Esra 9 - Fanawbuid tagsibaliwas Fakayabian

Ngay Taw Israel Andadwa sa Tibak Talun at ngay Taw

¹ Ay Esra nalong yangay te, “Takatanya fagayu nu nfasludan wan, ngay taw Udyu at ngay tagfangguna nanangakbang sa angku ay nalong te, ‘Ngayuk taw Israel ay anggan ngay taw Lebi ay ngay tagfon fanggalangun, tagugali kata sit ngay ligung fag ngay taw at ugali. Kanya fagayu gfakamulun at yud masine kata ngay taw Kanaan, taw Ket, taw Peres, taw Ebus, taw Amun, taw Muab, taw Igiptu, ay taw Amur at ngay fakamulun.

² Ay kanya fagayu anggan at ngay baguama nafamubay sanya ginan fag ngay gaban taw. Nu katanya, Dius at nafili fag ngay taw anke suglat tibak gaban taw. Ay at nafangguna takatanya fag ngay fakamulun tam ngay tagfangguna wan.’

³ “Nu nadungug au takatanya, nagirat au ku lanbung at kaksvnan nu kabalu au, nafaburago au ku buk, ay naranggut au ku umi ay namalunggung au kabalu.

⁴ Ay ngay taw takalimu tua Israel at Dius at longan anful sa angku, aroro at kaiban fag ngay taw Israel at kinfoli siginan at fagatabananan nafamabo. Ay namalunggung au kabalu, sitsigons fafun baliwa gina namon fanggalangun.

⁵ “Ay gina namon fanggalangun tagsis fafun baliwa nafaragang kwan nu gfalag au te, kabalu au. Ay dewa ku lanbung magiratan, namalub au ay nafabat ku take laman gdarangin au sa ku Dius Yawi.

⁶ Nalong au te, “Ku Dius, maksvn nu kapla au. Kwa matangda ya emu at kaksvnan nu kapla au, aroro maksvn wan em ngay asalanan; kata wa nu nasawe sa em ngay alfuyu ay gakadasugun banwa.

⁷ Gfasigad siginan em ngay mangaguyang dasug katsi, maksvn em ngay asalanan. Ay aroro gasalanan way mi anggan em ngay fun anggan tagfon fanggalangun, nagbilugan ami tibak talun at fun. Kanya fagayu nafabul tiba si emi, ay tiba natabanan, ay tiba nabulan at ramraman ay nafaplan, kata at kinfasludan sa emi katsi.

⁸ “Dewa katanya, Yawi em Dius anfanyu tuo emi. Ay naylat tuo nu e kasawad ami, ay nafabanwan o emi si am nafili fag talun. Nafon o emi sik fagsegun ay nafae fagmanabayanun tuo emi, siginan nu gafagsuguanan ami.

⁹ Dewa ami sik ngay fagsuguan, di o naylat nu sik ngay fagsuguan ami gugat, nu bunway nafalag tuo sa emi am fakafanyun siginan nu gagbilug o talun Persya at fun laman kanya masine tua at amatanganan sa emi. Nafakamulun o takatanya laman kae fagmanabayanun ami, ay laman nandog ami namawat am bale at kinkiklas, ay laman gulit o emi ste sis talun Uda ay sis Erusalem.

¹⁰ “Em Dius, katsi anke asalanan ami, ay wami e fagmalongun ya, aroro nafamabo ami am ngay suguan,

¹¹ am ngay fagsuguan fag ngay taglong at nafoyung emi. Kanya fagayu nalong oma emi te, ‘Em fagnangagbilugun fag talun sik masuya way, aroro sa sangay tagbanwan sanya at fagmauriun. Kanya fagayu nafasuya kanya fag talun siginan at ngay nafakamulun mauri.

¹² Ay am ngay taglong nalong yangay emi te, lag ami kadadwa sa kafag ngay taw, ay lag ami ggubuk laman kanya fagayu kae fagmakatuun, laman ban kabavn maksvn tuami gugat ay kae fagmakatuun, anggan em ngay kasugfunanan.’

¹³ “Em Dius, nafaurianan o emi, aroro sa em ngay asalanan. Ay am faurianan sa emi kurang yay laman famayad sa em ngay nafakamulun at mauri, dewa katanya, naylat tuo nu kae sawad ami.

¹⁴ Ay nu nlangfe takatanya, nadog yay mi nafamabo am ngay suguan, ay andadwa ami sa sangay taw tagfakamulun at mauri. Nu katanya, natuyan ami te, kauri ro wo ay gfamin emi.

¹⁵ Yawi, Israel at Dius, matuyan tuo. Aroro naylat tuo nu kae sawad ami dasug katsi. Gtuyan ami te, e ngay asalanan ami, ay wami manangalindug ya sa am fagmasineun, aroro e ngay asalanan ami.”