Esekyel 9 - Fanawbuid tagsibaliwas Fakayabian

Nafabul ngay Tagseg ngay Fagsegan

¹ Sanya ginan, nadungug au Dius nu garingang daul te, “Ngay taw ke algan namaurianan furuan Erusalem, gewan, bubai ay ngay famabul.”

² Sanya ginan, e unumk taw at nasakbo sas sakbawan tagsabaliwas fawalan. Kanya fagayu e buba famabul. Ay e fadgaloan sik taw galanbungan at masine fag ramit ay e ba fanriruk sit fagwan. Kanya fagayu malindug sis day fagirugan mawatan tansu.

³ Israel at Dius at kamasuloan ankabat siginans tungud duak awatan at ke fakfak ay nalin sas sakbawan bale. Ay Yawi nauro kafag taw tagalanbungan at masine fag ramit ay at ke ba fanriruk sit fagwan,

⁴ ay nalong sa anya te, “Sa o swabilug furuan Erusalem ay rvbvyi ngay taw takabalu sat nafakamulun at maksvn nu mauri sit furuan. Ay nanriruk o sanya fag ngay taw at dangasan laman sit famatoglag.”

⁵ Ay nadungug kyangay Dius nu glong sanya fag unumk taw te, “Gunai wan anya sas furuan ay fabuli ngay taw at yud marirukan at dangasan. Lag am kafanyu ya kafag ngay taw.

⁶ Namabul am ngay fagtainan, ngay baguama ay ngay baguina, ngay mina ay at ngay sisian, dewa katanya, lag am gfabul ngay taw at marirukan at dangasan. Nu gfabul am, fasigadi siginan ku bale.” Ay taguna at nafabul, ngay tagfangguna sis Yawi at bale.

⁷ Sanya ginan, Dius nalong sanya fag ngay taw te, “Namasuya am ku bale, ay namapnu am ngay taw at kinbul sas fagdaul basad ubung.” Ay kanya fagayu nalao wan laman namabul ngay taw.

⁸ Kaduge kanya fagayu gfabul, au anfamato kway. Ay namalub au gdarangin te, “Yawi, ku Fun, o nunda gfamin wo fagayu taw Israel aroro kadotama o furuan Erusalem?”

⁹ Kanya gbalus angku te, “Maksvn wan taw Israel ay taw Uda at asalanan. Ay maksvn wan nu gfadfabulan sit furuan ay we fagmatuyanun ya. Kanya fagayu glong te, ‘Yawi wa gdungug ya antam, ay natalyuyan wan.’

¹⁰ Nu katanya, kwa nangafanyu ya kafag ngay taw, nu bunway, namakamulun au sa anya fagayu kaksvn at nafakamulun sa tibak taw.”

¹¹ Kafag taw tagalanbungan at masine fag ramit ay at ke ba fanriruk sit fagwan anfoli sas Yawi ay glong te, “Nafakamulun kwan am nafafakamulun sa angku.”