Esra 8 - Fanawbuid tagsibaliwas Fakayabian

Esra at ngay Fadgaloan at Kinfoli siginan at Fagatabananan

¹ Esra nalong te, “Kayu tuy ngay tagfangguna talananan, at naalo angku sas Erusalem siginans furuan Babilunya, gina Artaserses gfunan:

² Tagsiginan Finekas at talananan Gersum, ay tagsiginan Itamar at talananan Daniel,

³ ay Katus, Sekanyas at baguama, tagsiginan Dabid at talananan, ay Sakaryas ay at fadgaloan fag sadik sandan limak safuluk mangama, tagsiginan Parus at talananan (at ngay mangaguyang at ngay ngayan marirukan.)

⁴ Ay Elyeuenay, Seraya at baguama ay at fadgaloan fag duak sandank mangama, tagsiginan Pakat-Muab at talananan,

⁵ ay Sekanyas, Akasyel at baguama ay anggan at fadgaloan fag tuluk sandank mangama, tagsiginan Satu at talananan,

⁶ ay Ebed, Yunatan at baguama ay at fadgaloan fag limak safuluk mangama, tagsiginan Adin at talananan,

⁷ ay Esaya, Atalya at baguama ay at ngay fadgaloan fag fituk safuluk mangama, tagsiginan Elam at talananan,

⁸ ay Sebadya, Mikael at baguama ay at ngay fadgaloan fag waluk safuluk mangama tagsiginan Sefatya at talananan,

⁹ ay Ubadyas, Ekyel at baguama ay at fadgaloan fag duak sandan labi waluk mangama, tagsiginan Uab at talananan,

¹⁰ ay Selumit, Usifya at baguama ay at fadgaloan fag sadik sandan unumk safuluk mangama, tagsiginan Bani at talananan,

¹¹ ay Sakaryas, Bebay at baguama ay at fadgaloan fag duak safulu e waluk mangama, tagsiginan Bebay at talananan,

¹² ay Ukanan, Akatan at baguama ay at fadgaloan fag sadik sandan sadik safuluk mangama, tagsiginan Asgad at talananan,

¹³ ay Elifelet, Yuel ay Semaya ay at fadgaloan fag unumk safuluk mangama, tagsiginan Adunikam at talananan,

¹⁴ ay Utay ay Sakur ay at fadgaloan fag fituk safuluk mangama, tagsiginan Bigbay at talananan.”

Esra nu Kafoli sas Erusalem

¹⁵ Ay Esra nalong te, “Nafaful au at nanangalo angku fag ngay taw munakbang sis liskung tagfamilugan sas talun Aaba. Ay nu maful ami sanya tuluk menit. Ay nu nadama au rirukan nu seyu at nangalo angku, anggan yangay tagfon fanggalangun, nasaful au te, we sanya ngay taw Lebi.

¹⁶ Nu katanya, nafauro au fagayu tagfangguna ngay gaban: Elyeser, Aryel, Semaya, Elnatan, Arib, Elnatan, Natan, Sakaryas, ay Mesulam, ay at fadgaloan fag duak taw at mamatanganan Uyarib ay Elnatan.

¹⁷ Ay nasugu au kanya fag ngay tagfangguna sas Iddu tagfangguna sis furuan Kasifya laman nanget sa anya ay sat kalongan fag ngay fagsuguan tagsis Yawi at bale te, ‘Sugui ngay taw laman tagfakamulun sis Yawi at bale.’

¹⁸ Ay aroro Dius ggubuk tua emi, kanya fagayu nasugu stae Serabya, anggan at ngay sisian ay at ngay faduksay fag labi waluk mangama. Serabya sik mamatanganan fag taw ay siginan Makli at talananan ay Lebi at kasugfunanan. Ay Lebi, Israel at baguama at sadi.

¹⁹ Ay kanya fagayu nataban yangay stae Kasabya ay at ngay faduksay anggan at ngay mangwai fag ngay mangama, ay nu fagayu wan duak safuluk mangama, ay Esaya tagsiginans Merari fag talananan galo yangay sanya.

²⁰ Ay kanya fagayu nataban yangay duak sandan duak safuluk fagsuguan sas Yawi at bale. Ebi fun Dabid ay at ngay tagfangguna nafili ngay fagsuguan sis Yawi at bale, kanya fag ngay fagsuguan taggubuk ngay taw Lebi. Ay kanya fag ngay fagsuguan at ngay ngayan marirukan.

