Fakamulun 15 - Fanawbuid tagsibaliwas Fakayabian

Ngay Nasugu ay Ngay Fagtainan Anful

¹ Ginanya, e ngay taw siginans talun Udea andasug sas furuan Antiukya, ay kanya fagayu nafoyung sas yud Udyu fag ngay tagafanud te, “Nu dway am nafae fakatoglagan, kata Muisis at Faugali, wa ban am umlangfe.”

² Nu katanya, Pablu ay Bernabe gfabadbaboan kanya fag ngay taw tagsiginans Udea. Ay ngay tagafanud sis Antiukya nafili Pablu ay Bernabe laman glao sas Erusalem gadgaloan tibak tagafanud ay namakamatoan sanya fag ngay nasugu ay fag ngay fagtainan sabaliwa nu gfae fakatoglagan.

³ Nu katanya, ngay tagafanud sis furuan Antiukya nasugu duama ay tiba yak tagafanud. Ay kanya fagayu gina gdalan sas talun Fenisya ay Samarya, nafasaful te, e ngay yud Udyu tagafanud wan sas Isus. Ay sanya fag ngay tagafanud maksvn nu guseganan.

⁴ Ay kanya fagayu nu ndasug sas Erusalem, sanya fag ngay tagafanud, ngay nasugu ay at ngay fagtainan, guseganan gfasakbo anya fagayu. Sanya ginan, Pablu ay Bernabe nafoyung sabaliwa Dius at ngay nafakamulun.

⁵ Ay tibak taw Fariseu tagafanud anlindug ay nalong te, “At yud Udyu fag ngay taw masine nu e fakatoglagan yangay ay nu gfaning Muisis at Faugali.”

⁶ Nu katanya, Isus at ngay nasugu ay at ngay fagtainan anful laman gkamatoan sabaliwa takatanya.

⁷ Ay nu ngaduge wan nu gkamatoan, Pedru anlindug ay nalong te, “Em ngay faduksay, nasaful wam te, Dius nafili angku siginan ayu laman namoyung au at Masine fag Barita sas yud Udyu fag ngay taw laman kanya fagayu dumungug yangay ay gafanud sas Dius.

⁸ Dius saful way fagayu taw at amatanganan. Ay kanya nafalag te, kaylat yangay anggan yud Udyu fag ngay taw siginan nu gfon sa anya fagayu at Masine fag Falad, kata at nafon sa antam.

⁹ Dius nu gdama yud Udyu ay antam fag ngay taw Udyu, gsud way, aroro Dius nafasine yangay yud Udyu at ngay amatanganan gina kanya fagayu anke fagafanudun.

¹⁰ Katsi nafaskud am Dius ay nafafasanan am sa sangay yud Udyu fag ngay tagafanud at mabyat, tam fagyudun makatu gfasanan ay anggan tam ngay mangaguyang at fagyudun makatu gfasanan.

¹¹ Gafanud tam te, umlangfe tam anggan yud Udyu fag ngay tagafanud, aroro siginan tam Fun Isus at fagmagalangun.”

¹² Ay fagayu tagsanya nu nadungug takatanya, namaragangan way lang. Ay kanya fagayu nadungugan Pablu ay Bernabe nu gfansulitan sabaliwas Dius at nafakamulun sa anya fagayu gina duama magamut sis yud Udyu fag ngay taw. Duama nafakamulun at ngay madulo ay at mabalyanan tagfatuyan te, Dius si anya.

¹³ Ay duama nu ntabu wan nu gfoyung, Santiagu nalong yangay sa sangay tagafanud te, “Ku ngay faduksay dungugani angku.”

¹⁴ Simun nafoyung sa antam sabaliwa tam Dius nu guro at yud Udyu fag ngay taw laman kanya fagayu Dius yangay at ngay taw.

¹⁵ Katanya yangay ebi fag ngay taglong at rirukan te,

¹⁶ “ ‘Nu ntabu ban takatanya kafoli kwan, ay nandog kban namawat Dabid at fagbanwanan at kinrasras, ay nandog kban namalindug kafag bale at kinkarit,

¹⁷ laman ban tibak taw grvbvy tam Fun, anggan ku nafili fag ngay taw yud Udyu laman ku ngay taw. Katanya tam Fun at longan.

¹⁸ Ay nu gfoyung kafag longan siginan wa ebi.’

¹⁹ Nu katanya, nu sa angku, lag tam gfaidapan ya at yud Udyu fag ngay taw nu nangakbang sas Dius.

