Esekyel 6 - Fanawbuid tagsibaliwas Fakayabian

Ngay Longan sabaliwa ngay Buksul tagsis Israel

¹ Yawi nalong sa angku te,

² “Taw at baguama, salubangi sa sangay buksul tagsis Israel ay longi te,

³ ‘Am tagsis Israel fag ngay fungsu, ay fag ngay buksul, ay fag ngay buknga fungsu, ay fag ngay datag, dungugani Yawi tam Fun at longan te, Gfadasug kban sa ayu awayan ay nanrufa kban fagayu fagnansegan sa tangabat fag ngay buknga.

⁴ Nanrufa kyangay ban ay ngay fagirugan, ay anggan ngay fagirugan at mabebanglu fag lune ay gfabul kban ngay taw si sangay fagsegan at daga salubangan.

⁵ Ngay taw Israel, nu nbul ban am namarapyagan kban ay ngay bilug sa ay ngay fagsegan at salubangan, ay namarapyagan kyangay ban ay ngay butul say fagirugan at ligung.

⁶ Ay fagdaul ban ay furuan kaiklas wan, laman ay ngay fagnansegan ay ngay fagnangirugan ay anggan ay fagnangirugan at mabebanglu fag lune ay tiba ya ay nafakamulun, umkalyam wan.

⁷ Ay ay ngay taw ban umbul, ay sumaful ban am te, au Yawi.

⁸ “ ‘Dewa katanya, kya ban gfamin ayu sas awayan, ay tiba ban lumagyu yay sa tibak talun,

⁹ ay kanya ban fagayu sik ngay natabanan. Ay gina gbanwan sa tibak talun, sanya yaban nu gamatang angku, ay sanya yangay ban nu gamatangan te, nu se aksvn nu kauri au at nafamaboan angku ay nu gseg at ngay fagsegan. Ay kanya ban fagayu maksvn nu kauri at mesa sadili, aroro at ngay nafakamulun maksvn nu mauri ay nu masuya.

¹⁰ Ay kanya ban fagayu sumaful te, au Yawi, ay sumaful yangay te, mafanud ku ngay nalong ku fagnamafasludanun ban sa anya fagayu.’ ”

¹¹ Sanya ginan, Yawi ku Fun nalong angku te, “Talaptapi am daluap ay talasi sas daga am darafa, aroro sa sangay taw Israel at nafakamulun mauri ay at masuya. Kanya wan at malong at fagnangabulun ban sas awayan, sas lunus ay sas fakasaitun.

¹² Ngay taw ban tagbanwan sa tangayayu umbul sas fakasaitun. Ay at munakbang ban umbul sas awayan. Ay at sawad ban umbul sas lunus. Takatanya ban fag balyawvtan kanya fagayu sumaful te, maksvn nu kadotama au anya fagayu.

¹³ Ay gina ban at ngay kaiban at mabulan magamut sit ngay fagsegan, sit day fagirugan at ligung, ay si sangay buksul, ay si sangay tungud buksul, ay si sangay fun kayu tagbia, ay si sangay fun kayu at marabung at lanbung, ay fagayu kayu ensina at marabung, sat fagnangirugan gugat at ngay fagirugun at mabebanglu fag lune laman sat ngay fagsegan, sumaful te, au wan Yawi.

¹⁴ Gfaurianan kban anya fagayu nusnga nday nu gbanwan ay namasik mabaluan kban at talun, siginan at yud e taw fag talun ay tagsas fawalan baliwa fag alvngvdan ay sas Dibla tagsis fasiunan baliwa fag alvngvdan. Nu katanya, kanya ban fagayu sumaful te, au Yawi.”