Esra ay at ngay Fadgaloan Nadarangin

²¹ “Gina ami sis tigyangan Liskung Aaba, nalong au sa ku ngay fadgaloan te, ‘Lag tam gfangon laman kamababaun tam sa tam Dius, ay laman get tam sa anya te, “Gina ban mi glao, dirii emi anggan em ngay sisian ay em ngay ramraman.” ’

²² Aroro kapla au get sas fun at ngay tagfawayan ay at ngay tagsaful gsakay sis kabayu laman galaga emi sa em ngay fawayan kaduge ami glao, aroro nalong ami sas fun te, ‘Dius ggubuk fagayu tagseg anya, dewa katanya, kanya maksvn nu kauri sas fagayu takamabo anya.’

²³ Nu katanya, wami gfangon ay gdarangin ami sas Dius te, ‘Dirii emi,’ ay Dius nabalus tua em darangin.

Ngay Fanggalangun laman sas Yawi at Bale

²⁴ “Sanya ginan, nafili au labi duak taw siginan tagfangguna fag ngay tagfon fanggalangun, ay wa katap sanya Serabya, Kasabya ay at kalongan fag safulu.

²⁵ Sanya ginan, nafatigwanan au sa anya fagayu ngay salapi ay gintu, ay anggan fun at nafon fag ngay fagagbilugun, ay at ngay tagfalu longan at fon, ay ngay tagfangguna at fon, ay anggan ngay fagagbilugun tagsiginans ngay taw Israel laman ggubuk sa em Dius at bale.

^26-27 “Ay nafatigwanan au sa anya fagayu: duak safulu e duak fabudbungguan salapi, ay tuluk fagagbilugun at mawatan siginans salapi, ay tuluk fabudbungguan gintu, ay duak safuluk taya at mawatan siginans gintu at kabyatan waluk fabudbungguan ay sik wabilug ya, ay duak fagsuadan takarufa at madalusan, nu kabayad kata ngay fagsuadan takarufa at mawatan siginans gintu.

²⁸ “Ay nalong au sa sangay tagfon fanggalangun te, ‘Am ay kanya fag ngay fagagbilugun mafasamanan am laman sas Yawi. Ngay salapi ay ngay gintu sik nafalganan fia fag fanggalangun laman sas Yawi, tam ngay mangaguyang at Dius.

²⁹ Dirii fia ay namuba am kanya fagayu sas Yawi at bale sas Erusalem, sis salubangan ngay tagfangguna fag ngay tagfon fanggalangun, ay ngay taw Lebi, ay ngay tagfangguna talananan sis Israel.’

³⁰ “Nu katanya, ngay tagfon fanggalangun ay ngay taw Lebi nanamul kanya fag ngay salapi, ay gintu, ay ngay fagagbilugun, di e buin, laman namuba sas Yawi at bale sis Erusalem.

Nu Kafoli sas Erusalem

³¹ “Ay sis falabi duak menit gina taguna fag magdanun nalao ami siginans Liskung Aaba ay nataglayun ami sas Erusalem. Ay kaduge ami glao, em Dius nagubuk ay nadiri tua emi siginan em ngay fawayan ay siginan takamabul fag ngay taw.

³² Ay nu ndasug ami sas Erusalem, natungkud yay mi tuluk menit.

³³ “Ay sis faufatk menit, nasa ami em Dius at bale ay nafatigwanan ami em buba fag ngay salapi, ay gintu, ay ngay fagagbilugun yud e buin sas Meremut, Uryas at baguama fag tagfon fanggalangun, ay sas Elyasar, Finekas at baguama, ay sas taw Lebi fagdua, Usabad, Eswa at baguama, ay Nuadya, Binwi at baguama.

³⁴ Sanya ginan, natap ami ay nafabudbungguan ay nariruk kanya fag ngay fagagbilugun.

³⁵ “Ay fagayu taw Israel at kinfoli siginan at fagatabananan nafon at fagirugun fag ngay fanggalangun sat Dius: labi duak tama baka, siamk safulu e unumk tama tupa, ay fituk safulu e fituk riangan tupa tama. Ay kanya fagayu nafon yangay labi duak tama kambing laman at fanggalangun famalyam asalanan. Kanya fag ngay fanggalangun at nafon sas Yawi.

³⁶ Kanya fagayu nafon yangay famatuyan sas fun sirut ay sa sangay tagfangguna sabaliwa fakayabian fag afud talun Eufrates nu inda nu marirukan fun at suguan. Nu katanya, kanya fag ngay tagfangguna nagubuk ngay taw Israel, ay anggan nu gfakamulun sas Dius at bale.”