Fakamulun 10 - Fanawbuid tagsibaliwas Fakayabian

Kurnelyu at Taginfan

¹ Sis furuan Sesaria, e sik mangama at ngayan Kurnelyu. Kanya sik fun tagfawayan sa sik gaban tagfawayan sis talun Italya.

² Kurnelyu fag talanan gsuyu tua ay gseg Dius. Ay kanya nagubuk ngayuk taw Udyu at ke fagidapun, ay mafandarangin tua.

³ Ay sik menit gina sis fatulu sfafun, Kurnelyu nataginfan, ay nalag Dius at tagbarita at sadi, ay kafag tagbarita nalong te, “Kurnelyu.”

⁴ Ay Kurnelyu nadama ay anlimu maksvn, ay nabalus te, “Nataw ku Fun?” Ay kafag tagbarita nalong anya te, “Dius nadungug am darangin ay guseganan am fakamulun nu ggubuk o at ke ngay fagidapun.

⁵ Katsi sugui sik ngay mangama sas furuan Upa laman namablang sik taw at ngayan Simun, at ngayan yangay te, Pedru.

⁶ Pedru at fagtaglayunan fag bale sis tigyangan dagat sis Simun at bale. Simun sik tagfagong fagbaugun at balat.”

⁷ Ay kafag tagbarita nu nalao wan, Kurnelyu nagewan at fagsuguan at dua ay at sadi at tagfawayan at matuyan ay tagseg Dius. Kanya fag tagfawayan Kurnelyu at fagsuguan at sadi.

⁸ Ay Kurnelyu nafoyung sat fagsuguan fag tulu at ngay kinfasludan, ay sanya ginan, nasugu wan sas furuan Upa.

Pedru at Taginfan

⁹ Ay balabag di nu swabilug menit wan, Kurnelyu at fagsuguan fag tulu nu munakbang wan sas furuan Upa, Pedru nasas tungud bale laman nandarangin.

¹⁰ Kanya maksvn nu kalunus, ay kaylat wan nanfangon. Ay kaduge e gfalganan at matawan, kanya anke taginfan.

¹¹ Ay kanya nalag banwa nu kaluang ay kata sik umut mafatuguan at ke fanrabing ufatk fugungan nu kadaga.

¹² Ay sanya masuadan nusnge wain fag mangilafang at mela; taglao, tagalafangan, ay manuk tungud.

¹³ Ay Pedru nadungug sik aringang te, “Pedru, malindugi. Fabuli ay oni.”

¹⁴ Ay Pedru nabalus te, “Ku Fun, kwa kaylat. Kwa kon nusnge wain at masuya ay at yud masine.”

¹⁵ Ay kafag aringang glong yay fia te, “Dius at ngay nafasine lag o gtuyan te, masuya.”

¹⁶ Ay Pedru nu gdungug kafag aringang, tulu ginan, ay arodi kafag umut anranggut wan sas banwa.

¹⁷ Kaduge Pedru gamatangan at taginfan at masuad, Kurnelyu at ngay fagsuguan andasug, ay grvbvy Simun at bale, ay malindug sis day sakbawan alad,

¹⁸ ay ginto te, “O ste Simun, at ngayan yangay te, Pedru?”

¹⁹ Ay kaduge Pedru gamatangan at taginfan at masuad, at Masine fag Falad nalong anya te, “Tuluk mangama grvbvy emu.

²⁰ Duksuni wan, lag o gadgaragun nangalo, aroro au at nasugu anya fag tulu.”

²¹ Ay Pedru nu naduksun, nalong sanya fag tuluk mangama te, “Au wan ay fagrvbvyun. Wain ay fagindasugun?”

²² Ay kafag tuluk mangama nabalus te, “Kurnelyu fag fun tagfawayan nasugu emi. Kanya matuyan ay gseg Dius, ay fagayu taw Udyu gsuyu tua anya. Ay sik tagbarita nalong anya te, nantaban ami emu sas Kurnelyu at bale laman kanya gdungugan am longan.”

²³ Ay Pedru nafasakbo kafag tuluk mangama kata sik ngay betaw. Ay balabag di Pedru ay tibak tagafanud sis Upa nanangalo kafag mangama tulu.

Pedru sis Kurnelyu at Bale

²⁴ Ay nu nlangfe sik menit, Pedru andasug sas furuan Sesaria, ay ginanya, Kurnelyu gfanya anya, ay sanya yangay at ngay kalongan ay at ngay fagadgalangan.

²⁵ Ay Pedru nu nasakbo sas Kurnelyu at bale, Kurnelyu nafablang ay namalub sis Pedru at daga salubangan ay naseg anya.

