Fakamulun 16 - Fanawbuid tagsibaliwas Fakayabian

Timuteu Nangalo Pablu ay Silas

¹ Sanya ginan, Pablu ay anggan at ufud nataglayun ay andasug sas furuan Derbe ay Listra. Ay sanya, e sik tagafanud at ngayan Timuteu, at mina sik taw Udyu ay sik tagafanud yangay, ay at mama sik taw Gresya.

² Ay fagayu tagafanud sis furuan Listra ay sis Ikunyu gfatuyan te, Timuteu sik matuyan fag taw.

³ Ay Pablu kaylat gtaban Timuteu, nu katanya, kanya nafae fakatoglagan anya, gfaning taw Udyu at faugali, aroro sanya fag ngay taw Udyu nasaful wa te, Timuteu at mama sik taw Gresya.

⁴ Sas fagayu at fagsiboan fag ngay furuan, Pablu ay anggan at ufud nanamasaful sa sangay tagafanud, ngay nasugu ay sis Erusalem fag ngay fagtainan at nasadian fag ngay faugali laman gfaning tua.

⁵ Nu katanya, ankaksvn ngay tagafanud at fagafanudun, ay kayu menit kafamut tua ngay tagafanud.

Pablu at Taginfan sis Furuan Truas

⁶ Ay sanya ginan, Pablu ay at ngay ufud nalo wan sas talun Frigya ay sas Galasya, aroro at Masine fag Falad nasalag anya nu nanfamoyung at Masine fag Barita sas Asya.

⁷ Ay kanya fagayu nu ndasug sas talun Misya kaylat nangadasug sas talun Bitinya, ay Isus at Masine fag Falad wa kaylat Pablu ay at ngay ufud nu glao sanya.

⁸ Nu katanya, kanya fagayu nadalan Misya ay nataglayun sas Truas.

⁹ Ay ginanya fag yabi Pablu nataginfan, ay e nalag sik taw Masidunya nu malindug, ay gfainfanyuan te, “Adasugi staes Masidunya ay gubuki emi.”

¹⁰ Ay Pablu nu nfulo wan, nafalganan wami vtv aroro saful wami te, Dius nauro emi laman namoyung at Masine fag Barita sas talun Masidunya.

Lidya nu Gafanud

¹¹ Siginans furuan Truas, nasakay ami sas sakayan lino tagsas Samutrasya, ay balabag di nataglayun ami sas Neapulis fag furuan.

¹² Ay sanya ginan nataglayun ami sas furuan Filipus, ngay taw Ruma at fagagbilugun fag furuan tagsibaliwas talun Masidunya. Ay nabanwan yaymi sanya ngayuk menit.

¹³ Ay sis Famiangalay fag Menit, naduksun ami sas day furuan ay nalao sas tigyangan liskung em amatanganan te, sanya e fagnandaranginan. Ay antunggu mangaro sanya sik ngay mangena maful, ay nafakamatoan ami.

¹⁴ At sadi tagdungugan emi, at ngayan Lidya, kanya siginans furuan Tiatira. Kanya sik tagfalao at mafanud fag lanbung masialungan, ay sik tagseg yangay Dius. Ay Dius naluang Lidya at amatanganan laman gafanud Pablu at foyungan.

¹⁵ Sanya ginan, Lidya ay fagayu tagbanwan sit bale ansurung wan. Ay maksvn Lidya nu gfabulun emi te, “Nu gtuyan tuam angku te, sik tagafanud kwan sa tam Fun, taglayuni sa em bale.” Ay aroro maksvn nu gfabulun ggewan emi, nanangalo ami anya.

Pablu ay Silas Maubungan sis Filipus

¹⁶ Sik menit, gina ami glao sas fagnandaranginan, nafablang ami sik fagsuguan baguina at ke mauri fag falad tagfae fagmabalyananun anya laman mafafoyung takadasug. Ay at ngay tagfayafun ngayu nu gbul salapi aroro siginan kanya nu ginsaful.

¹⁷ Ay kafag baguina gguyan emi ay guro te, “Tuy fag ngay taw Tiba Tungud fag Dius at fagsuguan, ay gfoyung sa ayu nu setain ban nu kalangfe am.”

