Fakamulun 11 - Fanawbuid tagsibaliwas Fakayabian

Pedru nu Gfayamag sa sangay Tagafanud sis Furuan Erusalem

¹ Isus at ngay nasugu ay ngay tagafanud sis talun Udea nadungug te, at yud Udyu fag ngay taw gfaning yangay Dius at longan.

² Ay Pedru nu ndasug sas Erusalem, tibak tagafanud fag ngay taw Udyu gfabadbaboan anya. Kafag ngay taw gafanud te, “Fae fakatoglagani yap yud Udyu fag ngay tagafanud laman kanya fagayu manangasadi sa antam.”

³ Kanya fagayu nalong sas Pedru te, “Wain am fagnanangaloun ay am fagnafasfuanun gfangon ngay yud Udyu at yud yay nafae fakatoglagan?”

⁴ Nu katanya, Pedru gfoyung sa kafag ngay taw at kinfasludan fagayu. Kanya nalong te,

⁵ “Gina au sis furuan Upa, gdarangin au ay anke taginfan au. Manlag kdi e nafadaga siginans banwa kata sik umut daul mafatuguan ay e fanrabing fag ufatk fugungan, ay nafatungkud munakbang si angku.

⁶ Ay nadama au, ay ku nalag, nusnge wain wan fag ngay mangilafang: taglao ay at ngay madot, ngay tagalafang ay anggan ngay manuk tungud.

⁷ Ay nadungug au sik aringang glong te, ‘Pedru, malindugi fabuli ay oni wan.’

⁸ “Ay nabalus au te, ‘Ku Fun, kwa kaylat. Kabavn kwa kon at yud masine ay at masuya fag fakonun.’

⁹ “Ay nadog kyay fia nadungug kafag aringang siginans banwa te, ‘Nusnge wain Dius at ngay nafasine, lag o gtuyan te, masuya.’

¹⁰ Ay tulu ginan au gdungug nu glong takatanya, ay arodi naranggut wan kafag umut sas banwa.

¹¹ “Ay arodi vtv e ndasug tuluk mangama sa ku fagtaglayunan fag bale laman namablang angku, kanya siginans furuan Sesaria.

¹² Ay at Masine fag Falad nalong sa angku te, ‘Lag o gadgaragun nangalo anya.’ Ay unumk tagafanud nanangalo angku. Ay nu ndasug ami sas furuan Sesaria, nasakbo ami sas Kurnelyu at bale.

¹³ Ay Kurnelyu nafoyung emi te, ‘Nalag au sik tagbarita si ku basad bale ay nalong angku te, “Sugui am fagsuguan sas furuan Upa laman nanlag Simun, at ngayan yangay te, Pedru.

¹⁴ Ay kanya ban gfoyung sa emu ay sas fagayu am ngay kalongan sabaliwa fakalangfean.” ’

¹⁵ “Ay gina au ganangaringangun, at Masine fag Falad antayuk sanya fag ngay taw, kata yangay nu kafasludan ebi sa antam.

¹⁶ Namatang au tam Fun at nalong te, ‘Uan nafasurung taw sasad mamam, dewa katanya, umsurung ban am sat Masine fag Falad.’

¹⁷ Dius nafon yangay sanya fag ngay taw at nafon antam ebi gina tam bagu gafanud sa tam Fun Isus. Nu katanya, kwa masalag Dius at fakaylatun fag fakamulun.”

¹⁸ Ay kanya fagayu nu nadungug takatanya, namaragangan ay gseg Dius. Ay nalong te, “Nu katanya, Dius nafon sik buknga sas yud Udyu fag ngay taw laman gubun at ngay asalanan, ay laman magbilug yangay leleg at yud e fakatabuan.”

Tagafanud sis Furuan Antiukya sis Talun Sirya

¹⁹ Ay Esteban nu nbul wan, anke faurianan sa sangay tagafanud sis Erusalem, ay kanya fagayu nafanaruayanan way lang. Tibak tagafanud andasug sas talun Fenisya ay Sipre ay sas furuan Antiukya sis talun Sirya, ay kanya fagayu gfoyung Dius at longan nusnga nday at fakadasugan. Ay at fagfoyungan sa way lang ngay taw Udyu.

²⁰ Dewa katanya, tibak tagafanud siginans Sipre ay siginans talun Sirene nanangalo wan anya fagayu. Ay kanya fagayu nu ndasug sas furuan Antiukya nafoyung sas yud Udyu fag ngay taw at Masine fag Barita sabaliwa tam Fun Isus.

²¹ Ay tam Fun nagubuk anya fagayu, nu katanya, ngayu at nafanud sat foyungan ay at nafaning tam Fun.

²² Ngay tagafanud sis furuan Erusalem nu nadungug takatanya, kanya fagayu nasugu Bernabe laman nangadasug sas furuan Antiukya.

²³ Ay Bernabe nu ndasug sanya, guseganan nu nalag Dius at fagmagalangun sa kafag ngay taw. Ay sas fagdaul at amatanganan kanya gfoyung sanya fag ngay taw Dius at longan, laman gfaning tua gugat tam Fun.

²⁴ Bernabe sik matuyan fag taw ay at Masine fag Falad si tua anya, ay maksvn at fagafanudun, ay kanya nataban ngayuk taw sa tam Fun.

²⁵ Sanya ginan, Bernabe nalo wan sas furuan Tarsu laman nanrvbvy Saulu.

²⁶ Ay nu nalag Saulu, nataban sas furuan Antiukya. Ay kanya fag dua gbanwan magamut si sangay tagafanud kaduge sik banwa, ay kamoyung sas ngayuk taw. Sis Antiukya wan tam Fun nu gfangayan at ngay tagadal taguna te, Tagafanud sa tam Fun Isus.

²⁷ Ay ginanya, tibak taglong sis Erusalem andasug sas Antiukya.

²⁸ Ay Agabu fag taglong galo yangay. Ay siginan at Masine fag Falad at fagmabalyananun kanya anlindug ay gfoyung sa sangay taw Antiukya te, kadasug ban sik maksvn fag fanlunus sas fagdaul daga. Anfasludan takatanya gina Klaudyu gfunan.

²⁹ Nu katanya, kafag ngay tagafanud nafalganan at fanggubukun sa sangay tagafanud sis talun Udea. Ay galay at sadi nafon kaksvn at fagmakatuun.

³⁰ Ay kanya fagayu nafaful at fanggubukun, ay nafabuba sas Bernabe ay sas Saulu laman namosuk sa sangay fagtainan bale fakafulan.