²⁶ Ay Pedru nalong anya te, “Malindugi, au sik taw kyangay kata emu.”

²⁷ Ay kaduge gkamatoan, Pedru nasakbo ay nalag ngayuk taw maful,

²⁸ nu katanya, kanya nalong sa anya fagayu te, “Nasaful wam te, wa masine sik taw Udyu nu gfagadgalangan sik yud Udyu fag taw ay nusdi at nansibo sat bale. Dewa katanya, Dius nafalag angku te, ‘Lag o gtuyan te, masuya nusnga sinu fag taw.’

²⁹ Nu katanya, kwa nadgaragun nangalo gina e namablang angku. Ay katsi gyasafulun au te, wain ay fagyafastieun angku?”

³⁰ Ay Kurnelyu nabalus te, “Ebi vtv sis fatuluk menit, kata yangay katsi sfatulu sfafun, gdarangin au si ku bale. Ay sik mangama masulo at lanbung andasug masakit ay namalindug si ku salubangan.

³¹ Ay kanya nalong sa angku te, ‘Dius nadungug am darangin ay kaylat am fakamulun nu ggubuk o ngay tagidapan.

³² Sugui tuluk mangama sas furuan Upa laman nantaban Simun, at ngayan yangay te, Pedru. Kanya gbanwan sis Simun at bale sis tigyangan dagat. Simun sik tagfagong fagbaugun at balat.’

³³ Nu katanya, nafauro au emu. Ay fadi fadi andasug tuo stae. Ay katsi maful ami ste sis Dius at daga salubangan laman gdungugan tam Fun at ngay longan siginan emu.”

³⁴ Ay Pedru gfasigad gfoyung te, “Katsi nasaful au te, Dius we fagfili taw.

³⁵ Dius kaylat dewa ndaginan fag talun at taw nu gsuyu tua anya ay gfakamulun at matuyan.

³⁶ Ay nasaful wam sabaliwa at Masine fag Barita, Dius at nafoyung sa emi fag ngay taw Israel te, ngay taw umke fagmasadiun sas Dius siginan nu gafanud sas Isus, Dius at nafili fag Fun, kanya wan fagayu taw at Fun.

³⁷ Ay nasaful yangay am at kinfasludan sis talun Udea, siginans furuan Galilea, gina Uan gfoyung sabaliwa nu gfasurung.

³⁸ Ay nasaful am te, Dius nafon at Masine fag Falad ay fagmabalyananun sas Isus tagsiginans Nasaret, ay nasaful yangay am te, nusnga nday kanya nu glao, gfakamulun gugat at masine ay gfafia fagayu tagsis daga Satanas at fagmabalyananun, aroro Dius gufud tua anya fagayu.

³⁹ “Mafatuyan ami Isus at ngay nafakamulun sa sangay taw Udyu at talun ay anggan sis Erusalem. Ay sanya fag ngay taw nafabul anya siginan nu gtuktuk sas fasulungan kayu.

⁴⁰ Ay baliwan sis fatuluk menit, Dius nafadog nafaleleg anya ay nafasure sa emi.

⁴¹ Isus nu kasure, sa way lang emi, Dius at ngay nafili, laman tagfatuyan ban sabaliwa anya. Ay nafasfuan ami anya gfangon ay ginum gina kanya nadog wan naleleg.

⁴² Dius nasugu emi te, ‘Famoyungi at Masine fag Barita sa sangay taw ay fatuyani yangay te, Isus wan Dius at nafili laman nantuyan sabaliwa sangay taw tagleleg yay ay sangay kinbul te, sinu ban at kumlangfe ay ban sinu at yud kalangfe.’

⁴³ Ngay taglong nafoyung sabaliwas Isus te, fagayu tagafanud sa anya umkalyam wan at ngay asalanan.”

⁴⁴ Ay kaduge Pedru garingang, fagayu tagdungugan sanya anke Masine fag Falad.

⁴⁵ Ay Pedru at ngay ufud fag ngay taw Udyu tagafanud andulo, aroro at yud Udyu fag ngay taw anke Masine fag Falad yangay.

⁴⁶ Aroro kafag ngay taw Udyu nadungug at yud Udyu fag ngay taw nu garingang sa tibak ngay fangaringang ay nu gseg Dius.

⁴⁷ Ay Pedru nalong te, “Dius nafon yangay sas yud Udyu fag ngay taw at Masine fag Falad kata nu gfon antam. Ay nu katanya we masalag kafag ngay taw nu kasurung sas mamam.”

⁴⁸ Ay Pedru nasugu te, “Fasurungi anya fagayu sa tam Fun Isus at ngayan.” Ay sanya ginan, kanya fag ngay taw nalong sas Pedru te, “Banwani yap ste nu seyuk menit.”