Fakamulun 14 - Fanawbuid tagsibaliwas Fakayabian

Pablu ay Bernabe sis Furuan Ikunyu

¹ Sanya ginan, Pablu ay Bernabe andasug sas furuan Ikunyu ay nasakbo sas taw Udyu at bale fakafulan. Ay duama nafoyung at Masine fag Barita, ay ngayuk taw Udyu ay taw Gresya at nafanud.

² Ay ngay taw Udyu at yud gafanud maksvn nu kauri, nu katanya, kanya fagayu nasugu tibak taw Udyu at yud gafanud laman namaurianan Pablu ay Bernabe.

³ Nu katanya, Pablu ay Bernabe ngaduge nu sanya fag furuan, ay maseganama nu gfoyung sabaliwa tam Fun. Ay tam Fun nafatuyan te, duama at foyungan matuyan sabaliwa at fagmagalangun, siginan at nafakamulun fag ngay madulo ay at mabalyanan.

⁴ Ay sanya fag furuan at ngay taw wa masadi. Tibak taw gfaning taw Udyu ay tibak taw gfaning Isus at ngay tagadal.

⁵ Ay katsi, ngay taw Udyu ay yud Udyu fag ngay taw anggan ngay tagfangguna anful, ay kanya fagayu masadi at algan nu namaurianan ay namana kafag duama.

⁶ Ay duama nu nasaful takatanya, nalagyu ay nalao sas furuan Listra ay Derbe, sis Likaunya at fagagbilugun fag ngay furuan ay anggan sit ligung fag ngay furuan.

⁷ Ay duama nafataglayun nu kamoyung at Masine fag Barita sanya fag ngay furuan.

Sis Furuan Listra ay Derbe

⁸ Sis furuan Listra e sik mangama at kinkalay at bitis. Kanya wa malao siginan nu kasalug.

⁹ Kanya malunggung ay gdungugan Pablu at foyungan. Ay Pablu nadama kafag mangama, ay nasaful te, kafag mangama e fagafanudun laman kafia.

¹⁰ Ay Pablu nafabia nu glong sa anya te, “Malindugi.” Ay kafag mangama natulbu ay anlindug ay malao wan.

¹¹ Ay fagayu taw nu nalag Pablu at nafakamulun, kanya fagayu nauro sas Likaunya fag fangaringang te, “Sik ngay taw yabi andasug sa antam kata sik ngay taw.”

¹² Kafag ngay taw nafangayan Bernabe te, Seus ay nafangayan Pablu te, Ermes, aroro tagaringang gina gfoyung kanya wan fagdua.

¹³ Seus fag fagsegan at bale munakbang sis day furuan. Ay kafag fagsegan at tagfon fanggalangun ay anggan ngay taw nataban sik ngay baka tama gadalagan ngay barugwak ay nalao sas sakbawan furuan, laman at fanggalangun sa duama.

¹⁴ Pablu ay Bernabe nu nasaful, nagirat at ngay lanbung laman gfalag te, kabalu, ay nalao sanya fag ngay taw at wabilug ay nauro te,

¹⁵ “Wain ay fagfakamulunun takatanya? Ami, taw yangay ami kata ayu. Gfoyung waymi sa ayu at Masine fag Barita laman gubun am ay ngay fagsegan at yud e tungkul ay tumoglag am tagleleg fag Dius at nawat banwa ay daga, dagat ay anggan fagayu tagsanya.

¹⁶ Ebi at kinlangfe fag ngay buknga Dius nafabayan wan fagayu taw sas fagdaul daga laman gfaning at ngay mesa fakaylatun.

¹⁷ Dewa katanya, Dius nafalag tua sa ayu te, kanya si wa gugat ayu siginan at ngay fakamulun at masine. Dius nafadasug sa ayu arak ay faggutluun sit kasakan fag buknga, laman e fakonun tuam ay guseganan.”

¹⁸ Pablu ay Bernabe dewa nafoyung takatanya, kafag ngay taw gfataglayun nu gfon at ngay fanggalangun.

¹⁹ Ay sik ngay taw Udyu andasug siginans furuan Antiukya talun Pisidya at fagagbilugun ay siginans Ikunyu. Ay kanya fagayu nagewan sanya fag ngay taw ay nafuyut gang ay nafana Pablu, ay naguyudan sas day furuan, ay tagguyudan nu glong anbul wan.

²⁰ Ay dewa katanya, Isus at ngay tagadal nu naligung Pablu, kanya anlindug ay anfoli sas furuan daul. Ay balabag di Pablu ay Bernabe nalo wan sas furuan Derbe.

Pablu ay Bernabe Anfoli sas Antiukya tagsis Talun Sirya

²¹ Sanya ginan, Pablu ay Bernabe kamoyung at Masine fag Barita sis furuan Derbe, ay ngayu at naylat ay at nafanud sas Isus. Sanya ginan, duama anfoli yay sas Listra sas Ikunyu ay sas Antiukya,

²² ay nafaksvn ngay tagafanud at ngay amatanganan, ay nalong te, “Banwani matuyan sa ay fagafanudun.” Ay nalong yangay te, “Dumalan tam ngayuk fagidapun laman Dius gfagtainan tua ban antam.”

²³ Sanya ginan, Pablu ay Bernabe nafili ngay fagtainan sa sangay furuan. Ay duama nadarangin yud gfangon laman gdarangin kafag ngay taw at bagu gafanud sa tam Fun, laman gfatigwanan anya fagayu.

²⁴ Ay duama nalao wan ay nadalan sas Pisidya ay andasug sas talun Panfilia.

²⁵ Ay kanya fag dua nafoyung at Masine fag Barita sis furuan Perga, ay nu ntabu wan nataglayun sas talun Atalya.

²⁶ Ay sanya ginan, duama nasakay sas sakayan lino kafoli sas furuan Antiukya sis talun Sirya. Sanya ebi nu gfatigwanan anya fagdua sas Dius, laman Dius gdiri anya gina gfakamulun, duama at nafatabu wan fag fakamulun.

²⁷ Ay duama nu ndasug sanya, nafaful ngay tagafanud ay nafoyung sa anya fagayu sabaliwa Dius at ngay nafakamulun, ay at balyawvtan laman at yud Udyu fag ngay taw gafanud.

²⁸ Ay duama nabanwan magamut ngay tagafanud ngaduge kbuknga.