagsafulun sabaliwas fakasurungun, kata way Uan at nafoyung fag fakasurungun.

²⁶ Kanya maseganama nu kamoyung sis taw Udyu at bale fakafulan. Ay Prisila ay Akila nu nadungug, kanya nataban Apulus laman kanya gfayamag at fagyudun yay saful fag foyungan sabaliwas Dius.

²⁷ Ay Apulus nu galoun wan sas talun Akaya, at ngay tagafanud sis Efesu nafaksvn at amatanganan ay nariruk sa sangay tagafanud sis Akaya laman gfasakbo fia anya sat bale. Ay Apulus nu ndasug sanya, gbia at fanggubukun sa sangay taw at nafanud siginan Dius at fagmagalangun.

²⁸ Ngay taw Udyu wa mafabalus ya Apulus at foyungan, aroro at foyungan gfatuyan kata Dius at Longan te, Isus, Dius at nafili fag Fun.