Esra 6 - Fanawbuid tagsibaliwas Fakayabian

Fun Daryu Naylat nu Gfadog Kawat Yawi at Bale

¹ Nu katanya, fun Daryu nasugu te, “Rvbvyi fia ngay rirukan tagsis fagfungsuan ramraman sis talun Babilunya.”

² Ay sis fun at bale sit mogat fag furuan Ekbatana, si sik furuan sis Medya fag afud talun, nalag sik rirukan taglong te,

³ Tuy fag rirukan tagfamatang te, gina taguna fag banwa fun Sirus nu gfunan, kanya nasugu te, fadogi yap awati Yawi at bale sis Erusalem, nu dada nu namuba at ngay fanggalangun. Famaogati tua at fagtungkudan turuk. At kabatan siamk safuluk darafa gsugfunan, ay at kabaan siam yangayk safuluk darafa gsugfunan.

⁴ Galay sis fatuluk talad gang, folii sat tungud sik kayu. Ay famayad buli siginans fun at ramraman.

⁵ Ay fun Nabukudunusur at nabuba sas Babilunya siginans Dius at bale fag ngay fagagbilugun, gintu, ay salapi, fafolii sas fagsuadan tagsis Dius at bale sis Erusalem.

⁶ Nu katanya, Tatenay fag fun sirut sis Eufrates at fakayabian, ay Setar-Busenay, ay am at ngay kaibaman fag ngay tagfangguna sanya fag afud talun,

⁷ fagayu am ayayui wan siginans Dius at bale, laman diam gsalag ya nu kawat, ay fabayani wan ngay taw Udyu at fun sirut ay at ngay fagtainan nu kawat si ebi at fagbalean.

⁸ Ay gsugu kyangay sa ayu te, gubuki ngay taw Udyu at ngay fagtainan nu gbayad fagayu at ngay fagayudanun laman tagfakamulun we fagasalaganun ya. Nu gbul am ay famayad fasiginani wan tam talun at fungsuan fag ramraman ay siginan sangay afud talun at famayad sas fun.

⁹ Kayu menit foni tua sa sangay tagfon fanggalangun at fagnangirugun fag ngay fanggalangun, baka tama tumad, tama tupa, ay tama tupa riangan, at fagnangirugun laman at fanggalangun sas Dius. Foni yangay anggan ngay trigu, barara, fanlangu ay bantika. Lag gfaragang nu gfon am,

¹⁰ laman kanya fagayu gfon tua gugat ngay fanggalangun sas Dius, ay laman gdarangin tua angku anggan ku ngay sisian.

¹¹ Gsugu kyangay te, nusnga sinu at yud nafafasludan takatanya, buli sik kayu siginan at bale ay urusi anya, ay iklasi wan at bale.

¹² Dius nafili furuan Erusalem, nu inda nu gfauseganan anya, ay kanya yangay ban nangus at nanfaurianan nusnga sinu fag fun ay fag talun at yud gfafasludan takatatuy fag ngay suguan ay at naiklas at bale tagsis Erusalem. Au, fun Daryu at nasugu tuy. Fafasludani fia fagayu.

Nafadante Yawi at Bale

¹³ Sanya ginan, Tatenay fag fun sirut, ay Setar-Busenay ay anggan at ngay fadgaloan nafafasludan fun Daryu at suguan.

¹⁴ Nu katanya, ngay taw Udyu at ngay fagtainan gfataglayun nu gfakamulun kaduge Yawi at ngay taglong Agay ay Sakaryas, Iddu at baguama, gfabitsug at ngay amatanganan. Kanya fagayu nafatabu Yawi at bale kata Israel at Dius at suguan kata fun Sirus, Daryu, ay Artaserses, talun Persya at ngay fun at nafafakamulun.

¹⁵ Yawi at bale antabu gina sis fatuluk menit sis faduak magdanun Adar, gina sis faunumk banwa fun Daryu nu gfunan.

¹⁶ Ngay taw Israel, ay ngay tagfon fanggalangun, ay ngay taw Lebi, ay tiba ya at kinfoli siginan at fagatabananan maksvn nu guseganan gina maful laman gfadante Dius at bale.

¹⁷ Ay kaduge kanya fagayu maful, kanya fagayu nafon sadik sandank baka tama, ay duak sandank tupa tama, ay ufatk sandank riangan tupa. Ay nafon yangay labi duak tama kambing laman at fanggalangun famalyam Israel at kasugfunanan fag labi dua at ngay asalanan.

¹⁸ Kanya fagayu nafafoli ngay taw Lebi at fanambagun laman sik ngay tagfon fanggalangun ay laman gfakamulun at mesa fakamulun sis Dius at bale sis Erusalem, kata Muisis at rirukan.

Fagmafulun sabaliwa Tagbarita nu Glangfe

¹⁹ Gina sis falabi ufatk menit ay sis fasadik magdanun, at fadogan fag banwa, ngay taw at kinfoli siginan at fagatabananan, anke fagmafulun sabaliwa Tagbarita nu Glangfe.

²⁰ Ngay tagfon fanggalangun ay taw Lebi nafasine at ngay sadili laman di e malong nu gfangguna galay fagmafulun. Sanya ginan, ngay taw Lebi nafabul at fanggalangun fag ngay tupa, laman sanya fag fagmafulun. Kanya fagayu nafakamulun takatanya laman sa sangay taw at kinfoli siginan at fagatabananan, ay laman sat ngay kalongan fag ngay tagfon fanggalangun, ay laman sat ngay sadili.

²¹ Sanya ginan, ngay taw Israel at kinfoli siginan at fagatabananan, ay tiba yak taw tagbanwan sanya at yud ya gfakamulun at mauri kata ngay taw at yud gtoglag Dius, kanya fagayu naubun at fagmauriun laman nanseg Yawi ngay taw Israel at Dius.

²² Ay kaduge fituk menit kanya fagayu maful guseganan sabaliwa Tinapay at yud e Famabia, aroro Yawi nafae fagusegananun anya fagayu, siginan nu gfabali fun Asirya at amatanganan laman ggubuk anya fagayu nu kawat Israel at Dius at bale.