²⁰ Nu bunway namoyung way tam sa anya fagayu te, ‘Lag kon nusnge wain fag fanggalangun at nafon sa sangay taw at nawat fag fagsegan, ay lag gfanugtug, ay lag namatugtug, ay lag kon yamas fagbaugun at yud nafataguk ay anggan taguk.’

²¹ Aroro siginan ebi, e gfoyung wan Muisis at Faugali sas fagayu furuan, ay e gtap kafag longan sa sangay taw Udyu at ngay bale fakafulan galay Famiangalay fag Menit.”

At Rirukan sas Yud Udyu fag ngay Tagafanud

²² Nu katanya, Isus at ngay nasugu ay ngay fagtainan, anggan fagayu tagafanud namatangan te, Masine nu gfili tam siginan antam nu seyuk mangama laman at nangalo Pablu ay Bernabe sas furuan Antiukya. Ay kanya fagayu nafili Silas ay Udas at ngayan yangay te, Barsabas. Ay kanya fag dua tagfangguna ngay tagafanud.

²³ Katatuy at nalong sit ba rirukan: Ami fag ngay nasugu ay fag ngay fagtainan, nariruk ami sa ayu em ngay faduksay, yud Udyu fag ngay tagafanud tagbanwan si sangay furuan Antiukya ay Sirya ay Silisya te, O manabayan tuam?

²⁴ Nadungug ami te, tibak taw ste ginan emi deyud em suguan, gfaduanun ayu siginan at ngay foyungan.

²⁵ Nu katanya, nafili ami sik ngay mangama, ay nasugu ami sa ayu laman nangalo tam fakesugun fag duak faduksay Bernabe ay Pablu.

²⁶ Ay duama nafalganan at leleg sas fagidapun laman gfaning tam Fun Isus.

²⁷ Ay nasugu ami Udas ay Silas laman gfoyung yangay sa ayu em ngay nalong sit buba fag rirukan.

²⁸ Siginan at Masine fag Falad at gubuk, ansadi ami te, wami nangus gfamut ya ay fagfaningun sas day takatatuy:

²⁹ lag am kon fakonun at nafon fag fanggalangun sa sangay fagsegan, ay lag gfanugtug, ay lag namatugtug, ay lag kon taguk, ay fagbaugun at faknul nu dway e nafataguk. Ayayui siginan takatanya fag faugali. Kata kanya em foyungan.

³⁰ Sanya ginan, nasugu wan Udas ay Silas sas Antiukya. Ay nu ndasug wan, duama nafaful ngay tagafanud ay nafon at ba rirukan ay sanya ginan, natap.

³¹ Ay nu natap wan, sanya fag ngay taw guseganan ay ansun at ngay amatanganan.

³² Ay Udas ay Silas, Dius yangay at taglong, ngayu yangay at foyungan sa sangay tagafanud tagfaksvn at ngay amatanganan ay at fagafanudun.

³³ Kafag dua gbanwan yay sanya ngayuk menit. Ay sanya ginan, duama gina galoun laman kafoli sat nasugu anya, sanya fag ngay tagafanud gdarangin anya laman manabayan nu glao.

³⁴ (Dewa katanya, Silas at algan kafamato yay sanya.)

³⁵ Ay Pablu ay Bernabe gbanwan yay sis Antiukya ay gfoyung ay gfayamag tam Fun at longan magamut yangay tibak takamoyung.

Pablu ay Bernabe nu Gsaruayan

³⁶ Ay nu nlangfe ngayuk menit, Pablu nalong sas Bernabe te, “Kafoli wata sangay furuan ay nansibo sanya fag ngay tagafanud, sa ta fagfoyungan tam Fun at longan, laman nanlag ta te, setain kanya fag ngay taw at fagafanudun.”

³⁷ Ay Bernabe kaylat gtaban Uan at ngayan yangay te, Markus.

³⁸ Ay Pablu wa kaylat ya gtaban Markus aroro ebi kanya naubun duama gina sis talun Panfilia, ay wa nafataglayun at fakamulun.

³⁹ Pablu ay Bernabe ankugat yay nu gbadbaboan, ay duama nasaruayan. Nu katanya, Bernabe nataban Markus ay duama nasakay sas sakayan lino tagsas furu Sipre.

⁴⁰ Ay Pablu nataban Silas, ay sanya fag ngay tagafanud nadarangin duama laman tam Fun gdiri, ay sanya ginan duama nalao wan.

⁴¹ Ay duama nadalan sas talun Sirya ay sas Silisya laman gfaksvn sanya fag ngay tagafanud at ngay fagafanudun.