Fakamulun 12 - Fanawbuid tagsibaliwas Fakayabian

Nu Gfaurianan ngay Tagafanud

¹ Ginanya fag buknga, fun Erudes gfasigad gfaurianan tibak tagafanud.

² Ay kanya nasugu at ngay fagsuguan laman namabul Santiagu, Uan at faduksay.

³ Ay fun Erudes nu nalag te, ngay taw guseganan aroro sat kinfasludan, kanya nafagamat yangay Pedru. Ginanya e fagmafulun sabaliwa Tinapay at yud e Famabia.

⁴ Ay Erudes nasugu laman nanggamat ay namaubung Pedru, ay arodi nafaulit sas ufatk gaban tagfawayan, ay galay sik gaban, ufatk tagfawayan. Ay Erudes at algan nu gfaurianan Pedru si sangay taw at daga salubangan gina ntabu fagmafulun sa baliwa Tagbarita nu Glangfe.

⁵ Ay kaduge Pedru maubungan, ngay tagafanud maksvn nu gdarangin anya.

Dius at Tagbarita nu Gfalfas Pedru

⁶ Ay nu munakbang wan Erudes nu namasalubang Pedru sa sangay taw, ginanya fag yabi Pedru masiukan duak salambitan, ay gtiug sis wabilug duak tagfawayan. Ay e ngay tagfawayan yangay tagulit sis sakbawan.

⁷ Ay arodi vtv, sik yamag andasug masakit sasad ubung ay tam Fun at tagbarita andasug ay ankakbang sas Pedru ay natigtig sit tigyangan laman gfulo. Ay kafag tagbarita glong te, “Afuloi ay alindugi!” Ay at siuk fag salambitan anluas wan.

⁸ Ay kafag tagbarita nalong sas Pedru te, “Suluni am lanbung ay am lapak.” Ay Pedru nafaning. Ay kafag tagbarita nalong yangay te, “Suluni yangay am lanbung daul ay aloi angku.”

⁹ Ay Pedru nanangalo ay naduksun siginans fagubungan. Ay dewa katanya, kanya wa saful te, o matuyan at kinfasludan, aroro nu glong, gtaginfan way.

¹⁰ Ay kafag dua nu nlangfe at fasadi ay at faduak tagulit, andasug sas sakbawan at ke faningding sanbung. Ay kafag sakbawan anluang mandi ay duama naduksun wan siginans fagubungan, ay nu nalangfe wan sik dalan, kafag tagbarita naubun wan Pedru.

¹¹ Ay Pedru nu nasaful te, wa mangaro gtaginfan, kanya nalong te, “Katsi nasaful kwan, matuyan mangaro fagayu at kinfasludan. Tam Fun nasugu at tagbarita laman gfalangfe angku siginans Erudes at daluap, ay sa sangay taw Udyu at fagfanyaun takadasug ma sa angku.”

¹² Sanya ginan, Pedru nalao sas Maria at bale. Maria Uan at mina. Uan at ngayan yangay te, Markus. Ay sanya ngayuk tagafanud maful ay gdarangin.

¹³ Ay Pedru katuk sas dingding sakbawan alad. Ay sik fagsuguan fag mangena at ngayan Ruda nanangakbang ay nanlag te, sinu takatuk.

¹⁴ Ay Ruda natogdungug Pedru at aringang, ay aroro maksvn nu guseganan, ya nananluang sakbawan. Abat ngate, anfoli yay sat iba laman namasaful te, “Pedru sis sakbawan.”

¹⁵ Ay kafag ngay tagafanud nalong anya te, “Kata way o siring at yud e amatanganan.” Ay Ruda gfabulun glong te, “Anud, Pedru wa fia tagsis sakbawan.” Ay kanya fagayu nalong sa anya te, “Malgau am nadungug tagalaga way anya fag tagbarita.”

¹⁶ Ay Pedru gfataglayun nu katuk. Ay kanya fagayu nananluang sakbawan ay nu nalag te, kanya wa fia Pedru, maksvn nu kadulo.

¹⁷ Ay Pedru gyafe te, lag am garingang. Ay arodi kanya gfoyung sa anya fagayu sabaliwa tam Fun at nafakamulun nu gfalfas anya siginans fagubungan. Ay gfataglayun yangay glong te, “Fasafuli yangay sas Santiagu ay sa tam ngay faduksay at kinfasludan sa angku.” Sanya ginan, Pedru nalo wan sa tibak furuan.

¹⁸ Ay balabag di, ngay tagulit wa mabayan ya at amatanganan, aroro Pedru we kalag ya. Ay anggan kanya fagayu andulo te, tain nu kafasludan.

¹⁹ Ay fun Erudes nafarvbvy Pedru, dewa katanya, wa nalag. Nu katanya, kanya nainto sa sangay tagulit, ay kafag ngay tagulit wa yangay nasaful. Ay Erudes nasugu te, “Fabuli wan kafag ngay tagulit.” Sanya ginan, Erudes nalo wan siginans talun Udea ay namanwan wa sas Sesaria.

Erudes nu Kabul

²⁰ Fun Erudes maksvn nu kauri ngay taw Tiru ay ngay taw Sidun. Nu katanya, kafag ngay taw kaylat namakamatoan laman nangasadi sa anya aroro kafag ngay taw at fagnamulan at fakonun sanya ginan wan. Dewa katanya, kafag ngay taw nanamagadgalangan yay taguna Blastu aroro kanya tagulit fun at bale daul.

²¹ Ay nu ndasug Erudes at filian fag menit nu nansalubang ngay taw Tiru ay ngay taw Sidun, kanya nasulun at lanbung famatoglag te, sik fun, ay nananmalunggung sat faglunggungan ay gelongan sa kafag ngay taw.

²² Ay kafag ngay taw guro te, “Tagaringang sik dius, bunwa taw!”

²³ Ay arodi vtv tam Fun at tagbarita at sadi nafaurianan Erudes, aroro kafag fun nu kamatungudun wa sas Dius. Ay ulud naon anya ay anbul wan.

²⁴ Siginan at kinfasludan, Dius at longan anfagdaul ay ginanya, ngayu at kinfamut ngay tagafanud.

²⁵ Ay Bernabe ay Saulu nu nafosuk wan ngay fanggubukun sa sangay tagafanud, anfoli wan sas Antiukya siginans Erusalem. Ay duama nataban Uan at ngayan yangay te, Markus.