¹⁸ Kayu menit, katanya kafag mangena at fakamulun, ay Pablu anfanluat at amatanganan. Nu katanya, Pablu nasalubang kafag baguina ay nalong sanya fag mauri fag falad te, “Sa em Fun Isus at ngayan glong au emu te, duksuni wan sanya ginan fag baguina.” Ay ginanya kafag mauri fag falad naduksun wan.

¹⁹ Ay kafag baguina at ngay tagfayafun nu nalag te, wa ban e fagbulan ya salapi, nagamat Pablu ay Silas ay naguyudan anggan andasug sas fagawean laman namasalubang sat ke fagmabalyananun.

²⁰ Ay nu ndasug sa sangay tagwabilug at daga salubangan, kafag ngay tagfayafun nalong te, “Tuy fag ngay taw Udyu gfauri tam furuan.

²¹ Kanya gfoyung tibak fagafanudun tagfauri antam fag ngay taw Ruma.”

²² Ay fagayu taw masadi nu gfauri Pablu ay Silas, ay kafag ngay tagwabilug nasugu sa sangay taggamat te, “Buli at lanbung ay falangi.”

²³ Ay nu nafalang wan, naubung duama ay nasugu sa tagulit te, “Uliti fia.”

²⁴ Ay nu katanya, kanya nafasakbo Pablu ay Silas sasad bale fagubungan sis wabilug fag suluk, ay nasikfit duama at ngay bitis.

²⁵ Ay nu swabilug yabi wan, Pablu ay Silas gdarangin ay galubad gfauseganan Dius, ay fagayu at maubungan gdungugan.

²⁶ Ay ginanya yay, anke fanguig maksvn, ay fagubungan at ngay fagfatungkudan turuk nauigan, ay at ngay sakbawan anluang masakit, ay at maubungan at ngay siuk, anluas wan.

²⁷ Ay tagulit anfulo ay nalag te, fagubungan at ngay sakbawan maluangan, ay kanya nagunut at fiso laman namabul at sadili, at amatanganan te, fagayu at maubungan nalfas wan.

²⁸ Ay Pablu guro te, “Lagi, lag o gurus am sadili. Fagayu ami, ste yaymi.”

²⁹ Ay tagulit get salung ay gtadtaruyan nangakbang ay namalub sas Pablu ay Silas at daga salubangan.

³⁰ Ay kanya nafaduksun duama ay nainto te, “Duama, tain manga at masine ku fakamulun laman ban umlangfe au?”

³¹ Ay duama nabalus te, “Afanudi sa tam Fun Isus laman umlangfe o ay anggan fagdaul am fagyafunan.”

³² Ay duama nafoyung tam Fun at longan sa anya ay sas fagdaul at fagyafunan.

³³ Ay ginanya fag yabi, kafag tagulit nataban duama ay nafegus at ngay fakarukan, ay kanya ansurung wan ay anggan fagayu tagbanwan sit bale.

³⁴ Ay kanya nataban duama sat bale ay nafafangon. Fagayu tagbanwan sit bale maksvn nu guseganan, aroro gafanud tua sas Dius.

³⁵ Ay balabag di, ngay tagwabilug nasugu sat ngay fagsuguan te, “Falfasi wan kafag duama.”

³⁶ Ay kafag tagulit nalong sas duama te, “Em ngay tagwabilug nasugu te, falfasi wan ayu. Loi wan manabayan.”

³⁷ Ay Pablu nabalus kafag ngay fagsuguan te, “Kanya fag ngay tagwabilug naylat nu gafalangan ami sis salubangan ngayuk taw, deyud nainsaful te, o e asalanan ami, dewa ami taw Ruma. Ay katsi nu namalfas am emi masuksukanan way, wa masine takatanya. At masine kanyai tua fag ngay tagwabilug at namalfas emi.”

³⁸ Ay kafag ngay tagulit nanamasaful sa sangay tagwabilug Pablu ay Silas at longan. Ay kanya fagayu maksvn nu kalimu nu nasaful te, duama sik taw Ruma.

³⁹ Nu katanya, kafag ngay tagwabilug nalao sas fagubungan laman namainfanyuan duama. Ay kafag ngay tagwabilug nafalfas Pablu ay Silas, ay kanya fagayu gfainfanyuan sas duama te, “Loi wan.”

⁴⁰ Ay duama nu nalao wan siginan fagubungan, andasug sas Lidya at bale, ay gfaksvn sanya fag ngay tagafanud. Ay sanya ginan duama nalao wan.